ຮອງຫົວໜ້າອົງການໄອຍະການປະຊາຊົນສູງສຸດ ພ້ອມຄະນະ ໄດ້ເຄື່ອນໄຫວຊຸກຍູ້ວຽກງານໄອຍະການປະຊາຊົນ ຢູ່ແຂວງບໍລິຄຳໄຊ.
ໃນການເຄື່ອນໄຫວດັ່ງກ່າວ, ທ່ານ ຄໍາເພັດ ສົມວໍລະຈິດ ພ້ອມຄະນະ ໄດ້ເຂົ້າພົບ ທ່ານ ສອນທະນູ ທໍາມະວົງ ກໍາມະການສູນກາງພັກ ເລຂາພັກແຂວງ ເຈົ້າແຂວງບໍລິຄໍາໄຊ ເພື່ອລາຍງານຈຸດປະສົງຂອງການລົງເຄື່ອນໄຫວຊຸກຍູ້ວຽກງານຢູ່ແຂວງບໍລິຄຳໄຊໃນຄັ້ງນີ້.
ຈາກນັ້ນ, ທ່ານຮອງ ອອປສ ໄດ້ພົບປະສະມາຊິກພັກ-ພະນັກງານຫຼັກແຫຼ່ງຂອງອົງການໄອຍະການປະຊາຊົນແຂວງ ແລະ ອົງການໄອຍະການປະຊາຊົນເຂດ1 ແຂວງບໍລິຄຳໄຊ ແລະໄດ້ຮັບການລາຍງານ ຂອງທ່ານຫົວໜ້າອົງການໄອຍະການປະຊາຊົນແຂວງບໍລິຄຳໄຊ ກ່ຽວກັບການຈັດຕັ້ງປະຕິບັດວຽກງານໃນໄລຍະຜ່ານມາ ແລະ ທິດທາງແຜນການວຽກງານຈຸດສຸມທ້າຍປິ 2024. ໃນໂອກາດທີ່ມີຄວາມໝາຍຄວາມສຳຄັນນີ້, ທ່ານ ຄຳເພັດ ສົມວໍລະຈິດ ກໍໄດ້ມີຄຳເຫັນໂອ້ລົມ ສະແດງຄວາມຍ້ອງຍໍຊົມເຊີຍຕໍ່ການຊີ້ນໍາ-ນຳພາ ການຈັດຕັ້ງວຽກງານໃນໄລຍະຜ່ານມາ ສາມາດຍາດໄດ້ຜົນສໍາເລັດຫຼາຍດ້ານທີ່ພົ້ນເດັ່ນ ເປັນຕົ້ນ ການຈັດຕັ້ງປະຕິບັດຄຳສັ່ງ ແລະ ນິຕິກຳຕ່າງໆ ຂອງຫົວໜ້າອົງການໄອຍະການປະຊາຊົນສູງສຸດ ແລະ ການຈັດຕັ້ງປະຕິບັດ, ຜັນຂະຫຍາຍວາລະແຫ່ງຊາດ ທີ່ສະແດງອອກໃນບົດລາຍງານ, ຄຽງຄູ່ກັບຜົນສໍາເລັດນັ້ນ ມີບາງປັດໄຈສໍາຄັນທີ່ຕ້ອງໄດ້ເອົາໃຈໃສ່ຕື່ມບາງດ້ານເປັນຕົ້ນແມ່ນ ໃຫ້ ຄະນະພັກ, ສະມາຊິກພັກ, ພະນັກງານ-ລັດຖະກອນ ຖືສໍາຄັນວຽກງານການສຶກສາອົບຮົມການເມືອງແນວຄິດ, ຈັນຍາບັນ, ຈັນຍາທໍາ ຂອງພະນັກງານໄອຍະການປະຊາຊົນ, ແບບແຜນວິທີການເຮັດວຽກ, ການກໍ່ສ້າງໜ່ວຍພັກປອດໃສ ເຂັ້ມແຂງໜັກແໜ້ນ ລວມໄປເຖິງການປັບປຸງກົງຈັກການຈັດຕັ້ງ, ການປະຕິບັດໜ້າທີ່ວິຊາສະເພາະ ເຊັ່ນ: ການຕິດຕາມກວດກາທົ່ວໄປ, ການຂຶ້ນຖະແຫຼງໃນທີ່ປະຊຸມສານ, ການແຈ້ງຕອບປະຊາຊົນ, ການຕ້ອນຮັບປະຊາຊົນ, ການໃຫ້ຄຳປຶກສາ, ການຕິດຕາມກວດກາຄ້າຍຄຸມຂັງ-ດັດສ້າງ, ເພີ່ມທະວີວຽກງານກວດກາຢ່າງເປັນປົກກະຕິ ແລະ ອື່ນໆ ພ້ອມທັງອອກແຮງແຂ່ງຂັນສ້າງຜົນງານ ເພື່ອຂໍ່ານັບຮັບຕອນວັນຊາດທີ 2 ທັນວາ ຄົບຮອບ 49 ປີ ແລະ ວັນສ້າງຕັ້ງອົງການໄອຍະການປະຊາຊົນ 9 ມັງກອນ ຄົບຮອບ 35 ປີ ຢ່າງເປັນຂະບວນຟົດຟື້ນ. ພ້ອມນັ້ນ, ຍັງໄດ້ມອບຄອມພີວເຕີ ແລະ ເຄື່ອງປິນເຕີ ຈຳນວນ 1 ຊຸດ ໃຫ້ອົງການໄອຍະການປະຊາຊົນແຂວງ ເພື່ອນຳໃຊ້ເຂົ້າໃນວຽກງານ.
ຫຼັງຈາກນັ້ນ, ໃນວັນດຽວກັນ ຄະນະດັ່ງກ່າວຍັງໄດ້ລົງຢ້ຽມຢາມ ແລະ ພົບປະກັບ ເຈົ້າເມືອງປາກຊັນ, ເມືອງປາກກະດິງ ແລະ ເມືອງໄຊຈຳພອນ ເພື່ອຊຸກຍູ້ວຽກງານໄອຍະການຢູ່ທ້ອງຖິ່ນເວົ້າລວມ ເວົ້າສະເພາະແມ່ນຢູ່ ແຂວງບໍລິຄໍາໄຊ ໃຫ້ມີຄວາມເຕີບໃຫຍ່, ເຂັ້້ມແຂງ ແລະ ພັດທະນາສູ່ທັນສະໄໝ.
(ຂ່າວ-ພາບ:ຈະເລີນສິນ)
ຄໍາເຫັນ