ຄຳ​ປຽບ​ທຽບ​ທີ່​ມີ​ຊີ​ວິດ​ຊີ​ວາ​ຂອງ​ທ່ານ ​ສີ​ຈິ້ນ​ຜິງ ​ກ່ຽວ​ກັບ​ການ​ຄຸ້ມ​ຄອງ​ການ​ໃຊ້​ອຳ​ນາດ

ທ່ານ ສີຈິ້ນຜິງ ຍັງເນັ້ນໜັກຕື່ມວ່າ: “ອຳນາດເປັນມີດສອງຄົມ, ທາດແທ້ຂອງການສໍ້ລາດບັງຫຼວງກໍແມ່ນການໃຊ້ອຳນາດເກີນຂອບເຂດ, ຕ້ອງຕໍ່ສູ້ຕີເອົາຊະນະການສໍ້ລາດບັງຫຼວງແບບເສຍບໍ່ໄດ້ ແລະ ເດັດຂາດບໍ່ໃຫ້ເສຍໃນບັ້ນນີ້.” ສະນັ້ນ, ຕ້ອງເຮັດໃຫ້ອຳນາດປະຕິບັດງານຢ່າງເປັນລະບຽບແບບແຜນໃນນີ້ຈຸດສຳຄັນກໍແມ່ນການຄຸ້ມຄອງການໃຊ້ອຳນາດ.

“ຂັງອຳນາດຢູ່ໃນໂກງແຫ່ງລະບຽບການ”

ທ່ານສີຈິ້ນຜິງໄດ້ຊີ້ໃຫ້ເຫັນວ່າ: “ຖ້າບໍ່ມີລະບຽບການທີ່ສົມບູນ, ອຳນາດບໍ່ໄດ້ຖືກຂັງຢູ່ໃນໂກງແຫ່ງລະບຽບການ, ປະກົດການສໍ້ລາດບັງຫຼວງກໍຈະບໍ່ສາມາດຖືກຄວບຄຸມໄວ້ໄດ້.” “ການຂັງອຳນາດຢູ່ໃນໂກງແຫ່ງລະບຽບການກໍແມ່ນຕ້ອງກຳນົດອຳນາດ, ສ້າງລະບຽບແບບແຜນດ້ານອຳນາດ, ຜູກມັດອຳນາດ, ຕິດຕາມກວດກາອຳນາດຕາມກົດໝາຍ.”

ທ່ານ ສີຈິ້ນຜິງ ຖືເອົາຄຳວ່າ “ໂກງ” ມາປຽບທຽບລະບຽບການ, ຈຸດປະສົງກໍເພື່ອເນັ້ນໜັກເຖິງກຳລັງຜູກມັດຂອງລະບຽບການທີ່ມີຕໍ່ອຳນາດ ໂດຍສະເພາະແມ່ນການໃຊ້ອຳນາດເກີນຂອບເຂດ.

ໃນເວລາກ່າວຄຳປາໄສຕໍ່ກອງປະຊຸມຄັ້ງນີ້, ທ່ານ ສີຈິ້ນຜິງ ໄດ້ເນັ້ນໜັກວ່າ: “ຕ້ອງປັບປຸງລະບຽບການໃຫ້ສົມບູນຢ່າງບໍ່ຢຸດຢັ້ງ, ເຮັດໃຫ້ລະບຽບການຮັດກຸມແຕ່ບໍ່ສະຫຼັບສັບຊ້ອນ, ມີປະສິດທິຜົນ ແລະ ນຳໃຊ້ເປັນປະໂຫຍດໄດ້.”

ຍົກຕົວຢ່າງ, ການສ້າງ ແລະ ຈັດຕັ້ງປະຕິບັດກົດເຫຼັກ 8 ຂໍ້ ຂອງສູນກາງພັກກອມມູນິດຈີນເປັນຕົວແບບແຫ່ງການແກ້ໄຂບັນຫາການຄຸ້ມຄອງການໃຊ້ອຳນາດຕາມລະບຽບການ. ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນເມື່ອປີ 2012ເປັນຕົ້ນມາ, ສູນກາງພັກທີ່ມີສະຫາຍ ສີຈິ້ນຜິງ ເປັນແກນນຳໄດ້ວາງກົດເຫຼັກ 8 ຂໍ້ຂອງສູນກາງພັກ, ຢຶດໝັ້ນການສ້າງກົດເຫຼັກ, ເພີ່ມທະວີການເຂັ້ມງວດໃນການຜູກມັດ, ຊຸກຍູ້ໃຫ້ແບບແຜນຂອງພັກ, ແບບແຜນການປົກຄອງ ແລະ ແບບແຜນສັງຄົມເກີດມີການປ່ຽນແປງຢ່າງໃໝ່ອ່ຽມ.

ຫຼັງຈາກກົດເຫຼັກ 8 ຂໍ້ຂອງສູນກາງພັກວາງອອກແລ້ວ, ພັກກອມມູນິດຈີນໄດ້ເຜີຍແຜ່ຫຼັກມາດຖານການສ້າງຄວາມປອດໃສຂາວສະອາດ ແລະ ເຂັ້ມງວດວິໄນຂອງພັກກອມມູນິດຈີນ, ປັບປຸງກົດຂໍ້ກຳນົດລົງວິໄນຂອງພັກກອມມູນິດຈີນ ແລະ ອື່ນໆ, ໄດ້ສືບຕໍ່ອອກແຮງເຮັດໃຫ້ອຳນາດຖືກປະຕິບັດງານຢ່າງເປັນລະບຽບແບບແຜນ, ສ້າງລະບຽບການໃຫ້ນັບມື້ນັບຮັດກຸມຕື່ມອີກ.

ພະລັງຊີວິດຂອງລະບຽບການຢູ່ນຳການປະຕິບັດ, ການຊຸກຍູ້ຈັດຕັ້ງປະຕິບັດລະບຽບການໃຫ້ເປັນຮູບປະທຳແມ່ນຖືເອົາການຜູກມັດອຳນາດດ້ວຍລະບຽບການເປັນພື້ນຖານ.

ແຕ່ເດືອນມັງກອນ ຫາ ເດືອນພະຈິກປີ 2025, ທົ່ວປະເທດຈີນໄດ້ກວດກາ ແລະ ແກ້ໄຂປະກົດການຫຍໍ້ທໍ້ ແລະ ບັນຫາການສໍ້ລາດບັງຫຼວງທີ່ເກີດຂຶ້ນຢູ່ອ້ອມຂ້າງໂຕປະຊາຊົນຈຳນວນ 840,000 ຄະດີ, ສາມາດກູ້ຄືນໂດຍກົງ ຫຼື ຊຸກຍູ້ການກູ້ຄືນຊັບສິນມູນຄ່າ 66.62 ຕື້ຢວນໃຫ້ແກ່ປະຊາຊົນ ຊຶ່ງສະແດງໃຫ້ເຫັນວ່າ ລະບົບລະບຽບການນັບມື້ນັບມີຄວາມຮັດກຸມຂຶ້ນຕື່ມ.

“ເຮັດໃຫ້ອຳນາດປະຕິບັດງານຢູ່ໃຕ້ແສງແດດ”

ທ່ານ ສີຈິ້ນຜິງ ໄດ້ຊີ້ໃຫ້ເຫັນຢ່າງຈະແຈ້ງວ່າ: “ຖ້າບໍ່ມີການຕິດຕາມກວດກາອຳນາດຈະພາໃຫ້ເກີດການສໍ້ລາດບັງຫຼວງຢ່າງແນ່ນອນ, ນີ້ຄືກົດເກນຕາຍໂຕຂໍ້ໜຶ່ງ.”

ຕໍ່ກັບເລື່ອງນີ້, ໃນເວລາກ່າວຄຳປາໄສຕໍ່ກອງປະຊຸມຄັ້ງນີ້, ທ່ານ ສີຈິ້ນຜິງ ໄດ້ຖືເອົາແສງແດດເປັນຄຳປຽບທຽບໂດຍເນັ້ນໜັກອີກເທື່ອໜຶ່ງວ່າ: “ຕ້ອງຍົກສູງຄວາມໂປ່ງໃສຂອງວຽກງານພັກ ແລະ ລັດຕື່ມອີກ, ເຮັດໃຫ້ອຳນາດປະຕິບັດງານຢູ່ໃຕ້ແສງແດດ.”

ເບິ່ງຈາກດ້ານການຄຸ້ມຄອງ, ການກວດກາຂອງລັດເປັນການຕິດຕາມກວດກາອຳນາດແຫ່ງລັດໂດຍກົງທີ່ສຸດ ແລະ ມີປະສິດທິຜົນທີ່ສຸດ.

ວັນທີ 20 ມີນາ 2018, ກອງປະຊຸມຄັ້ງທີໜຶ່ງຂອງສະພາປະຊາຊົນແຫ່ງຊາດຈີນຊຸດທີ 13 ໄດ້ຄົ້ນຄວ້າພິຈາລະນາ ແລະ ຜ່ານຮັບຮອງກົດໝາຍວ່າດ້ວຍການກວດກາສາທາລະນະລັດປະຊາຊົນຈີນຢ່າງເປັນທາງການ ໂດຍຈັດເອົາຄະນະກຳມະການກວດກາເຂົ້າໃນຂອບລັດຖະທຳມະນູນ ແລະ ກົດໝາຍ ຊຶ່ງສາມາດແກ້ໄຂບັນຫາຄົງຄ້າງໃນໄລຍະຍາວຂອງຈີນຄື“ການຕິດຕາມກວດກາພາຍໃນອົງການດຽວ” ແລະ ຈະມີຜົນດີຕໍ່ການຍົກສູງບົດບາດ ແລະ ປະສິດທິຜົນຂອງການຕິດຕາມກວດກາອຳນາດ, ສ້າງລະບົບກວດກາແຫ່ງລັດທີ່ລວມສູນເປັນເອກະພາບ, ມີຄວາມສັກສິດ ແລະ ມີປະສິດທິພາບສູງ.

ເບິ່ງໃນດ້ານການປົກຄອງບໍລິຫານ, ການບູລະນະກົນໄກສືບຫາຄວາມຮັບຜິດຊອບຕໍ່ການໃຊ້ອຳນາດຈະສາມາດຍົກສູງຄວາມໂປ່ງໃສດ້ານການປະຕິບັດງານຂອງອຳນາດ, ຮັບປະກັນໃຫ້ຂະບວນການປະຕິບັດງານຂອງອຳນາດສາມາດສືບຫາຄືນ ແລະ ກວດກາໄດ້.

ນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 18 ຂອງພັກກອມມູນິດຈີນເມື່ອປີ2012 ເປັນຕົ້ນມາ, ສູນກາງພັກກອມມູນິດຈີນໄດ້ຄົ້ນຄວ້າພິຈາລະນາ ແລະ ຮັບຮອງເອົາກົດຂໍ້ກຳນົດວ່າດ້ວຍການຕິດຕາມກວດກາພາຍໃນພັກກອມມູນິດຈີນ, ເຜີຍແຜ່ກົດຂໍ້ກຳນົດສືບຫາຄວາມຮັບຜິດຊອບພັກກອມມູນິດຈີນ ແລະ ອື່ນໆ, ໄດ້ປັບປຸງ ແລະ ບູລະນະວິທີການປະຕິບັດທີ່ບໍ່ຖືກຕ້ອງໃນການສືບຫາຄວາມຮັບຜິດຊອບດ້ານການໃຊ້ອຳນາດຕື່ມອີກ, ສາມາດເຮັດໄດ້ຕາມຫຼັກການ “ມີອຳນາດຕ້ອງມີຄວາມຮັບຜິດຊອບ, ການໃຊ້ອຳນາດຕ້ອງຖືກຕິດຕາມກວດກາ, ລະເຫຼີງໜ້າທີ່ຕ້ອງສືບຫາຄວາມຮັບຜິດຊອບ, ກະທຳຜິດກົດ ໝາຍຕ້ອງສືບສວນ-ສອບສວນ ລົງໂທດ.”

ສິ່ງສຳຄັນຂອງການປະຕິວັດໂດຍຕົນເອງຂອງພັກແມ່ນຢູ່ນຳການຄຸ້ມຄອງການໃຊ້ອຳນາດ. ປີ 2026 ເປັນປີເລີ່ມຕົ້ນປະຕິບັດແຜນພັດທະນາເສດຖະກິດສັງຄົມແຫ່ງຊາດ 5 ປີຄັ້ງທີ 15 ຂອງຈີນ, ທ່ານ ສີຈິ້ນຜິງ ໄດ້ກ່າວຢ່າງຈະແຈ້ງເຖິງຄວາມຕັດສິນໃຈຢ່າງເດັດດ່ຽວຂອງພັກກອມມູນິດຈີນໃນການປະຕິວັດໂດຍຕົນເອງ, ມີປະກົດການສໍ້ລາດບັງຫຼວງຕ້ອງຕໍ່ຕ້ານຢ່າງເດັດດ່ຽວ, ມີພຶດຕິກຳຍັກຍອກຊັບສິນຕ້ອງປາບປາມແນ່ນອນ ແລະ ກຳຈັດກຸ່ມແກ້ງອາຊະຍາກຳຢ່າງເຖິງຖອງ, ເພິ່ນຮຽກຮ້ອງໃຫ້ຂັງອຳນາດຢູ່ໃນໂກງແຫ່ງລະບຽບການຢ່າງມີວິທະຍາສາດ ແລະ ມີປະສິດທິຜົນຫຼາຍກວ່າເກົ່າ, ຊຸກຍູ້ການຕໍ່ສູ້ຕ້ານການສໍ້ລາດບັງຫຼວງຢ່າງມີສະຕິ ແລະ ເດັດດ່ຽວໜຽວແໜ້ນກວ່າເກົ່າ, ເພື່ອສະໜອງສິ່ງຄ້ຳປະກັນອັນເຂັ້ມແຂງໃຫ້ແກ່ການບັນລຸໜ້າທີ່ເປົ້າໝາຍໃນໄລຍະປະຕິບັດແຜນການ 5 ປີຄັ້ງທີ 15.