ທ່ານ ໄຊຊະນະ ໂຄດພູທອນ ໄດ້ກ່າວເນັ້ນເຖິງຄວາມສຳຄັນຂອງການເຜີຍແຜ່ ແລະ ເຊື່ອມຊຶມເນື້ອໃນຄຳສັ່ງຕ່າງໆ ເພື່ອສ້າງຄວາມເຂົ້າໃຈອັນເປັນເອກະພາບ, ນຳໄປສູ່ການຈັດຕັ້ງປະຕິບັດຢ່າງມີປະສິດທິຜົນ ແລະ ສອດຄ່ອງກັບແນວທາງຂອງພັກ ແລະ ລັດ. ພ້ອມດຽວກັນນັ້ນ ທ່ານຍັງໄດ້ຮຽກຮ້ອງໃຫ້ບັນດາຂະແໜງການ ແລະ ທ້ອງຖິ່ນ ຈົ່ງພ້ອມກັນສຸມສະຕິປັນຍາຄົ້ນຄວ້າ, ຄົ້ນຄິດ ແລະ ກ້າສະເໜີຄວາມຄິດເຫັນ ເພື່ອຮ່ວມກັນຄຸ້ມຄອງ ແລະ ແກ້ໄຂບັນຫາວຽກງານແຮ່ທາດໃຫ້ຖືກຕ້ອງ ຕາມທິດຊີ້ນຳຂອງພັກ ແລະ ລັດຖະບານ, ຮັບປະກັນການຄຸ້ມຄອງ, ນຳໃຊ້ ແລະ ອະນຸລັກຊັບພະຍາກອນແຮ່ທາດໃຫ້ມີປະສິດທິຜົນ, ຍືນຍົງ ແລະ ຖືກຕ້ອງຕາມກົດໝາຍ.
ກອງປະຊຸມໄດ້ຮັບຟັງການເຜີຍແຜ່ ເອກະສານສຳຄັນປະກອບມີ: ຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 11/ຄລສພ ລົງວັນທີ 07 ພຶດສະພາ 2026 ວ່າດ້ວຍການເພີ່ມທະວີການຊີ້ນຳຂອງຄະນະພັກຕໍ່ວຽກງານແຮ່ທາດ, ການຄຸ້ມຄອງ ແລະ ການແກ້ໄຂບັນຫາຫຍໍ້ທໍ້ດ້ານຊັບພະຍາກອນທຳມະຊາດ; ຄຳສັ່ງຂອງນາຍົກລັດຖະມົນຕີ ສະບັບເລກທີ 06/ນຍ ລົງວັນທີ 07 ມີນາ 2025 ວ່າດ້ວຍການຕິດຕາມ, ກວດກາ ແລະ ແກ້ໄຂບັນຫາແຮ່ຄຳຕົກຂ້ອນ, ຫີນ ແລະ ຊາຍ ຕາມບັນດາສາຍນ້ຳ, ຮ່ອງຫ້ວຍ ແລະ ຄຳສັ່ງຂອງນາຍົກລັດຖະມົນຕີ ສະບັບເລກທີ 46/ນຍ ລົງວັນທີ 13 ເມສາ 2026 ວ່າດ້ວຍການຕ້ານ ແລະ ສະກັດກັ້ນ ການລັກລອບຂຸດຄົ້ນ, ປຸງແຕ່ງ, ເກັບຊື້-ຂາຍ, ນຳເຂົ້າ-ສົ່ງອອກແຮ່ທາດ ແລະ ຜະລິດຕະພັນແຮ່ທາດຕ່າງໆ ທີ່ບໍ່ຖືກຕ້ອງຕາມລະບຽບກົດໝາຍ ແລະ ລະບຽບການ ໃນຂອບເຂດທົ່ວປະເທດ.
ນອກຈາກນັ້ນ, ບັນດາຜູ້ເຂົ້າຮ່ວມຍັງໄດ້ພ້ອມກັນຄົ້ນຄວ້າ, ປຶກສາຫາລື ແລະ ແລກປ່ຽນຄວາມຄິດເຫັນ ເພື່ອນຳເອົາເນື້ອໃນຂອງຄຳສັ່ງດັ່ງກ່າວໄປຜັນຂະຫຍາຍ ແລະ ປັບໃຊ້ໃນການຄຸ້ມຄອງ, ກວດກາ ແລະ ແກ້ໄຂບັນຫາດ້ານແຮ່ທາດໃນທ້ອງຖິ່ນ ໃຫ້ມີປະສິດທິຜົນ.
ຂ່າວ : ມະນີວັນ
ຄໍາເຫັນ