 |
ທ່ານ ສີຄານ ແກ່ນມະນີ ໄດ້ກ່າວວ່າ: ວຽກສໍາຫຼວດພົນລະເມືອງ ແລະ ທີ່ຢູ່ອາໄສ ໄດ້ຈັດຕັ້ງປະຕິບັດຢູ່ໃນທຸກໆ 10 ປີ ຊຶ່ງມີຈຸດປະສົງ ເພື່ອເກັບກຳສະຖິຕິພົນລະເມືອງລາວ ແລະ ຕ່າງປະເທດທີ່ດຳລົງຊີວິດຢູ່ ສປປ ລາວ ທັງເກັບກຳສະພາບການຂະຫຍາຍຕົວຂອງພົນລະເມືອງ ແລະ ເກັບກຳສະພາບທີ່ຢູ່ອາໄສຂອງພົນລະເມືອງ. ເພື່ອເກັບກໍາຂໍ້ມູນພື້ນຖານຂອງພົນລະເມືອງລາວ ກ່ຽວກັບການສຶກສາ, ດ້ານສາທາລະນະສຸກ, ຄຸນລັກສະນະທີ່ຢູ່ອາໄສ, ການດຳລົງຊີວິດ, ສະພາບຄວາມພິການ ແລະ ສະພາບການຍົກຍ້າຍຂອງພົນລະເມືອງ. ເກັບກໍາສະພາບກໍາລັງແຮງງານ ແລະ ສະພາບການມີວຽກເຮັດງານທໍາ. ສ້າງຖານຂໍ້ມູນໃຫ້ແກ່ການຄາດຄະເນພົນລະເມືອງໃນການສຳຫຼວດສຳມະໂນຄົວ ແລະ ຂຶ້ນທະບຽນພົນລະເມືອງ. ສ້າງ ແລະ ປັບປຸງລະບົບຂໍ້ມູນຂ່າວສານ ສະຖິຕິດ້ານຕ່າງໆໃຫ້ມີຄວາມຄົບຖ້ວນສົມບູນຍິ່ງຂຶ້ນໃຫ້ທຽບທັນກັບພາກພື້ນ ແລະ ສາກົນ. ສຳຫຼວດຂໍ້ມູນທາງດ້ານເສດຖະກິດ ແລະ ສະພາບທ່າອ່ຽງໃນດ້ານສັງຄົມ ແລະ ຄວາມສະເໝີພາບຍິງ-ຊາຍ.
ທ່ານ ສີຄານ ແກ່ນມະນີ ຍັງໄດ້ກ່າວຕື່ມວ່າ: ການຝຶກອົບຮົມຄັ້ງນີ້, ແມ່ນເພື່ອຝຶກອົບຮົບບັນດານັກກວດກາ ແລະ ນັກເດີນສຳຫຼວດຂັ້ນເມືອງ ໃຫ້ມີຄວາມຮູ້, ຄວາມເຂົ້າໃຈ ກ່ຽວກັບກອບແນວຄວາມຄິດ, ຈຸດປະສົງ ແລະ ວິທີການເກັບກຳຂໍ້ມູນ, ກວດກາຂໍ້ມູນຂອງນັກເດີນສຳຫຼວດໃຫ້ມີຄວາມເປັນເອກະພາບຢ່າງເລິກເຊິ່ງ ແລະ ຮັບປະກັນຄວາມຖືກຕ້ອງ, ເສີມສ້າງຄວາມຮູ້, ຄວາມເຂົ້າໃຈ ກ່ຽວກັບໜ້າທີ່ຮັບຜິດຊອບຂອງ ນັກກວດກາ ແລະ ນັກເດີນສຳຫຼວດ ລວມທັງວິທີການ ແລະ ຂັ້ນຕອນ ໃນການເກັບກຳຂໍ້ມູນພາກສະໜາມ ແລະ ເອກະພາບກ່ຽວກັບແຜນການຝຶກອົບຮົມສຳລັບນັກກວດກາ, ນັກເດີນສຳຫຼວດຂັ້ນເມືອງ, ຈຳນວນເຂດສຳຫຼວດ, ຈຳນວນນັກເດີນສຳຫຼວດ, ນັກກວດກາ ທີ່ຮັບຜິດຊອບຈັດຕັ້ງປະຕິບັດການເກັບກຳຂໍ້ມູນພາກສະ ໜາມ ຊຶ່ງການຝຶກອົບຮົມຈະໄດ້ຈັດຕັ້ງປະຕິບັດເປັນເວລາ 10 ວັນ ແລະ ທ່ານໄດ້ຮຽກຮ້ອງມາຍັງນັກສຳມະນາກອນທຸກທ່ານຈົ່ງສຸມສະຕິປັນຍາເອົາໃຈໃສ່ໃນການຕິດຕາມຮັບຟັງ, ແລກປ່ຽນບົດຮຽນສ້າງຄວາມເປັນເອກະພາບວິທີຈັດຕັ້ງປະຕິບັດ ແລະ ປະຕິບັດໂມງເວລາເຂັ້ມງວດ.
(ຂ່າວ: ແກ່ນທ້າວ)
ຄໍາເຫັນ