ຄຳ​ຖາມ-​ຕອບ ຢູ່ກ້ອງ​ຮົ່ມ​ຕົ້ນ​ຫວຍ​ບູ​ຮານ ​ທີ່ສ່ອງ​ແສງ​ເຖິງ​ຈິດໃຈ​ເພື່ອ​ປະ​ຊາ​ຊົນ

ຢູ່ໜ້າປະຕູເດີ່ນສຳນັກງານຫ້ອງການຄະນະພັກເມືອງເຈີ້ງຕິ້ງ ແຂວງເຫີເປີຍທາງພາກເໜືອຂອງຈີນ, ມີຕົ້ນຫວຍບູຮານສອງຕົ້ນ. ຄົນທັງຫຼາຍມັກໄປຊົ້ນຮົ່ມຢູ່ກ້ອງຕົ້ນໄມ້ມາແຕ່ເຫິງນານແຕ່ບໍ່ເຄີຍມີໃຜສຶກສາຄົ້ນຫາປະຫວັດຄວາມເປັນມາຂອງຕົ້ນໄມ້ສອງຕົ້ນນີ້.

ລະດູໃບໄມ້ປົ່ງປີ 1982, ທ່ານ ສີຈິ້ນຜິງ ຫາກໍດຳລົງຕຳແໜ່ງເປັນຮອງເລຂາພັກເມືອງເຈີ້ງຕິ້ງບໍ່ດົນກໍໄດ້ໃສ່ໃຈເຖິງຕົ້ນຫວຍບູຮານສອງຕົ້ນນີ້. ເພິ່ນຖາມຄົນຢູ່ອ້ອມຂ້າງວ່າ: “ ຕົ້ນຫວຍບູຮານສອງຕົ້ນນີ້ປູກມາຕັ້ງແຕ່ຕອນໃດ? ມີອາຍຸຫຼາຍປານໃດ? ”ແຕ່ບໍ່ມີໃຜຕອບໄດ້.

ຕໍ່ມາຊ່ຽວຊານຈາກພາກສ່ວນປ່າໄມ້ແຂວງມາວິເຄາະ ແລະ ຢືນຢັນແລ້ວພົບວ່າຕົ້ນຫວຍສອງຕົ້ນນີ້ມີອາຍຸຫຼາຍກວ່າ 600 ປີແລ້ວ.

ເມື່ອໄດ້ຮູ້ສະພາບດັ່ງກ່າວແລ້ວ, ທ່ານ ສີຈິ້ນຜິງ ຈຶ່ງໄດ້ຈັດໃຫ້ພະນັກງານຮີບອ້ອມຮົ້ວເຫຼັກພ້ອມທັງຕິດປ້າຍອະນຸລັກໃສ່ຕົ້ນຫວຍບູຮານໃນທັນທີ.

ເລີ່ມຈາກຕົ້ນຫວຍບູຮານສອງຕົ້ນນີ້, ເມືອງເຈີ້ງຕິ້ງ ໄດ້ດຳເນີນການສຳຫຼວດຕົ້ນໄມ້ບູຮານໃນທົ່ວເມືອງເປັນເທື່ອທຳອິດ. ເດືອນພະຈິກປີ 1982, ເມືອງເຈີ້ງຕິ້ງໄດ້ປະກາດລາຍຊື່ຕົ້ນໄມ້ບູຮານ ແລະ ຕົ້ນໄມ້ທີ່ມີຊື່ສຽງ, ໃນນີ້ຕົ້ນໄມ້ເກົ່າແກ່ທີ່ສຸດມີອາຍຸເຖິງ 1,400 ກວ່າປີແລ້ວ. ຕັ້ງແຕ່ນັ້ນມາ, ຕົ້ນໄມ້ບູຮານຂອງເມືອງເຈີ້ງຕິ້ງໄດ້ມີ “ບັດປະຈຳຕົວ” ແລະ ມີຄົນບົວລະບັດເປັນການສະເພາະ.

ທ່ານ ສີຈິ້ນຜິງ ເຫັນວ່າເມືອງເຈີ້ງຕິ້ງ ມີປະຫວັດສາດອັນຍາວນານເປັນໜ້າສຶກສາຄົ້ນຄວ້າທີ່ສຸດ. ເພິ່ນໄດ້ອ່ານປະຫວັດຂອງເມືອງ ແລະ ຂໍ້ມູນປະຫວັດສາດໃຫ້ເຂົ້າໃຈດີ, ໄປຍ່າງຕາມຖະໜົນທາງຮ່ອມຕ່າງໆເພື່ອສຳຫຼວດຮ່ອງຮອຍບູຮານສະຖານ. ຂໍພຽງແຕ່ເປັນສິ່ງທີ່ກ່ຽວຂ້ອງກັບການອະນຸລັກຮັກສາວັດຖຸບູຮານໃນເມືອງບູຮານ, ເພິ່ນກໍໄດ້ຈັດເຂົ້າໃນວາລະວຽກງານທັງໝົດ.

ທ່ານ ສີຈິ້ນຜິງ ເວົ້າວ່າ: “ຖ້າພວກເຮົາບໍ່ອະນຸລັກວັດຖຸບູຮານໃຫ້ດີ, ພວກເຮົາກໍມີຄວາມຜິດ, ກໍຈະລະອາຍໃຈຕໍ່ຄົນຮຸ່ນຫຼັງ.” ດ້ວຍຄວາມຮັບຜິດຊອບຕໍ່ປະຫວັດສາດແບບນີ້, ທ່ານ ສີຈິ້ນຜິງ ໄດ້ຄົ້ນຄິດຢ່າງເລິກເຊິ່ງກວ່າເກົ່າຕໍ່ການສ້າງ ແລະ ຈັດຕັ້ງປະຕິບັດທັດສະນະອັນຖືກຕ້ອງກ່ຽວກັບຜົນງານການບໍລິຫານ, ສ້າງຜົນງານເພື່ອປະຊາຊົນ.

ປີ 2002, ທ່ານ ສີຈິ້ນຜິງ ເຈົ້າແຂວງແຂວງຟູຈ້ຽນໃນເວລານັ້ນ ໄດ້ຂຽນຄຳນຳໃຫ້ປຶ້ມ “ເຮືອນບູຮານຟູໂຈ່ວ” ໂດຍມີເນື້ອໃນບາງຕອນລະບຸວ່າ: “ການພັດທະນາເສດຖະກິດຄືໜ້າທີ່ສຳຄັນຂອງຜູ້ເປັນການນຳ, ຂະນະທີ່ການອະນຸລັກຮັກສາສະຖາປັດຕະຍະກຳບູຮານ, ເຂດຖະໜົນດັ້ງເດີມ, ວັດຖຸບູຮານ, ເມືອງບູຮານໃຫ້ດີກໍເປັນໜ້າທີ່ສຳຄັນຂອງຜູ້ເປັນການນຳເຊັ່ນກັນ, ທັງສອງຢ່າງນີ້ມີຄວາມສຳຄັນເທົ່າທຽມກັນ.”

ທ່ານ ສີຈິ້ນຜິງ ເຫັນວ່າ: ການສ້າງທັດສະນະອັນຖືກຕ້ອງກ່ຽວກັບຜົນງານການບໍລິຫານກໍຄື “ບໍ່ພຽງແຕ່ຕ້ອງເຮັດວຽກຕົວຈິງທີ່ປະຊາຊົນເຫັນໄດ້, ຈັບບາຍໄດ້ ແລະ ໄດ້ຮັບຜົນປະໂຫຍດຕົວຈິງເທົ່ານັ້ນ, ຍັງຕ້ອງເຮັດເລື່ອງດີທີ່ສ້າງພື້ນຖານ ແລະ ມີຜົນດີຕໍ່ການພັດທະນາທີ່ຍາວນານໃຫ້ແກ່ຄົນຮຸ່ນຫຼັງ”.

ບໍ່ວ່າຈະເປັນການປະຕິເສດສຽງຄັດຄ້ານທັງຫຼາຍຢ່າງສຸດຂີດເພື່ອສັ່ງໂຈະການພັດທະນາດ້ານການຄ້າຢູ່ເຮືອນເກົ່າຂອງທ່ານ ຫຼິນເຈມິນ ນັກປະຕິວັດປະຊາທິປະໄຕທີ່ມີຊື່ສຽງຂອງຈີນ, ຊຸກຍູ້ການປະຕິບັດໂຄງການອະນຸສອນສະຖານເຮືອນເກົ່າຂອງທ່ານ ຫຼິນເຈມິນ ໂດຍແຂວນປ້າຍອະນຸລັກຢ່າງເປັນທາງການຢູ່ນະຄອນຟູໂຈ່ວ ແຂວງຟູຈ້ຽນ ຫຼື ການໄປສຳຫຼວດຄົ້ນຄວ້າເພື່ອເກັບກຳຂໍ້ມູນຢູ່ຮ່ອງຮອຍບູຮານສະຖານຫຼຽງຈູ ແຂວງເຈີ້ຈ່ຽງ, ໂດຍໄດ້ສັ່ງປິດບໍ່ຫີນຢູ່ບໍລິເວນອ້ອມຂ້າງ ແລະ ຊຸກຍູ້ການຮ້ອງຂໍສະເໜີເອົາຮ່ອງຮອຍບູຮານສະຖານດັ່ງກ່າວເຂົ້າເປັນມໍລະດົກໂລກ. ຕອນເຮັດວຽກຢູ່ແຂວງຟູຈ້ຽນ ແລະ ແຂວງເຈີ້ຈ່ຽງ, ທ່ານ ສີຈິ້ນຜິງ ລ້ວນແຕ່ໄດ້ອອກແຮງສຸດຂີດເພື່ອຊຸກຍູ້ການປົກປັກຮັກສາວັດຖຸບູຮານປະຫວັດສາດຢ່າງສະເໝີຕົ້ນສະເໝີປາຍ.

ປີ 2016, ທ່ານ ສີຈິ້ນຜິງ ທີ່ຂຶ້ນເປັນຜູ້ນຳສູງສຸດຂອງພັກ ແລະ ລັດແລ້ວນັ້ນໄດ້ມີຄຳຊີ້ນຳສຳຄັນຕໍ່ວຽກງານວັດຖຸບູຮານ, ທ່ານໄດ້ຮຽກຮ້ອງຢ່າງຈະແຈ້ງວ່າ: “ຄະນະພັກ ແລະ ອົງການປົກຄອງທຸກຂັ້ນຕ້ອງເພີ່ມຄວາມເຄົາລົບຢຳເກງຕໍ່ວັດຖຸບູຮານທາງປະຫວັດສາດ, ສ້າງແນວຄິດວິທະຍາສາດທີ່ວ່າ ການອະນຸລັກວັດຖຸບູຮານກໍແມ່ນຜົນງານການບໍລິຫານ.”

ຫຼາຍປີຜ່ານມານີ້, ຈີນໄດ້ຊຸກຍູ້ການປະຕິບັດໂຄງການອະນຸລັກວັດຖຸບູຮານສຳຄັນຕ່າງໆເຊັ່ນ: ການອະນຸລັກຮູບແຕ້ມຝາພະໜັງເມືອງຕຸ່ນຫວງ ແຂວງກ່ານຊູ້ ດ້ວຍເຕັກນິກດີຈີຕອນ, ການປະຕິສັງຂອນກຳແພງເມືອງບູຮານນະຄອນຊີ່ອ່ານ ແຂວງສ້ານຊີ, ຜົນການຂຸດຄົ້ນບູຮານນະຄະດີຢ່າງຕໍ່ເນື່ອງຢູ່ຮ່ອງຮອຍບູຮານສະຖານຢິ່ນຊວີ່ ນະຄອນອ່ານຢາງ ແຂວງເຫີນານ, ຜົນການຄົ້ນພົບທີ່ໜ້າອັດສະຈັນຢູ່ຂຸມຝັງເຄື່ອງບູຊາຂອງຮ່ອງຮອຍບູຮານສະຖານສ່ານຊິງຕຸ່ຍແຂວງເສສວນ ແລະ ອື່ນໆ ຜົນງານການຂຸດຄົ້ນບູຮານຄະດີທຸກຄັ້ງຜ່ານມານີ້ຕ່າງກໍເປັນສິ່ງອັດຈະຈັນ ແລະ ປະຈັກຕາຕໍ່ຊາວໂລກ.

ການຕັ້ງຄຳຖາມຢູ່ກ້ອງຮົ່ມຕົ້ນຫວຍບູຮານເມືອງເຈີ້ງຕິ້ງເມື່ອ 40 ກວ່າປີກ່ອນໄດ້ສະທ້ອນໃຫ້ເຫັນວ່າທ່ານ ສີຈິ້ນຜິງ ໃນໄວໜຸ່ມທີ່ມີຄວາມເຄົາລົບຢຳເກງຕໍ່ປະຫວັດສາດ ແລະ ມີຄວາມຖະໜອມຮັກຕໍ່ວັດຖຸບູຮານ.

ບົດໂດຍ: ວິທະຍຸໂທລະພາບສູນກາງຈີນ (CMG)