 |
ໂອກາດດັ່ງກ່າວ, ສະຫາຍປະທານສະພາແຫ່ງຊາດຫວຽດນາມ ໄດ້ກ່າວສະແດງຄວາມຍິນດີຕ້ອນຮັບ ແລະ ຊົມເຊີຍ ພ້ອມຕີລາຄາສູງຕໍ່ຄະນະຜູ້ແທນອົງການກວດສອບແຫ່ງລັດຂອງ ສປປ ລາວ ພ້ອມຄະນະໃນຄັ້ງນີ້ ຊຶ່ງເປັນການປະກອບສ່ວນເຂົ້າໃນການເສີມຂະຫຍາຍສາຍພົວພັນຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ - ສອງລັດ ກໍຄືປະຊາຊົນສອງຊາດຫວຽດນາມ-ລາວ ເວົ້າສະເພາະສອງອົງການກວດສອບແຫ່ງລັດຫວຽດນາມ-ລາວ ໃຫ້ນັບມື້ແໜ້ນແຟ້ນຍິ່ງຂຶ້ນ ອວຍພອນໃຫ້ຄະນະຜູ້ແທນອົງການກວດສອບແຫ່ງລັດ ແຫ່ງ ສປປ ລາວ ຈົ່ງປະສົບຄວາມສຳເລັດໃນການຢ້ຽມຢາມ ແລະ ເຮັດວຽກຢູ່ ສສ ຫວຽດນາມ, ສະຫາຍ ວຽງທະວີສອນ ເທບພະຈັນ ຕາງໜ້າຄະນະຜູ້ແທນ ໄດ້ກ່າວສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນຂອງປະທານສະພາແຫ່ງຊາດຫວຽດນາມໃນຄັ້ງນີ້ ພ້ອມຢືນຢັນຈະຕັ້ງໜ້າເສີມຂະຫາຍການພົວພັນຮ່ວມມືລະຫວ່າງສອງອົງການກວດສອບແຫ່ງລັດ ລາວ-ຫວຽດນາມ ທີ່ມີມາແຕ່ດົນນານໃຫ້ໄດ້ຮັບການເສີມຂະຫຍາຍແຕກດອກອອກຜົນຍິ່ງໆຂຶ້ນ.
ຂ່າວແຈ້ງຕື່ມອີກວ່າໃນໄລຍະຢ້ຽມຢາມ ສສ ຫວຽດນາມ ໃນຄັ້ງນີ້ໄດ້ພົບປະກັບອົງການກວດສອບແຫ່ງລັດ ສສ ຫວຽດນາມ ທີ່ນະຄອນຫຼວງຮ່າໂນ້ຍ ແລະ ນະຄອນໂຮ່ຈິມິນ ໂດຍໄດ້ຮັບການຕ້ອນຮັບຂອງສະຫາຍ ໂງ ວັນ ຕວັນ ປະທານອົງການກວດສອບແຫ່ງລັດ ສສ ຫວຽດນາມ ຊຶ່ງຄະນະຜູ້ແທນໄດ້ເຂົ້າຮ່ວມພົບປະສອງຝ່າຍ ແລະ ແລກປ່ຽນບົດຮຽນກ່ຽວກັບການມີສ່ວນຮ່ວມຂອງ ອົງການກວດສອບແຫ່ງລັດ ຕໍ່ການສ້າງແຜນງົບປະມານແຫ່ງລັດ ແລະ ຄວາມເຂົ້າໃຈຕໍ່ກັບກົນໄກ, ຂັ້ນຕອນວິທີການຈັດຕັ້ງປະຕິບັດຄໍາແນະນໍາຜົນຂອງການກວດສອບ. ໃນໂອກາດດັ່ງກ່າວ ຄະນະຜູ້ແທນ ໄດ້ເດີນທາງຢ້ຽມຢາມອົງການກວດສອບ ປະຈໍຳເຂດ 4 ນະຄອນໂຮ່ຈິມິນ ສສ ຫວຽດນາມ. ການພົບປະສອງຝ່າຍກັນໃນຄັ້ງນີ້ ເປັນຂີດໝາຍສຳຄັນ ໃນການສືບຕໍ່ ເສີມຂະຫຍາຍສາຍພົວພັນຮ່ວມມື ພາຍໃຕ້ບົດບັນທຶກວ່າດ້ວຍການຮ່ວມມືສອງຝ່າຍທີ່ໄດ້ເຊັ່ນຮ່ວມກັນ ໃນປີ 2022 ແນໃສ່ຊຸກຍູ້ຊ່ວຍເຫຼືອ ແລະ ສະໜັບສະໜູນຊຶ່ງກັນ ແລະ ກັນ ເພື່ອພັດທະນາຂະ ແໜງການກວດສອບແຫ່ງລັດຂອງສອງປະເທດໃຫ້ກ້າວໜ້າຢ່າງບໍ່ຢຸດຢັ້ງ, ທັງເປັນການປະກອບສ່ວນອັນສຳຄັນເຂົ້າໃນການຜັນຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມຂອງສອງປະເທດກໍຄືການເສີມຂະຫຍາຍສາຍພົວພັນທາງການທູດຄົບຮອບ 63ປີ (5/9/1962 - 5/9/2025).
ໃນກອງປະຊຸມພົບປະສອງຝ່າຍ, ຄະນະຜູ້ແທນແຕ່ລະຝ່າຍໄດ້ແຈ້ງກ່ຽວກັບສະພາບການພັດທະນາເສດຖະກິດ - ສັງຄົມ ແລະ ການຮ່ວມມືທີ່ພົ້ນເດັ່ນຂອງວຽກງານການກວດສອບ ໂດຍສະເພາະວຽກງານໂຄງການປັບປຸງບໍລິຫານອົງການກວດສອບແຫ່ງລັດ ຫັນເປັນທັນສະໄໝ (E-Office) ທີ່ໄດ້ຮັບທຶນການຊ່ວຍເຫຼືອຈາກລັດຖະບານ ສສ ຫວຽດນາມ ກໍຄືອົງການກວດສອບແຫ່ງລັດ ສສ ຫວຽດນາມ ໃນປີ 2024, ປຶກສາຫາລືກ່ຽວກັບແຜນກິດຈະກຳຮ່ວມມືສອງຝ່າຍໄລຍະກາງແຕ່ປີ 2026-2028. ພ້ອມດຽວກັນນັ້ນ ກໍໄດ້ແລກປ່ຽນບົດຮຽນດ້ານວິຊາການ ຄື: ການມີສ່ວນຮ່ວມຂອງ ອົງການກວດສອບແຫ່ງລັດ ຕໍ່ການສ້າງແຜນງົບປະມານແຫ່ງລັດ ແລະ ຄວາມເຂົ້າໃຈຕໍ່ກັບກົນໄກ, ຂັ້ນຕອນວິທີການຈັດຕັ້ງປະຕິບັດຄໍາແນະນໍາການກວດສອບ. ກອງປະຊຸມ ໄດ້ຕີລາຄາ ແລະ ເອກະພາບສູງຕໍ່ແຜນການຮ່ວມມື 2026-2028 ໂດຍມອບໃຫ້ກົມຮ່ວມມືສອງອົງການປະສານສົມທົບກັນ ເພື່ອສ້າງແຜນກິດຈະກຳ ລະອຽດ;
 |
ໃນໂອກາດທີ່ມີຄວາມໝາຍຄວາມສຳຄັນດັ່ງກ່າວ, ສະຫາຍ ວຽງທະວີສອນ ເທບພະຈັນ ໄດ້ສະແດງຄວາມຂອບໃຈຢ່າງຈິງໃຈມາຍັງ ອົງການກວສອບແຫ່ງລັດ ສສ ຫວຽດນາມ ທີ່ໄດ້ໃຫ້ການຕ້ອນຮັບ ແລະ ແບ່ງປັນຄວາມຮູ້ໃຫ້ແກ່ ອົງການກວດສອບແຫ່ງລັດ ສປປ ລາວ ຕະຫຼອດມາ ແລະ ຈະສືບຕໍ່ການຮ່ວມມືໃນການສ້າງຄວາມເຂັ້ມແຂງໃຫ້ແກ່ພະນັກງານ-ນັກກວດສອບຂອງອົງການກວດສອບແຫ່ງລັດ ສປປ ລາວ ໃນຕໍ່ໜ້າ. ໃນຕອນທ້າຍ ສະຫາຍ ໂງ ວັນ ຕວັນ ປະທານອົງການກວດສອບແຫ່ງລັດ ສສ ຫວຽດນາມ ກໍໄດ້ສະແດງຄວາມຍິນດີ ແລະ ເຊື່ອໝັ້ນວ່າທັງສອງອົງການກວດສອບແຫ່ງລັດ ສສ ຫວຽດນາມ ແລະ ສປປ ລາວ ຈະສືບຕໍ່ຮ່ວມມືຮອບດ້ານ ເພື່ອເສີມຂະຫຍາຍສາຍພົວພັນຮ່ວມມື ລະຫວ່າງ ສອງອົງການກວດສອບແຫ່ງລັດ ໃຫ້ກ້າວໜ້າຂຶ້ນເລື້ອຍໆ .
ຂ່າວ: ອກສລ
ຄໍາເຫັນ