 |
ການພົບປະຢ້ຽມຢາມຄັ້ງນີ້, ຄະນະການນໍາແຂວງສາລະວັນ ໄດ້ຮັບຟັງການລາຍງານຈາກຄະນະບັນຊາການກອງພັນນ້ອຍຕີພິເສດ 459. ໄລຍະ 1 ປີຜ່ານມາ, ການຈັດຕັ້ງກໍາລັງ, ວຽກອົບຮົມຫັດແອບ, ວຽກງານພາລາທິການກັບທີ່, ການກໍ່ສ້າງ ແລະ ປັບປຸງເຄຫາສະຖານ, ການຝຶກຝົນພັດທະນາກໍາລັງຮົບ, ການປະຕິບັດພາລະກິດປ້ອງກັນຊາດ ແລະ ພາລະກິດການປ້ອງກັນຄວາມສະຫງົບປອດໄພໃນຂອບເຂດທ້ອງຖິ່ນ, ພ້ອມທັງການຮ່ວມມືກັບອົງການປົກຄອງທ້ອງຖິ່ນໃນການສົ່ງເສີມປ້ອງກັນຄວາມສະຫງົບປອດໄພ ໃນເຂດຮັບຜິດຊອບ ຊຶ່ງແຕ່ລະວຽກແມ່ນໄດ້ຮັບການຈັດຕັ້ງປະຕິບັດມີຜົນສຳເລັດເປັນກ້າວໆ.
 |
ທ່ານ ປະເດີມພອນ ສົນທະນີ ໄດ້ສະແດງຄວາມຊົມເຊີຍ ແລະ ກ່າວຄໍາອວຍພອນ ຕໍ່ຜົນງານອັນຍິ່ງໃຫຍ່ຂອງນາຍທະຫານ ແລະ ພົນທະຫານ ກອງພັນນ້ອຍຕີພິເສດ 459 ທີ່ໄດ້ຍຶດໝັ້ນອຸດົມການປະຕິວັດ, ຮັກຊາດ, ຮັກປະຊາຊົນ ແລະ ເສຍສະຫຼະ ໃນປະຕິບັດພາລະກິດທີ່ພັກ ແລະ ລັດມອບໝາຍ. ພ້ອມໄດ້ຍົກໃຫ້ເຫັນເຖິງການເຕີບໃຫ່ຍຂະຫຍາຍຕົວຂອງກອງທັບປະຊາຊົນລາວ ຕະຫຼອດໄລຍະ 77 ປີຜ່ານມາ; ກອງທັບປະຊາຊົນລາວ ໄດ້ຜ່ານຂະບວນການປະຕິວັດຊາດ, ການຕໍ່ສູ້ອັນຍາກລຳບາກ, ເສຍສະຫຼະເລືອດເນື້ອ ແລະ ຊີວິດຂອງທະຫານຜູ້ກ້າຫານຢ່າງຫຼວງຫຼາຍ ເພື່ອແລກເອົາເອກະລາດ ແລະ ຄວາມສະຫງົບສຸກມາສູ່ປະເທດຊາດ; ຄວາມກ້າຫານ, ຄວາມສັດຊື່, ຈົ່ງຮັກພັກດີ ແລະ ນໍ້າໃຈເສຍສະຫຼະ ເພື່ອສ່ວນລວມນັ້ນ ແມ່ນມໍລະດົກອັນລໍ້າຄ່າທີ່ກອງທັບປະຊາຊົນລາວໄດ້ສືບທອດມາເຖິງຄົນຮຸ່ນຫຼັງ ໃນໄລຍະເວລາແຫ່ງການພັດທະນາປະເທດຊາດ, ກອງທັບປະຊາຊົນລາວບໍ່ພຽງແຕ່ປະຕິບັດໜ້າທີ່ດ້ານການທະຫານເທົ່ານັ້ນ ແຕ່ຍັງມີບົດບາດສຳຄັນປະກອບສ່ວນໃນການພັດທະນາເສດຖະກິດ-ສັງຄົມ, ຊ່ວຍເຫຼືອປະຊາຊົນບັນດາເຜົ່າ, ປ້ອງກັນ ແລະ ແກ້ໄຂໃນຍາມເກີດວິກິດໄພພິບັດຕ່າງໆ, ການກໍ່ສ້າງບູລະນະເສັ້ນທາງ, ການກໍ່ສ້າງໂຮງຮຽນ, ສຸກສາລາ ແລະ ວຽກງານສາທາລະນະປະໂຫຍດອຶ່ນໆ ຢ່າງຕໍ່ເນື່ອງ. ຈາກນັ້ນ, ຄະນະການນໍາແຂວງ ຍັງໄດ້ມອບກະຕ່າຂອງຂວັນ, ຊີມັງ 2 ໂຕນ ແລະ ເງິນສົດ ຈໍານວນ 14 ລ້ານກີບ ເພື່ອເປັນກໍາລັງໃຈແກ່ນາຍ-ພົນທະຫານ ສືບຕໍ່ສ້າງກຳລັງທະຫານໃຫ້ເຕີບໃຫ່ຍເຂັ້ມແຂງ ແລະ ມີການພັດທະນາຢ່າງບໍ່ຢຸດຢັ້ງ.
(ພາບ-ຂ່າວ: ສ.ພະຈັນ)
ຄໍາເຫັນ