ພະແນກສາທາລະນະສຸກແຂວງຄໍາມ່ວນ, ສູນຕ້ານເອດ , ອົງການມູນນິທິດູແລປິ່ນປົວພະຍາດເອດ ປະຈໍາ ສປປ ລາວ ພ້ອມດ້ວຍຄູ່ຮ່ວມງານທີ່ກ່ຽວຂ້ອງໄດ້ຈັດງານສະເຫຼີມສະຫຼອງວັນເດັກນ້ອຍຍິງສາກົນ (International Day of the Girl Child) ຂຶ້ນໃນວັນທີ 11 ຕຸລາ ຜ່ານມາ ຢູ່ສະໂມສອນແຂວງ ພາຍໃຕ້ຄໍາຂວັນ ພະລັງສຽງຂອງເດັກຍິງ ໂດຍມີທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ທ່ານ ແກ່ນຈັນ ທອງສະຫວັດ ຫົວ ໜ້າພະແນກສາທາລະນະສຸກແຂວງ, ມີນັກຮຽນ ພ້ອມດ້ວຍແຂກຖືກເຊີນຈາກພາກສ່ວນຕ່າງໆເຂົ້າຮ່ວມ.
ທ່ານ ນາງ ປານີນາ ພູມສະຫວັນ ຫົວໜ້າສູນຕ້ານເອດ ແລະ ທ່ານ ແສງເກດສຸລີ ສົມວິຈິດ ໄດ້ຜັດປ່ຽນກັນກ່າວຈຸດປະສົງຂອງການຈັດງານ ແລະ ກ່າວປະຫວັດຄວາມເປັນມາຂອງວັນດັ່ງກ່າວວ່າ: ການຈັດງານສະເຫຼີມສະຫຼອງໃນຄັ້ງນີ້ແມ່ນແນໃສ່ເສີມສ້າງຄວາມເຂັ້ມແຂງໃຫ້ແກ່ເດັກຍິງເພື່ອເຮັດໃຫ້ເຂົາເຈົ້າມີຄວາມຮູ້, ມີທັກສະໃນການດໍາລົງຊີວິດ ແລະ ຮັກສາສຸຂະພາບຂອງຕົນ ແລະ ກະຕຸກຊຸກຍູ້ໃຫ້ຄູ່ຮ່ວມງານທຸກພາກສ່ວນຮ່ວມສົ່ງເສີມໃຫ້ມີນະໂຍບາຍຕ່າງໆເພື່ອເຮັດໃຫ້ເດັກຍິງທຸກຄົນໄດ້ຮັບສິດສະເໝີພາບທາງດ້ານການດູແລຕົນເອງເວລາເປັນປະຈໍາເດືອນ, ດ້ານເພດສຶກສາ, ການເຂົ້າໂຮງຮຽນ, ຫຼີກລ່ຽງການມີລູກໂດຍບໍ່ຕ້ອງການ, ການເສີມສ້າງທັກສະໃນການດໍາລົງຊີວິດ, ບັນຫາອື່ນໆທີ່ກະທົບເຖິງສຸຂະພາບຂອງເຂົາເຈົ້າ. ເດັກຍິງໃນທົ່ວໂລກມີສັດສ່ວນຫຼາຍກວ່າ 50% ຂອງຜູ້ຕິດເຊື້ອເຮສໄອວີ ແລະ ພວກເຂົາແມ່ນລວມຢູ່ໃນຈໍານວນ 500 ລ້ານຄົນ ທີ່ປະເຊີນກັບບັນຫາຄວາມຫຍຸ້ງຍາກລວມເຖິງການຖືກຈໍາແນກ, ການບໍ່ສາມາດເຂົ້າເຖິງຜ້າອະນາໄມ ແລະ ສິ່ງອໍານວຍຄວາມສະດວກອື່ນໆທີ່ເປັນອຸປະສັກໃນການດໍາລົງຊີວິດຂອງເຂົາເຈົ້າ. ເພື່ອຢາກໃຫ້ບັນລຸໄດ້ເປົ້າ ໝາຍແບບເລັ່ງລັດ (fast-tract) ຂອງອົງການສະຫະປະຊາຊາດຕ້ານເອດ (UNAIDS) ຄື: ພາຍໃນປີ 2025 ຈະຕ້ອງບັນລຸເປົ້າໝາຍໃໝ່ໃນການປິ່ນປົວໃຫ້ 95-95-95 ແລະ ຢຸດຕິການແຜ່ລະບາດຂອງເຊື້ອເຮສໄອວີ ແລະ ບັນລຸເປົ້າໝາຍການພັດທະນາແບບຍືນຍົງ (SDG) ໃນປີ 2030. ໃນປັດຈຸບັນນັບແຕ່ປີ 1990 ຫາ ເດືອນ 12 ປີ 2022 ມີຜູ້ຕິດເຊື້ອເຮສໄອວີ ປະມານ 18.606 ຄົນ, ເປັນເອດ 6.719 ຄົນມາຮັບຢາ ແລະ ມີຜູ້ທີ່ກິນຢາ ARV ໃນປັດຈຸບັນມາຮອດເດືອນ 5 ປີ 2023 ມີເຖິງ 10.623 ຄົນ ແລະ ມາຮອດເດືອນ 12/2022 ແມ່ນມີທ່າອ່ຽງການເພີ່ມຂຶ້ນຕາມລໍາດັບຄື: 76%, 77%, 97% ຖ້າເຮົາທຽບໃສ່ຈໍານວນລົງທະບຽນກິນຢາແມ່ນໄດ້ 77% . ສໍາລັບອົງການມູນນິທິດູແລປິ່ນປົວພະຍາດເອດແມ່ນເປັນອົງການທີ່ບໍ່ຫວັງຜົນກໍາໄລທີ່ສະໜອງຢາປິ່ນປົວ ແລະ ອຸປະກອນການແພດເຂົ້າໃນວຽກງານດູແລປິ່ນປົວຄົນເຈັບທີ່ເປັນພະຍາດເອດເລີ່ມແຕ່ປີ 1987 ເປັນຕົ້ນມາ, AHF ໄດ້ໃຫ້ການດູແລປິ່ນປົວຜູ້ຕິດເຊື້ອເຮສໄອວີ ປະມານ 1,5 ລ້ານຄົນໃນ 45 ປະເທດ. ປັດຈຸບັນ ເປັນອົງການທີ່ໃຫ້ການຊ່ວຍເຫຼືອດ້ານການປິ່ນປົວແກ່ຜູ້ຕິດເຊື້ອ HIV/AIDS ທີ່ໃຫຍ່ທີ່ສຸດໃນໂລກ ລວມທັງການໄດ້ປະກອບສ່ວນສະໜັບສະໜູນກອງທຶນໂລກໃນມູນຄ່າຫຼາຍກວ່າ 10 ລ້ານໂດລາ.
ສໍາລັບ AHF ລາວໄດ້ລິເລີ່ມໂຄງການຕັ້ງແຕ່ປີ 2018 ເປັນຕົ້ນມາ ດ້ວຍການຊ່ວຍເຫຼືອຂະຫຍາຍຕາໜ່າງການກວດເລືອດ ແລະ ຊ່ວຍເຫຼືອດູແລການປິ່ນປົວຜູ້ຕິດເຊື້ອເຮສໄອວີ ໃນລາວກໍຄືໃນປີ 2022 AHF ໄດ້ສະໜັບສະໜູນການກວດເລືອດ 39.588 ເທື່ອຄົນ ເພື່ອຊອກຫາເຊື້ອ HIV ແລະ ສາມາດພົບເຊື້ອ HIV 1.038 ຄົນ ກວມອັດຕາການຕິດເຊື້ອ HIV ເຖິງ 3,3%. ໃນຈໍານວນນີ້ພົບເຫັນວ່າກຸ່ມທີ່ມີເປີເຊັນສູງແມ່ນຢູ່ໃນກຸ່ມອາຍຸລະຫວ່າງ 20-39 ປີ.
ຂ່າວ-ພາບ: ແດງສະຫວັດ ແສນພານິດ
ຄໍາເຫັນ