ກອງປະຊຸມຄັ້ງນີ້, ເພື່ອໂຄສະນາເຜີຍແຜ່ນະໂຍບາຍ ແລະ ບັນດາສັນຍາ, ອະນຸສັນຍາ, ກົດໝາຍຊາຍແດນ ແລະ ລະບຽບຫຼັກການຕ່າງໆ ໃຫ້ພະນັກງານກໍາລັງປະຈໍາການ, ນາຍບ້ານແບບຢ່າງດີເດັ່ນຊາຍແດນ ລາວ-ຫວຽດນາມ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ, ຖືກຕ້ອງ ທັງເປັນການຍົກສູງຄວາມຮັບຜິດຊອບເຂົ້າໃນການປົກປັກຮັກສາ, ຄຸ້ມຄອງເສັ້ນຊາຍແດນ, ຫຼັກໝາຍຊາຍແດນ, ການຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ສົ່ງເສີມການຊ່ວຍເຫຼືອເຊິ່ງກັນ ແລະ ກັນ. ນີ້ເປັນການຮັດແໜ້ນຄວາມສາມັກຄີ, ຢັ້ງຢືນທັດສະນະແນວທາງສະເໝີຕົ້ນສະເໝີປາຍ ຂອງສອງພັກ-ສອງລັດ ໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລາວ-ຫວຽດນາມ ໃຫ້ຍືນຍົງທະນົງແກ່ນຊົ່ວກາລະນານ.
 |
ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງ ແລະ ແລກປ່ຽນຄໍາຄິດເຫັນຢ່າງກົງໄປກົງມາ ໃນ 5 ຫົວຂໍ້ສໍາຄັນຄື:
1) ສະພາບຄວາມສະຫງົບ ແລະ ຄວາມເປັນລະບຽບຮຽບຮ້ອຍຢູ່ບໍລິເວນຊາຍແດນ;
2) ພາລະບົດບາດ, ຄວາມໝາຍສໍາຄັນຂອງແນວໂຮມບ້ານ ແລະ ນາຍບ້ານ ໃນວຽກງານເຜີຍແຜ່ລະບຽບກົດໝາຍຊາຍແດນ;
3) ວຽກງານສັນຊາດ ແລະ ສໍາມະໂນຄົວຂອງປະຊາຊົນ ຕາມບໍລິເວນຊາຍແດນ;
4) ສະພາບລວມຂອງວຽກງານຊາຍແດນ ແລະ ການພົວພັນຮ່ວມມືລະຫວ່າງ ລາວ-ຫວຽດນາມ ໃນໄລຍະໃໝ່;
5) ລະບຽບການເຂົ້າ-ອອກເມືອງ, ການຄ້າຂາຍແລກປ່ຽນສິນຄ້າຜ່ານຊາຍແດນ ແລະ ບັນຫາທີ່ຄວນເອົາໃຈໃສ່ສໍາລັບປະຊາຊົນບໍລິເວນຊາຍແດນ.
 |
ໃນໂອກາດນີ້, ຜູ້ແທນກອງປະຊຸມ ໄດ້ຮັບຟັງການລາຍງານບົດຮຽນຕົວຈິງ ຈາກຕາງໜ້ານາຍບ້ານແບບຢ່າງດີເດັ່ນສອງຝາກຊາຍແດນ ລາວ-ຫວຽດນາມ ເພື່ອຮ່ວມກັນຖອດຖອນບົດຮຽນ, ປັບປຸງວຽກງານຄຸ້ມຄອງ ແລະ ປົກປັກຮັກສາເສັ້ນຊາຍແດນ ໃຫ້ມີປະສິດທິພາບ ໃຫ້ກາຍເປັນເສັ້ນຊາຍແດນມິດຕະພາບໝັ້ນຄົງຍາວນານ.
ໂດຍ: ກົມຊາຍແດນກະຊວງການຕ່າງປະເທດ
ຄໍາເຫັນ