ຄະນະນໍາກະຊວງປ້ອງກັນປະເທດຢ້ຽມຢາມ ແລະ ໂອ້ລົມພະນັກງານ-ນັກຮົບ ໂຮງໝໍສູນກາງ 103 ກອງທັບ

ໃນວັນທີ 16 ມັງກອນ ນີ້, ຄະນະນໍາກະຊວງປ້ອງກັນປະເທດຢ້ຽມຢາມ ແລະ ພົບປະໂອ້ລົມພະນັກງານ-ນັກຮົບ, ແພດໝໍໂຮງໝໍສູນກາງ 103 ກອງທັບ, ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ (20 ມັງກອນ 1949 - 20 ມັງກອນ 2024)ທີ່ຈະມາເຖິງຊຶ່ງນໍາໂດຍ ສະຫາຍ ພົນຕີ ປະສິດ ທ່ຽງທໍາ ກໍາມະການຄະນະປະຈໍາພັກກະຊວງປ້ອງກັນປະເທດ ຫົວໜ້າກົມໃຫຍ່ເຕັກນິກກອງທັບ ພ້ອມດ້ວຍຜູ້ຕາງໜ້າບັນດາກົມໃຫຍ່, ຫ້ອງວ່າການກະຊວງປ້ອງກັນປະເທດ, ກົມ ແລະ ຫ້ອງການ. ໂດຍການຕ້ອນຮັບຂອງ ສະຫາຍ ພັນເອກ ສະແຫວງໄຊ ດາລາສາດ ຫົວໜ້າການທະຫານໂຮງໝໍສູນກາງ 103 ກອງທັບ ພ້ອມຄະນະ.
 ສະຫາຍ ພົນຕີ ປະສິດ ທ່ຽງທໍາ ໄດ້ໂອ້ລົມ ແລະ ໄດ້ຍົກໃຫ້ເຫັນປະຫວັດຄວາມເປັນມາຂອງ 20 ມັງກອນໂດຍຫຍໍ້ວ່າ:ກ່ອນໜ້ານີ້ 75 ປີ, ຄືວັນທີ 20 ມັງກອນ 1949 ກອງລາດຊະວົງ ໄດ້ຮັບການສ້າງຕັ້ງຂຶ້ນຊຶ່ງເປັນຕົ້ນກຳເນີດຂອງກອງທັບປະຊາຊົນລາວ ໃນປັດຈຸບັນ, ໂດຍໄດ້ຮັບການສ້າງຕັ້ງຂຶ້ນຢູ່ເຂດທີ່ໝັ້ນຖ້ຳແມ, ເຂດລາວຮຸ່ງພຽງສາເມືອງຊຽງຄໍ້ແຂວງ ຫົວພັນ ໂດຍແມ່ນປະທານ ໄກສອນ ພົມວິຫານ ເປັນຜູ້ກໍ່ຕັ້ງ ແລະ ຊີ້ນໍາ-ບັນຊາໂດຍກົງ. ນັ້ນເປັນວັນແຫ່ງການເຕົ້າໂຮມບັນດາກອງກຳລັງປະກອບອາວຸດທີ່ໄດ້ສ້າງຕັ້ງຂຶ້ນໃນບໍລິເວນຕ່າງໆທົ່ວປະເທດ ເຂົ້າເປັນກອງທັບລາວອິດສະຫຼະຊຶ່ງແມ່ນເຫດການທີ່ມີຄວາມໝາຍສຳຄັນຄັ້ງໃຫຍ່ຫຼວງທີ່ສຸດທາງດ້ານການເມືອງໃນປະຫວັດສາດຂອງຊາດລາວເຮົາ, ແມ່ນບາດລ້ຽວປະຫວັດສາດໜ້າໃໝ່ແຫ່ງການຕໍ່ສູ້ກູ້ຊາດ ໂດຍມີກອງທັບທີ່ເປັນກຳລັງຫຼັກແຫຼ່ງ, ເປັນທີ່ເພິ່ງອີງຂອງປະຊາຊົນລາວບັນດາເຜົ່າໃນການດໍາເນີນການຕໍ່ສູ້ຕີຕ້ານກັບຈັກກະພັດຕ່າງດ້າວຜູ້ຮຸກຮານ ແລະ ລູກແຫຼ້ງຕີນມືຂາຍຊາດຊຶ່ງເປັນການຢັ້ງຢືນເຖິງການເຕີບໃຫຍ່ຂະຫຍາຍຕົວຂອງການປະຕິວັດລາວກ້າວສູ່ລະດັບສູງ. 
ຕະຫຼອດໄລຍະ 75 ປີ ແຫ່ງການຕໍ່ສູ້ ແລະ ເຄື່ອນໄຫວຢ່າງລຽນຕິດໃນເງື່ອນໄຂທີ່ຫຍຸ້ງຍາກລຳບາກ ແລະ ທຸລະກັນດານທີ່ສຸດນັ້ນ, ພາຍໃຕ້ການນຳພາຂອງພັກ, ບັນດາກຳລັງປະກອບອາວຸດປະຊາຊົນລາວ ໄດ້ເຮັດສໍາເລັດພາລະກິດປະຕິວັດອັນຍິ່ງໃຫຍ່ ແລະ ໜັກໜ່ວງທີ່ພັກມອບໝາຍໃຫ້ຢ່າງສະຫງ່າງາມ, ສ້າງຜົນງານອັນດີເດັ່ນ, ວິລະກຳອັນລ້ຳເລີດປະດັບໄວ້ໃນໜ້າປະຫວັດສາດຂອງຊາດຢ່າງສົມກຽດ, ສ້າງມູນເຊື້ອອັນດີງາມຫຼາຍປະການໄວ້ໃຫ້ແກ່ກໍາລັງປະກອບອາວຸດປະຕິວັດ. ສົມແລ້ວທີ່ເປັນກອງທັບວິລະຊົນຂອງຊາດລາວວິລະຊົນ, ຊຶ່ງໄດ້ຮັບຄໍາສັນລະເສີນຈາກພັກ ແລະ ລັດ ວ່າ: “ກອງທັບຍາມໃດກໍນຳໜ້າໃນທຸກວຽກງານ, ເດັດດ່ຽວຜ່ານຜ່າທຸກອຸປະສັກ, ຕີເອົາຊະນະສັດຕູທຸກໂຕ, ສຳເລັດທຸກໜ້າທີ່, ສົມເປັນກໍາລັງແກ່ນສານທີ່ເຂັ້ມແຂງຂອງການປະຕິວັດ, ເປັນເຄື່ອງມືອັນແຫຼມຄົມຂອງພັກ".
 ໂອກາດນີ້, ສະຫາຍ ພົນຕີ ປະສິດ ທ່ຽງທໍາ ຍັງໄດ້ແນະນຳໃຫ້ຄະນະພັກ-ຄະນະອຳນວຍການໂຮງໝໍສູນກາງ 103 ກອງທັບ ພ້ອມກັນສຸມໃສ່ປັບປຸງກໍ່ສ້າງກຳລັງໃນທຸກດ້ານໃຫ້ມີຄຸນນະພາບ ແລະ ມີການຫັນປ່ຽນຢ່າງເດັ່ນຊັດ, ສຶກສາອົບຮົມການເມືອງ-ແນວຄິດເຮັດໃຫ້ສະມາຊິກພັກ, ພະນັກງານ, ນັກຮົບ, ແພດໝໍທຸກຄົນເຊື່ອມຊຶມ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງພັກ ກໍຄືມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກກະຊວງປ້ອງກັນປະເທດວາງອອກໃຫ້ປະກົດເປັນຈິງ; ເອົາໃຈໃສ່ສຶກສາອົບຮົມໃຫ້ທຸກຄົນເສີມຂະຫຍາຍທາດແທ້ມູນເຊື້ອຂອງພັກ, ຂອງຊາດ, ຂອງກອງທັບ (ເປັນຕົ້ນ 8 ມູນເຊື້ອຂອງກອງທັບ) ແລະ ມູນເຊື້ອຂອງເຫຼົ່າຮົບ, ຂອງກົມກອງໃຫ້ເລິກເຊິ່ງຕົວຈິງ; ສ້າງກົມກອງໃຫ້ມີແນວຄິດການເມືອງໜັກແໜ້ນ, ມີນໍ້າໃຈເສຍສະຫຼະອັນສູງສົ່ງເພື່ອປະເທດຊາດ, ເພື່ອປະຊາຊົນ ແລະ ພ້ອມກັນເຮັດສໍາເລັດໜ້າທີ່ຢ່າງຈົບງາມ.
 ພ້ອມກັນນັ້ນ, ສະຫາຍ ພົນຕີ ປະສິດ ທ່ຽງທໍາ ພ້ອມຄະນະ ຍັງໄດ້ລົງຢ້ຽມຢາມ ແລະ ມອບວັດຖຸປັດໄຈຈໍານວນໜຶ່ງໃຫ້ພະນັກງານທະຫານທີ່ນອນປິ່ນປົວຢູ່ໂຮງໝໍສູນກາງ 103 ກອງທັບ ແລະ ມອບໃຫ້ໂຮງໝໍສູນກາງ 103 ກອງທັບຕື່ມອີກ.
ຂ່າວ-ພາບ:ໜັງສືພິມກອງທັບ