 |
ທ່ານ ບຸນຊູ ບຸນພັກດີ ຫົວໜ້າຫ້ອງການ ການເງິນເມືອງ ໄດ້ລາຍງານການຈັດຕັ້ງປະຕິບັດແຜນງົບປະມານ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2026. ໃນນີ້: ດ້ານລາຍຮັບ ແຜນການທັງໝົດ 13,274.80 ລ້ານກີບ, ປະຕິບັດໄດ້ 6,669.63 ລ້ານກີບ (ເທົ່າກັບ 50.24% ຂອງແຜນການປີ). ໃນນັ້ນ, ສ່ວຍສາອາກອນຈັດເກັບໄດ້ 6,544.72 ລ້ານກີບ (ເທົ່າກັບ 49.86% ຂອງແຜນປີ) ແລະ ຄຸ້ມຄອງຊັບສິນຂອງລັດຈັດເກັບໄດ້ 81.10 ລ້ານກີບ (ເທົ່າກັບ 54.07% ຂອງແຜນປີ). ດ້ານລາຍຈ່າຍ ແຜນອະນຸມັດທັງໝົດ 4,342.61 ລ້ານກີບ ປະຕິບັດໄດ້ 2,018.90 ລ້ານກີບ (ເທົ່າກັບ 46.49% ຂອງແຜນການປີ). ໃນນັ້ນ, ລາຍຈ່າຍບໍລິຫານປະຕິບັດໄດ້ 1,578.40 ລ້ານກີບ (ເທົ່າກັບ 45.06%) ແລະ ລາຍຈ່າຍດັດສົມ-ສົ່ງເສີມ ປະຕິບັດໄດ້ 440.50 ລ້ານກີບ (ເທົ່າກັບ 52.94%) ແລະ ທິດທາງ 6 ເດືອນທ້າຍປີ 2026 ເມືອງແກ່ນທ້າວ ຈະສູ້ຊົນເກັບລາຍຮັບໃຫ້ໄດ້ຕື່ມ 6,649.96 ລ້ານກີບ ເພື່ອໃຫ້ໝົດປີບັນລຸ 13,319.60 ລ້ານກີບ (ເທົ່າກັບ 100.34% ຂອງແຜນປີ). ດ້ານລາຍຈ່າຍຄາດຄະເນໄວ້ 2,323.70 ລ້ານກີບ ເພື່ອໃຫ້ໝົດປີບັນລຸ 100% ຕາມແຜນການ.
ຈາກນັ້ນ, ຄະນະຮັບຜິດຊອບຂັ້ນແຂວງໄດ້ນໍາສະເໜີ ແລະ ແນະນໍາການນໍາໃຊ້ລະບົບຂໍ້ມູນຂ່າວສານການເງິນພາກລັດ (LIFMIS) ຊຶ່ງເປັນລະບົບທີ່ຊ່ວຍຫຼຸດຜ່ອນຂັ້ນຕອນການເຊັນເອກະສານທີ່ຫຍຸ້ງຍາກ ໂດຍຫຼຸດເຫຼືອພຽງ 3 ຂັ້ນຕອນ, ສາມາດຢັ້ງຢືນຜ່ານລະບົບ ແລະ ລົງລາຍເຊັນເອເລັກໂຕຣນິກໃນການຖອນເງິນງົບປະມານໄດ້ເລີຍ. ລະບົບດັ່ງກ່າວມີຂໍ້ຈໍາກັດຄື: ບໍ່ອະນຸຍາດໃຫ້ເບີກຈ່າຍເກີນແຜນງວດ ໂດຍຫົວໜ່ວຍງົບປະມານຕ້ອງຈ່າຍຕາມແຜນທີ່ແຂວງແຈ້ງໃນລະບົບເທົ່ານັ້ນ. ລະບົບ LIFMIS ປະກອບມີ 2 ລາຍການໃຫ້ນໍາໃຊ້ ຄື: ງົບປະມານ ເຮັດໜ້າທີ່ແຈ້ງແຜນປີ, ແຜນງວດ, ຈັດສັນແຜນຕາມສາລະບານງົບປະມານ ແລະ ສັງລວມງົບປະມານເພື່ອອະນຸມັດ ແລະ ການເງິນ ເຮັດໜ້າທີ່ໃນການຕີໃບຖອນເງິນ, ລົງລາຍເຊັນເອເລັກໂຕຣນິກ ແລະ ສ້າງສະໂນດສົ່ງຫາທະນາຄານ.
ໃນກອງປະຊຸມໄດ້ຍົກໃຫ້ເຫັນພາລະບົດບາດຄວາມຮັບຜິດຊອບຂອງ 3 ພາກສ່ວນ ຂັ້ນເມືອງ (ໜ່ວຍງານງົບປະມານ ແລະ ຫົວໜ່ວຍງົບປະມານ) ພ້ອມທັງແລກປ່ຽນຄໍາຄິດຄໍາເຫັນຢ່າງກົງໄປກົງມາ. ຕອນທ້າຍພິທີ, ທ່ານ ສົມສີ ຊາວພິລາ ໄດ້ມີຄໍາເຫັນສັງລວມ ແລະ ຊີ້ນໍາຕື່ມ ເພື່ອໃຫ້ການຈັດຕັ້ງປະຕິບັດວຽກງານການເງິນຜ່ານລະບົບ LIFMIS ໃນຕໍ່ໜ້າມີຄວາມສະດວກ, ໂປ່ງໃສ ແລະ ມີປະສິດທິພາບສູງສຸດ.
ຂ່າວ: ແກ່ນທ້າວ
ຄໍາເຫັນ