 |
ໃນກອງປະຊຸມ, ທ່ານ ບຸນຊູ ບຸນພັກດີ ຫົວໜ້າຫ້ອງການ ການເງິນເມືອງ ໄດ້ກ່າວເປີດກອງປະຊຸມ ບາງຕອນວ່າ: ກອງປະຊຸມຄັ້ງນີ້, ໄດ້ສະຫຼູບຕີລາຄາການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2025 ແລະ ແນະນຳແຜນງົບປະມານແຫ່ງລັດປະຈຳປີ 2026, ເຊື່ອມຊຶມບັນດາເອກະສານ, ນິຕິກຳຕ່າງໆ, ຄົ້ນຄວ້າ, ປະກອບຄຳເຫັນໃສ່ການຈັດຕັ້ງປະຕິບັດແຜນງົບປະມານແຫ່ງລັດປະຈຳປີ 2025 ຜ່ານມາ. ຈາກນັ້ນ, ທ່ານສາຍລົມ ສີປະມວນ ຮອງຫົວໜ້າຫ້ອງການ ການເງິນເມືອງ ໄດ້ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນການລົງທຶນຂອງລັດ ແລະ ແຜນງົບປະມານແຫ່ງລັດປະຈໍາປີ 2025 ແລະ ທິດທາງແຜນການ ປີ 2026 ວ່າ: ໃນໄລຍະຜ່ານມາ ໄດ້ສຸມໃສ່ຈັດຕັ້ງປະຕິບັດບັນດາຄາດໝາຍສູ່ຊົນຢ່າງເປັນລະບົບຕໍ່ເນື່ອງ ເຮັດໃຫ້ເສດຖະກິດຂອງເມືອງຂະຫຍາຍຕົວຢູ່ໃນລະດັບ 6,5% ຕໍ່ປີ, ລວມຍອດລາຍຮັບພາຍໃນທັງໝົດ 1,260.69 ຕື້ກີບ, ສະເລ່ຍລາຍຮັບໃສ່ຫົວຄົນໜຶ່ງໄດ້ 29.23 ລ້ານກີບ. ໃນສົກງົບປະມານປີ 2025 ເມືອງແກ່ນທ້າວໄດ້ຮັບແຜນຈັດເກັບລາຍຮັບເຂົ້າງົບປະມານໄດ້ທັງໝົດ 10,860.06 ລ້ານກີບ, ປະຕິບັດໄດ້ 12,993.36 ລ້ານກີບ ເທົ່າກັບ 119.64% ຂອງແຜນການປີ. ສ່ວນການຈັດຕັ້ງປະຕິບັດແຜນລາຍຈ່າຍງົບປະມານທັງໝົດ 5,393.30 ລ້ານກີບ, ປະຕິບັດໄດ້ 100% ຂອງແຜນການປີ. ທ່ານຮອງຫົວໜ້າຫ້ອງການການເງິນ ຍັງໄດ້ລາຍງານໃຫ້ຮູ້ຕື່ມວ່າ: ປີ 2026 ຈະສູ້ຊົນເຮັດໃຫ້ເສດຖະກິດຂອງເມືອງຂະຫຍາຍຕົວໃນລະດັບ 6.09% ແລະ ສ້າງມູນຄ່າເພີ່ມພາຍໃນໃຫ້ໄດ້ 1,342.44 ຕື້ກີບ, ສະເລ່ຍຕໍ່ຫົວຄົນໜຶ່ງໃຫ້ໄດ້ 30.76 ລ້ານກີບ ເທົ່າກັບ 1,809 ໂດລາສະຫະລັດ ແລະ ຈະສູ້ຊົນເກັບລາຍຮັບໃຫ້ໄດ້ 13,274.80 ລ້ານກີບ.
(ຂ່າວ: ແກ່ນທ້າວ)
ຄໍາເຫັນ