ແກ່ນທ້າວ ປະກາດ 3 ບ້ານເປັນບ້ານຂຽວສະອາດງາມຕາ.

ເມືອງແກ່ນທ້າວ ແຂວງໄຊຍະບູລີ ໄດ້ປະກາດບ້ານຈອມແກ້ວ, ບ້ານຈອມເພັດ ແລະ ບ້ານເກົ່າເມືອງ ເປັນບ້ານຂຽວ, ສະອາດ, ງາມຕາຂອງແຂວງ ຂຶ້ນໃນວັນທີ 7 ມີນາຜ່ານມານີ້, ຢູ່ທີ່ຫໍປະຊຸມບ້ານຈອມແກ້ວ. ໂດຍການເຂົ້າຂອງທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ, ມີການຈັດຕັ້ງບ້ານ ແລະ ປະຊາຊົນບ້ານຈ້ອມແກ້ວເຂົ້າຮ່ວມຢ່າງພ້ອມພຽງ.
ທ່ານ ບຸນຊູ ບຸນພັກດີ ຫົວໜ້າຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງ ໄດ້ຜ່ານບົດສະຫຼູບຕີລາປະເມີນຜົນການເກັບກໍາຂໍ້ມູນ ໃນການຈັດຕັ້ງປະຕິບັດວຽກງານ ຂຽວ ສະອາດ ງາມຕາ ວ່າ: ບ້ານຈອມແກ້ວ ມີ 368 ຄອບຄົວ ຂຽວປະຕິບັດໄດ້  368 ຄອບຄົວ ເທົ່າກັບ 100%, ສະອາດ ປະຕິບັດໄດ້ 357 ຄອບຄົວ ເທົ່າກັບ 97%, ງາມຕາ ປະຕິບັດໄດ້ 352 ຄອບຄົວ ເທົ່າກັບ 95.6%. ບ້ານຈອມເພັດ ມີ 192 ຄອບຄົວ ຂຽວ ປະຕິບັດໄດ້ 192 ຄອບຄົວ ເທົ່າກັບ 100%, ສະອາດ ປະຕິບັດໄດ້ 186 ຄອບຄົວ ເທົ່າກັບ 96,8%, ງາມຕາ ປະຕິບັດໄດ້ 187 ຄອບຄົວ ເທົ່າກັບ 97,3% ແລະ ບ້ານເມືອງເກົ່າ ມີ 188 ຄອບຄົວ ຂຽວ ປະຕິບັດ 188 ຄອບຄົວ ເທົ່າກັບ 100%, ສະອາດ ປະຕິບັດ 185 ຄອບຄົວເທົ່າກັບ 98,4%, ງາມຕາ ປະຕິບັດໄດ້ 185 ຄອບຄົວເທົ່າກັບ 98,4%. ທັງ 3 ບ້ານ ແມ່ນປະຕິບັດໄດ້ຖືກຕ້ອງຕາມເງື່ອນໄຂ ຂອງມາດຕະຖານ ແລະ ຕົວຊີ້ວັດ 90% ຂຶ້ນໄປ. ຈາກນັ້ນ, ທ່ານ ສະເຫຼີມທອງ ລາດສະແກ້ວ ຮອງຫົວໜ້າຫ້ອງການຊັບພະຍາກອນທໍາມະຊາດ ແລະ ສິ່ງແວດລ້ອມເມືອງ ໄດ້ຜ່ານຂໍ້ຕົກລົງ ສະບັບເລກທີ 202/ຈຂ.ຊຍ, ລົງວັນທີ 25 ມັງກອນ 2024 ວ່າດ້ວຍການຮັບຮອງບ້ານ ຂຽວ ສະອາດ ງາມຕາ ຂອງແຂວງໄຊຍະບູລີ. 
    ໂອກາດນີ້, ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ໄດ້ມອບໃບຢັ້ງຢືນໃຫ້ທັງ 3 ບ້ານ ແລະ ມີຄຳເຫັນຊີ້ນຳ ສຳລັບ3 ບ້ານທີ່ໄດ້ປະກາດຮັບຮອງເປັນບ້ານ ສີຂຽວ ສະອາດ ງາມຕາ.
(ຂ່າວ: ແກ່ນທ້າວ).