ແກ່ນທ້າວ ຖອດຖອນບົດຮຽນການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V

ທ່ານ ສີຄານ ແກ່ນມະນີ ປະທານຄະນະກໍາມະການປົກຄອງເມືອງ ໄດ້ຜ່ານບົດສະຫຼຸບຖອດຖອນບົດຮຽນ ການປ່ອນບັດເລືອກຕັ້ງສສຊ ຊຸດທີ X ແລະ ສສຂ ຊຸດທີ V ໃນທົ່ວເມືອງ ຊຶ່ງໄດ້ຍົກໃຫ້ເຫັນຜົນງານການຈັດຕັ້ງປະຕິບັດຂອງ 6 ອານຸກໍາມະການ ຄື: ອານຸກໍາມະການເລຂານຸການ ໄດ້ສຸມໃສ່ກະກຽມດ້ານເນື້ອໃນ, ນິຕິກຳ, ສັງລວມສະຖິຕິພົນລະເມືອງ ແລະ ຜູ້ມີສິດເລືອກຕັ້ງ, ພ້ອມທັງປະສານງານຮອບດ້ານ. ອານຸກໍາມະການໂຄງປະກອບ ແລະ ບຸກຄະລາກອນໄດ້ຄົ້ນຄວ້າ ແລະ ກຳນົດຕົວເລກຜູ້ສະໝັກ. ສຳລັບເມືອງແກ່ນທ້າວ ມີຜູ້ສະໝັກເປັນ ສສຂ ຊຸດທີ V ຈໍານວນ 7 ທ່ານຍິງ 2 ທ່ານ ຊຶ່ງປະກອບມີພະນັກງານ-ລັດຖະກອນ, ນາຍທະຫານ ແລະ ນັກທຸລະກິດ. ອານຸກໍາມະການໂຄສະນາ ແລະ ປຸກລະດົມ ໄດ້ຈັດຕັ້ງການລົງຫາສຽງທັງໝົດ 4 ຈຸດໃຫຍ່ ຄື: ສໍານັກງານ, ບ້ານດອນເມນ, ບ້ານໜອງ ແລະ ບ້ານປາກແຄມ ມີຜູ້ເຂົ້າຮ່ວມຮັບຟັງທັງໝົດ 2,400 ກວ່າຄົນ. ອານຸກໍາມະການປ້ອງກັນຊາດ-ປ້ອງກັນຄວາມສະຫງົບ ຮັບປະກັນຄວາມສະຫງົບປອດໄພໃນທົ່ວເມືອງໄດ້ 100%, ອານຸກໍາມະການບໍລິຫານ, ພິທີການ ແລະ ງົບປະມານ ໄດ້ຄຸ້ມຄອງງົບປະມານໃຫ້ມີປະສິດທິຜົນ ແລະ ອານຸກໍາມະການຮັກສຸຂະພາບ ໄດ້ກະກຽມໜ່ວຍແພດເຄື່ອນທີ່ຕິດຕາມແຕ່ລະຈຸດເລືອກຕັ້ງ. ຈາກນັ້ນ, ຫົວໜ້າແຕ່ລະອານຸກໍາມະການ ແລະ ໜ່ວຍປ່ອນບັດເລືອກຕັ້ງ ໄດ້ມີຄໍາເຫັນແລກປ່ຽນການປ່ອນບັດເລືອກຕັ້ງສະມາຊິກສະພາແຫ່ງຊາດ ຊຸດທີ X ແລະ ສະພາປະຊາຊົນແຂວງ ຊຸດທີ V ຢູ່ໃນທົ່ວເມືອງ.

(ຂ່າວ: ແກ່ນທ້າວ)