ໂອກາດນີ້ ທ່ານ ອານຸພາບ ວົງໜໍ່ແກ້ວ ໄດ້ແຈ້ງຈຸດປະສົງ ພ້ອມທັງປຶກສາຫາລື ການກະກຽມຄວາມພ້ອມ ກ່ຽວກັບແຜນການເຄື່ອນໄຫວວຽກງານ ແລະ ລົງຕິດຕາມ, ຊຸກຍູ້ການກະກຽມຄວາມພ້ອມທາງດ້ານພາກສະໜາມທຳລາຍລູກລະເບີດ ທີ່ແຂວງພະບາງ ເພື່ອຮັບປະກັນ ໃຫ້ແກ່ການຕ້ອນຮັບຄະນະຜູ້ແທນ ທີ່ຈະເດີນທາງມາຢ້ຽມຢາມ ໃນໄລຍະເຂົ້າຮ່ວມກອງປະຊຸມທົບທວນສົນທິສັນຍາ ວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3 ຊຶ່ງຈະຈັດຂຶ້ນຢູ່ນະຄອນຫຼວງວຽງຈັນ ໃນເດືອນກັນຍາຈະມາເຖິງນີ້, ແນໃສ່ໃຫ້ມີຄວາມພ້ອມຮອບດ້ານ, ມີຄວາມລະບຽບຮຽບຮ້ອຍ ແລະ ບັນລຸຜົນສຳເລັດຕາມຄາດໝາຍ.
ທ່ານ ນາງ ວຽນວິໄລ ດີລະພັນ ໄດ້ສະແດງຄວາມ ຍິນດີຕ້ອນຮັບ ແລະ ເຫັນດີຕໍ່ ແຜນການເຄື່ອນໄຫວວຽກງານ, ພ້ອມທັງ ສະເໜີໃຫ້ບັນດາອະນຸກຳມະການ ກໍຄືຂະແໜງການທີ່ກ່ຽວຂ້ອງອ້ອມຂ້າງແຂວງ ຕ້ອງເພີ່ມທະວີຄວາມຮັບຜິດຊອບ ເຂົ້າໃນການເອົາໃຈໃສ່ຈັດຕັ້ງປະຕິບັດວຽກງານ ຕາມພາລະບົດບາດຢ່າງເຄັ່ງຄັດ, ເປັນເຈົ້າການໃນການກະກຽມຄວາມພ້ອມຮອບດ້ານ ເປັນຕົ້ນ ວຽກງານການຮັກສາຄວາມສະຫງົບ-ຄວາມເປັນລະບຽບຮຽບຮ້ອຍ, ການປະດັບປະດາເອ້ຢ້ອງຕົວເມືອງ, ການກະກຽມສະຖານທີ່, ທີ່ພັກ, ພາຫະນະ ແລະ ພິທີການຕ້ອນຮັບ ໃຫ້ມີຄວາມລະອຽດ, ຈົບງາມ ແລະ ສົມກຽດ ເພື່ອຮັບປະກັນໃຫ້ແກ່ການຕ້ອນຮັບຄະນະຜູ້ແທນ ທີ່ຈະເດີນທາງມາເຂົ້າຮ່ວມກອງປະຊຸມລະດັບສາກົນໃນຄັ້ງນີ້ ດຳເນີນໄປດ້ວຍຜົນສຳເລັດຢ່າງຈົບງາມ. ພ້ອມນີ້, ໄດ້ມີການແລກປ່ຽນຄຳເຫັນ ຕໍ່ກັບວຽກງານການກະກຽມແຕ່ລະດ້ານ ເປັນຕົ້ນ ສະຖານທີ່ຈັດກອງປະຊຸມ, ການຮັກສາຄວາມປອດໄພ, ການອຳນວຍຄວາມສະດວກແຕ່ລະດ້ານ.
ຂ່າວ-ພາບ: ເພັດສາຄອນ ສີມມະວົງ
ຄໍາເຫັນ