ຄຳມ່ວນ ປະກອບຄຳຄິດເຫັນໃສ່ຮ່າງນິຕິກຳໃຕ້ກົດໝາຍຈຳນວນ 4 ສະບັບ

ວັນທີ 11 ມັງກອນ 2023ຢູ່ທີ່ຫ້ອງວ່າການແຂວງຄຳມ່ວນໄດ້ຈັດກອງປະຊຸມຄົ້ນຄວ້າປຶກສາຫາລື ແລະ ປະກອບຄຳເຫັນ ກ່ຽວກັບຮ່າງນິຕິກຳໃຕ້ກົດໝາຍ ທີ່ຈະນໍາເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຊຸດທີ II ຮັບຮອງ ໂດຍການເປັນປະທານຂອງ  ທ່ານ ແກ້ວອຸດອນ ບຸດສິງຂອນ ຮອງເຈົ້າແຂວງຄຳມ່ວນ, ມີ ທ່ານສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ, ບັນດາຫົວໜ້າ-ຮອງຫົວໜ້າພະແນກການ, ກົມກອງ, ພະນັກງານຫຼັກແຫຼ່ງອ້ອມຂ້າງເຂົ້າຮ່ວມ.
ສໍາລັບເອກະສານທີ່ນໍາມາຄົ້ນຄ້ວາຄັ້ງນີ້ປະກອບມີ: ຮ່າງຂໍ້ຕົກລົງວ່າດ້ວຍການແບ່ງຄວາມຮັບຜິດຊອບໃນການຈັດຕັ້ງປະຕິບັດແຜນຈັດສັນທີ່ດິນ, ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມແບບຮອບດ້ານຮອດປີ 2030ຂອງເມືອງຄູນຄໍາ, ຮ່າງຂໍ້ຕົກລົງວ່າດ້ວຍມາດຕະການຫຼຸດຜ່ອນອຸບັດເຫດ ແລະ ການຮັກສາຄວາມປອດໄພຕາມທ້ອງຖະໜົນພາຍໃນແຂວງ, ຮ່າງຂໍ້ຕົກລົງວ່າດ້ວຍການຄຸ້ມຄອງຂໍ້ມູນຂ່າວສານທາງອິນເຕີເນັດ ແລະ ການຕ້ານສະກັດກັ້ນອາຊະຍາກໍາທາງລະບົບຄອມພິວເຕີຢູ່ແຂວງຄໍາມ່ວນ ແລະ ຮ່າງຂໍ້ຕົກລົງວ່າດ້ວຍການຄຸ້ມຄອງ ແລະ ການພັດທະນາທີ່ດິນປ່າໄມ້ທົ່ວແຂວງ.
ໂອກາດນີ້, ທ່ານຮອງເຈົ້າແຂວງຄໍາມ່ວນຍັງໄດ້ມີຄໍາເຫັນ ແລະ ຮຽກຮ້ອງມາຍັງບັນດາຜູ້ເຂົ້າຮ່ວມເອົາໃຈໃສ່ຕິດຕາມ ແລະ ປະກອບຄຳຄິດຄໍາເຫັນດ້ວຍຄວາມຮັບຜິດຊອບສູງ ຕໍ່ບັນດາເນື້ອໃນທີ່ໄດ້ກໍານົດໃນຮ່າງນິຕິກໍາໃຫ້ຜັນຂະຫຍາຍມີຄວາມລະອຽດຊັດເຈນໃນເງື່ອນໄຂຕົວຈິງຂອງທ້ອງຖິ່ນບົນພື້ນຖານຢູ່ໃນກອບແນວທາງນະໂຍບາຍ ແລະ ກອບຂອງກົດໝາຍທີ່ກໍານົດໄວ້, ໃຫ້ພະແນກຍຸຕິທໍາໄດ້ເປັນໃຈກາງໃນການຕິດຕາມເບິ່ງໂຄງສ້າງຂອງຮ່າງນິຕິກໍາລວມເຖິງເນື້ອໃນຕ່າງໆ ເພື່ອແນໃສ່ເຮັດໃຫ້ມີຄວາມຄົບຖ້ວນສົມບູນ, ແທດເໝາະ, ສອດຄ່ອງຕາມພາລະບົດບາດ, ສິດ-ໜ້າທີ່, ທັງນີ້ຈະໄດ້ນຳເອົາຮ່າງນິຕິກຳຈຳນວນດັ່ງກ່າວ ສະເໜີຕໍ່ກອງປະຊຸມສະພາປະຊາຊົນແຂວງຮັບຮອງ ເພື່ອນຳໄປຈັດຕັ້ງປະຕິບັດໃຫ້ເປັນຮູບປະທຳ.
 ຂ່າວ-ພາບ: ມະນີວັນ