ຄະນະຜູ້ແທນຂັ້ນສູງ ສອງແຂວງພາກເໜືອ ພົບປະແລກປ່ຽນວົດຮຽນ ກັບ ແຂວງລາຍເຈົ່າ. 

ກອງປະຊຸມພົບປະແລກປ່ຽນບົດຮຽນລະຫ່ວາງຄະນະຜູ້ແທນແຂວງລາຍເຈົ່າ ແຫ່ງ ສສ ຫວຽດນາມ ແລະ ຄະນະຜູ້ແທນຂັ້ນສູງແຂວງຜົ້ງສາລີ ແລະ ແຂວງອຸດົມໄຊ ແຫ່ງ ສປປ ລາວ ໄດ້ຈັດຂຶ້ນໃນວັນທີ 14 ມີນານີ້, ຢູ່ທີ່ຫໍປະຊຸມຂອງແຂວງລາຍເຈົ່າ, ແຂວງລາຍເຈົ່ານຳໂດຍສະຫາຍ ນາງ ຢາງ ປ້າວ ໝີ ກຳມະການສູນກາງພັກ ເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ປະທານສະພາປະຊາຊົນແຂວງ ແລະ ແຂວງຜົ້ງສາລີ ນຳໂດຍສະຫາຍ ຄຳຜອຍ ວັນນະສານ ກຳມະການສູນກາງພັກ ເລຂາພັກແຂວງ ເຈົ້າແຂວງຜົ້ງສາລີ, ແຂວງອຸດົມໄຊ ນຳໂດຍສະຫາຍ ບຸນຄົງ ຫຼ້າຈຽມພອນ ກຳມະການສຳຮອງສູນກາງພັກ ເລຂາພັກແຂວງເຈົ້າແຂວງອຸດົມໄຊ ພ້ອມດ້ວຍການນຳຂອງທັງສາມແຂວງເຂົ້າຮ່ວມ.
    ໂອກາດນີ້, ສະຫາຍ ນາງ ຢາງ ປ້າວ ໝີ ໄດ້ຕີລາຄາສູງຕໍ່ ຄະນະຜູ້ແທນສອງແຂວງ ທີ່ໄດ້ເດີນທາງມາຢ້ຽມຢາມ ແລະ  ປະແລກປ່ຽນບົດຮຽນຮ່ວມກັນ ຊຶ່ງເປັນການເສີມຂະຫຍາຍມູນເຊື້ອ ແລະ ເພີ່ມພູນຄຸນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ ເວົ້າລວມ, ເວົ້າສະເພາະ ແມ່ນແຂວງລາຍເຈົ່າ ກັບ ແຂວງຜົ້ງສາລີ ແລະ ແຂວງອຸດົມໄຊ ນັບມື້ເຂົ້າສູ່ລວງເລິກ. ພ້ອມກັນນີ້, ແຕ່ລະແຂວງກໍ່ໄດ້ລາຍງານສະພາບຈຸດພິເສດ, ທີ່ຕັ້ງ ແລະ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ການຮ່ວມມືຮອບດ້ານຂອງແຕ່ລະແຂວງໃນໄລຍະທີ່ຜ່ານມາໃຫ້ກັນ ແລະ ກັນໄດ້ຮັບຊາບ.
    ໃນໂອກາດນີ້, ກໍໄດ້ຮ່ວມລົງນາມເຊັນບົດບັນທຶກການຮ່ວມມືໃນຕໍ່ໜ້າ ຊຶ່ງຕາງໜ້າຄະນະຜູ້ແທນແຂວງຜົ້ງສາລີ ລົງນາມໂດຍສະຫາຍ ຄໍາຜອຍ ວັນນະສານ ແລະ ຕາງໜ້າຄະນະຜູ້ແທນແຂວງ ລາຍເຈົ້າ ລົງນາມໂດຍ ສະຫາຍ ນາງ ຢາງ ປ້າວ ໝີ ພ້ອມດ້ວຍຄະນະຜູ້ແທນທັງສອງຝ່າຍເຂົ້າຮ່ວມເປັນສັກຄີພິຍານ.
(ພາບ-ຂ່າວ: ແສງຄຳ ສາລີວັນ)