 |
ການລົງເຄື່ອນໄຫວສະເໜີຕົວມີຂຶ້ນໃນວັນທີ 18 ກຸມພານີ້, ຊຶ່ງນໍາໂດຍ ທ່ານ ແກ້ວລັດຕະນະ ສີຫາວົງ ຄະນະປະຈຳພັກແຂວງ ຮອງປະທານສະພາປະຊາຊົນແຂວງຈຳປາສັກ ທັງເປັນຜູ້ສະໝັກເລືອກຕັ້ງນໍ້າເບີ 4 ປະຈຳເຂດເລືອກຕັ້ງທີ 15 ແຂວງຈຳປາສັກ, ພ້ອມກັບຜູ້ສະໝັກຮັບເລືອກຕັ້ງ ສສຊ ຄະນະທີ1 ໂດຍການຕ້ອນຮັບຂອງທ່ານ ຈັນທະນົງສິນ ຈັນທະພິມ ປະທານຄະນະກໍາມະການປົກຄອງເມືອງໂຂງ, ມີຄະນະນໍາຂອງເມືອງ, ມີພະນັກງານ-ລັດຖະກອນຈາກບັນດາຂະແໜງການ, ກໍຄືຜູ້ມີສິດເລືອກຕັ້ງເຂົ້າຮ່ວມ.
ໃນການພົບປະ ແລະ ສະເໜີຕົວແມ່ນໄດ້ນໍາສະເໜີໃຫ້ຮູ້ກ່ຽວກັບປະຫວັດ ແລະ ການເຄື່ອນໄຫວໂດຍຫຍໍ້ໃນແຕ່ລະໄລຍະຂອງບັນດາທ່ານຜູ້ສະໝັກຮັບເລືອກຕັ້ງ ສສຊ ເຂດເລືອກຕັ້ງທີ 15 ແຂວງຈໍາປາສັກ ຈໍານວນ 20 ທ່ານ, ທັງນີ້ກໍເພື່ອແນໃສ່ໃຫ້ຜູ້ທີ່ມີສິດເລືອກຕັ້ງ ໄດ້ຮັບຮູ້ເຖິງໝາກຜົນ, ຜົນງານດ້ານຕ່າງໆຂອງຜູ້ຮັບສະໝັກເລືອກຕັ້ງ ສສຊ ຊຸດທີ X ຢ່າງເລິກຊຶ່ງ.
ຈາກນັ້ນຜູ້ສະໝັກຮັບເລືອກຕັ້ງ ຄະນະທີ 1 ໄດ້ຜັດປ່ຽນກັນ ມີຄໍາເຫັນພົບປະ ແລະ ແນະນໍາຕົວ, ພ້ອມທັງສະເໜີຈຸດປະສົງ ແລະ ສະແດງວິໄສທັດຂອງຕົນໃຫ້ຜູ້ມິສິດເລືອກຕັ້ງຮັບຮູ້. ພ້ອມນີ້, ໃນໂອກາດດໍາເນີນການປ່ອນບັດເລືອກຕັ້ງໃນວັນທີ 22 ກຸມພາ 2026 ຕ້ອງໄດ້ເອົາໃຈໃສ່ປະຕິບັດໃຫ້ມີຄວາມຮັບປະກັນໃຫ້ໄດ້ 400% ຄື: ນຳພາຜູ້ມີສິດເລືອກຕັ້ງໄປປ່ອນບັດເລືອກຕັ້ງໃຫ້ຄົບຖ້ວນ100%, ນຳພາຜູ້ມີສິດເລືອກຕັ້ງໃຫ້ຮູ້ໃຊ້ສິດໃນການປ່ອນບັດເລືອກຕັ້ງຖືກຕ້ອງຕາມລະບຽບການເລືອກຕັ້ງ 100%, ນຳພາວຽກງານປ້ອງກັນຊາດ, ປ້ອງກັນຄວາມສະຫງົບໃຫ້ມີຄວາມສະຫງົບ ແລະ ມີຄວາມປອດໄພ100%, ນຳພາວຽກງານປ່ອນບັດເລືອກຕັ້ງໃຫ້ຮັບປະກັນຄວາມໂປ່ງໃສ ແລະ ສຳເລັດທັນຕາມກຳນົດເວລາ100%
ໃນໂອກາດນີ້, ຄະນະຜູ້ສະໝັກຮັບເລືອກຕັ້ງ ສສຂ ເຂດເລືອກຕັ້ງເມືອງໂຂງ ຈໍານວນ 7 ທ່ານ, ກໍໄດ້ມີຄໍາເຫັນພົບປະ ແລະ ສະເໜີຕົວ ເຊັ່ນດຽວກັນ.
(ຂ່າວ-ພາບ: ຈັນທະວີສັກ)
ຄໍາເຫັນ