ຄະນະຜູ້ແທນສະຫວັນນະເຂດ-ກວາງບິ່ງ ຮ່ວມລົງນາມໃນຂໍ້ຕົກລົງຮ່ວມມືດ້ານຊາຍແດນ

ໃນວັນທີ 28 ພະຈິກ ຜ່ານມາ, ຄະນະກຳມະການຊາຍແດນແຂວງສະຫວັນນະເຂດ ສປປ ລາວ ແລະຄະນະກຳມະການຊາຍແດນແຂວງກວາງບິ່ງ ແຫ່ງ ສສ ຫວຽດນາມ ໄດ້ຈັດກອງປະຊຸມພົບປະສອງຝ່າຍຂຶ້ນທີ່ຫ້ອງວ່າການປົກຄອງແຂວງສະຫວັນນະເຂດ,ຝ່າຍແຂວງສະຫວັນນະເຂດ ນໍາໂດຍ ສະຫາຍນາງ ຫຼິງທອງ ແສງຕາວັນ ຄະນະປະຈຳພັກແຂວງ ຮອງເຈົ້າແຂວງສະຫວັນນະເຂດ, ຝ່າຍແຂວງກວາງບິ່ງ ສສ ຫວຽດນາມ ນໍາໂດຍສະຫາຍ ດວ່ານ ງັອກ ເລິມ  ຫົວໜ້າຄະນະຊີ້ນຳວຽກງານຊາຍແດນ  ຮອງປະທານຜູ້ປະຈຳການຄະນະກຳມະການປະຊາຊົນ ແຂວງກວາງບິ່ງ ແຫ່ງ ສສ ຫວຽດນາມ ພ້ອມຄະນະ.
ໃນໂອກາດກ່າວເປີດກອງປະຊຸມ, ສະຫາຍ ນາງ ຫຼິງທອງ ແສງຕາວັນ ກ່າວວ່າ: ເພື່ອເປັນການປະຕິບັດຕາມເນື້ອໃນບົດບັນທຶກຂອງຜູູ້ແທນຄະນະກໍາມະການຊາຍແດນຂອງສອງແຂວງ,  ໃນການຕີລາຄາຜົນຂອງການຈັດຕັ້ງປະຕິບັດຂອງວຽກງານການຄຸ້ມຄອງຊາຍແດນແຕ່ປີ 2022 ເຖິງປີ 2023 ແລະສືບຕໍ່ໃນການວາງແຜນວຽກງານຕ່າງໆທີ່ກ່ຽວຂ້ອງກັບວຽກງານຊາຍແດນຂອງສອງແຂວງໃນປີ 2024 ໃນການຮ່ວມມືວຽກງານຄຸ້ມຄອງຊາຍແດນ ຂອງແຂວງສະຫວັນນະເຂດ  ແລະແຂວງກວາງບິ່ງ  ທີ່ມີຊາຍແດນຮ່ວມກັນຍາວທັງໝົດ 22,8 ກິໂລແມັດ ແລະມີຫຼັກໝາຍຊາຍແດນຮ່ວມກັນ 9 ຫຼັກໝາຍໃຫຍ່ ເລີ່ມແຕ່ຫຼັກໝາຍຊາຍແດນ 568 ຫາ ຫຼັກໝາຍຊາຍແດນ 576  ຊຶ່ງໃນນັ້ນແຂວງສະຫວັນນະເຂດ ປົກປັກຮັກສາ ແລະ ຄຸ້ມຄອງ 4 ຫຼັກໝາຍຊາຍແດນ (ເລກຄີກ) ແລະແຂວງກວາງບິ່ງ ປົກປັກຮັກສາ ແລະຄຸ້ມຄອງ 5 ຫຼັກໝາຍຊາຍແດນ (ເລກຄູ່), ຜ່ານມາສອງແຂວງໄດ້ມີການປະສານ, ສົມທົບກັນຢ່າງບໍ່ຢຸດຢັ້ງ, ປະກອບສ່ວນຮັກສາຄວາມສະຫງົບທາງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມ, ສ້າງເງື່ອນໄຂອັນສະດວກໃຫ້ແກ່ການພັດທະນາເສດຖະກິດ - ສັງຄົມ ແລະຮັບປະກັນວຽກງານປ້ອງກັນຊາດ, ປ້ອງກັນຄວາມສະຫງົບຢູ່ບໍລິເວນຊາຍແດນ, ປະກອບສ່ວນອັນສຳຄັນໃນການເສີມຂະຫຍາຍເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານ ລະຫວ່າງ ສອງພັກ-ສອງລັດ ແລະປະຊາຊົນຂອງສອງແຂວງຕະຫຼອດມາ, ສະພາບເສັ້ນຊາຍແດນ ແລະຫຼັກໝາຍຊາຍແດນ ໄດ້ຮັບການຄຸ້ມຄອງ, ປົກປັກຮັກສາມີຄວາມສະຫງົບເປັນປົກກະຕິໃນຂອບເຂດບໍລິເວນຊາຍແດນທັງສອງແຂວງ  ກອງຮ້ອຍທະຫານຊາຍແດນທັງສອງຝ່າຍໄດ້ມີການພົວພັນຄວາມສາມັກຄີໃກ້ຊິດຕິດແທດ ແລະມີການປະສານສົມທົບຕິດຕໍ່ພົວພັນກັນຢ່າງເປັນປະຈຳ,  ເພື່ອລາຍງານສະພາບ ແລະ ແລກປ່ຽນວຽກງານຮ່ວມກັນ ແລະບັນຫາອື່ນໆທີ່ພົວພັນເຖິງວຽກງານຊາຍແດນບົນພື້ນຖານຈິດໃຈຮ່ວມມືມິດຕະພາບ ເພື່ອຜົນປະໂຫຍດສ່ວນລວມຮ່ວມກັນ, ວຽກງານໂຄສະນາ ທີ່ໄດ້ຈັດຕັ້ງປະຕິບັດໃນໄລຍະຜ່ານມາ  ແຂວງສະຫວັນນະເຂດ  ສືບຕໍ່ໃນການລົງເຄື່ອນໄຫວຊຸກຍູ້ວຽກງານໂຄສະນາເຜີຍແຜ່ “ສັນຍາ” ວ່າດ້ວຍລະບຽບການຄຸ້ມຄອງຊາຍແດນ ແລະດ່ານຊາຍແດນ ຂອງສອງລັດຖະບານ ລາວ - ຫວຽດນາມ ທີ່ໄດ້ລົງນາມ ວັນທີ 16 ມີນາ 2016 ແລະ ກົດໝາຍທີ່ກ່ຽວຂ້ອງກັບວຽກງານຊາຍແດນໃຫ້ພໍ່ແມ່ປະຊາຊົນ, ພະນັກງານ ແລະ ເຈົ້າໜ້າທີ່ກໍາລັງປະກອບອາວຸດທີ່ປະຈຳຢູ່ເຂດຊາຍແດນ, ໃຫ້ຮັບຮູ້ ແລະເຂົ້າໃຈກ່ຽວກັບຄວາມໝາຍຄວາມສໍາຄັນຂອງເສັ້ນຊາຍແດນແຫ່ງຊາດ, ພ້ອມທັງຊຸກຍູ້ໃຫ້ເຈົ້າໜ້າທີ່ປ້ອງກັນຊາຍແດນຂັ້ນທ້ອງຖິ່ນ ແລະ ປະຊາຊົນທີ່ອາໄສຢູ່ລຽບຕາມບໍລິເວນຊາຍແດນ  ປະກອບສ່ວນເຂົ້າໃນວຽກງານປົກປັກຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍຢູ່ຕາມບໍລິເວນຊາຍແດນ,  ເພີ່ມທະວີສາຍພົວພັນມິດຕະພາບ, ຄວາມສາມັກຄີ ແລະການຮ່ວມມື ລະຫວ່າງກອງກຳລັງປ້ອງກັນຊາຍແດນຂອງສອງແຂວງ   ເພື່ອພ້ອມກັນແກ້ໄຂບັນດາປະກົດການຫຍໍ້ທໍ້,  ທີ່ເກີດຂຶ້ນຢູ່ຕາມບໍລິເວນຊາຍແດນໄດ້ຢ່າງທັນການ.ຈາກນັ້ນສອງຝ່າຍກໍໄດ້ເຊັນບົດບັນທຶກຮ່ວມກັນລະຫວ່າງ ສະຫາຍນາງ ຫຼິງທອງ ແສງຕາວັນ ແລະ ສະຫາຍ ດວ່ານ ງັອກ ເລີ່ມ ຊຶ່ງມີສອງຝ່າຍເຂົ້າຮ່ວມ.
ຂ່າວ-ພາບ: ສະຫວັນນະເຂດ