 |
ທ່ານ ນາງ ສຸດທິລົມ ສຸລິວົງ ໄດ້ຫວນຄືນມູນເຊື້ອວັນແມ່ຍິງສາກົນ ຄົບຮອບ 116 ປີ ໂດຍຍົກໃຫ້ເຫັນເນື້ອໃນສຳຄັນກ່ຽວກັບປະຫວັດຄວາມເປັນມາຂອງວັນທີ 8 ມີນາ ຊຶ່ງມີຕົ້ນກຳເນີດມາຈາກການຕໍ່ສູ້ຂອງແມ່ຍິງກຳມະກອນທີ່ຖືກກົດຂີ່ຂູດຮີດຈາກລະບອບນາຍທຶນ ເພື່ອທວງເອົາສິດທິພື້ນຖານຄື: ຄ່າແຮງງານທີ່ເໝາະສົມ, ເວລາເຮັດວຽກ 8 ຊົ່ວໂມງຕໍ່ມື້, ສະຫວັດດີການ ແລະ ການເບິ່ງແຍງເມື່ອເຈັບປ່ວຍ ຫຼື ອອກລູກ.
ພາຍຫຼັງໄດ້ຮັບຮອງເອົາ ວັນທີ 8 ເດືອນມີນາ ເປັນວັນແມ່ຍິງສາກົນ ນັບແຕ່ນັ້ນມາ ຈົນເຖິງປັດຈຸບັນ ແມ່ນຄົບຮອບ 116 ປີ, ການສະເຫຼີມສະຫຼອງແຕ່ລະປີ ເປັນການລະນຶກເຖິງ ແມ່ຍິງທີ່ໄດ້ເສຍສະຫຼະຊີວິດຕົນເອງເພື່ອຊາວກໍາມະກອນໃນທົ່ວໂລກ. ຊຶ່ງໃນແຕ່ລະປີ ກໍໄດ້ຈັດກອງປະຊຸມຕ່າງໆ ເພື່ອປຶກສາຫາລື ກ່ຽວກັບວຽກງານແມ່ຍິງເປັນອັນສະເພາະ ແລະ ໄດ້ວາງຄໍາຂວັນເພື່ອສູ້ຊົນຈັດຕັ້ງປະຕິບັດໃຫ້ສໍາເລັດ ເປັນຕົ້ນ: ສົນທິສັນຍາແມ່ຍິງ ແລະ ເດັກນ້ອຍ, ການຕ້ານການໃຊ້ຄວາມຮຸນແຮງຕໍ່ແມ່ຍິງ, ເດັກຍິງ ແລະ ອື່ນໆ.
ສໍາລັບແຂວງຄໍາມ່ວນ, ພັກ ແລະ ລັດ ໄດ້ໃຫ້ຄວາມສຳຄັນຕໍ່ວຽກງານແມ່ຍິງ-ເດັກນ້ອຍສະເໝີມາ ໂດຍການສົ່ງເສີມຄວາມສະເໝີພາບຍິງ-ຊາຍ, ຍົກບົດບາດແມ່ຍິງໃຫ້ສູງຂຶ້ນ ແລະ ເປີດໂອກາດໃຫ້ແມ່ຍິງໄດ້ປະກອບສ່ວນໃນທຸກຂົງເຂດວຽກງານ.
(ຂ່າວ: ຄະນະສົ່ງເສີມ ແລະ ຄຸ້ມຄອງການລົງທຶນ ແຂວງຄໍາມ່ວນ)
ຄໍາເຫັນ