 |
ເວົ້າສະເພາະນັບແຕ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XVIII ຂອງພັກກອມມູນິດຈີນເປັນຕົ້ນມາ, ພາຍໃຕ້ການຊີ້ນຳ ແລະ ນຳພາຂອງສະຫາຍ ສີ ຈິ້ນຜິງ ເລຂາທິການໃຫຍ່ຄະນະກຳມະການສູນກາງພັກກອມມູນິດຈີນທີ່ເປັນແກນກາງໄດ້ນຳພາປະຊາຊົນຈີນສ້າງສາພັດທະນາ ສປ ຈີນ ດ້ວຍທັດສະນະໃໝ່, ແນວຄິດ ແລະ ຍຸດທະສາດໃໝ່ ທີ່ສອດຄ່ອງກັບສະພາບລວມພາຍໃນປະເທດ ແລະ ທ່າອ່ຽງລວມຂອງຍຸກສະໄໝ ໂດຍສະເພາະແມ່ນການສະເໜີອອກແນວຄິດ ສີ ຈິ້ນຜິງ ວ່າດ້ວຍສັງຄົມນິຍົມທີ່ມີສີສັນພິເສດຂອງຈີນ ໃນຍຸກສະໄໝໃໝ່ ເພື່ອປົກຄອງລັດ-ບໍລິຫານປະເທດໃຫ້ມີຄວາມເຂັ້ມແຂງ, ເຮັດໃຫ້ ສປ ຈີນມີການພັດທະນາຢ່າງໃຫຍ່ຫຼວງ, ຮອບດ້ານ, ກ້າວກະໂດດ ແລະ ມະຫັດສະຈັນ, ການເມືອງມີສະຖຽນລະພາບຢ່າງໜັກແໜ້ນ, ວຽກງານປ້ອງກັນຊາດ-ປ້ອງກັນຄວາມສະ ຫງົບມີຄວາມເຂັ້ມແຂງ ທັນສະໄໝ, ສັງຄົມມີຄວາມສະຫງົບ ກົມກຽວປອງດອງ, ບັນລຸຜົນສຳເລັດອັນໃຫຍ່ຫຼວງເປັນປະຫວັດການຄືບັນລຸຜົນສຳເລັດຕາມເປົ້າໝາຍຍຸດທະສາດ 100 ປີ ເຫດການທີໜຶ່ງ. ນອກນັ້ນບັນດາຂໍ້ລິເລີ່ມຕ່າງໆທີ່ສະຫາຍ ສີຈິ້ນຜິງ ສະເໜີອອກກໍໄດ້ຮັບການເຂົ້າຮ່ວມແລະ ສະໜັບສະໜູນຢ່າງຕັ້ງໜ້າ ຈາກວົງຄະນາຍາດສາກົນ, ບົດບາດ ແລະ ອິດທິພົນຂອງ ສປ ຈີນ ນັບມື້ພົ້ນເດັ່ນ ແລະ ນຳໜ້າ ໃນເວທີພາກພື້ນ ແລະ ສາກົນ, ປະກອບສ່ວນສຳຄັນຍິ່ງເຂົ້າໃນພາລະກິດເສີມສ້າງສັນຕິພາບ ແລະ ການພັດທະນາໃນໂລກ. ພ້ອມນັ້ນ, ການຫັນເປັນທັນສະໄໝແບບຈີນແມ່ນໝາກຜົນທີ່ພັກກອມມູນິດຈີນ ແລະ ປະຊາຊົນຈີນຊອກຄົ້ນ ແລະ ປະຕິບັດຕົວຈິງໃນໄລຍະຍາວນານຜ່ານມາແມ່ນພາລະກິດອັນຍິ່ງໃຫຍ່ ແລະ ມີໄຊ.
 |
ເມື່ອຫວນຄືນໃນກອງປະຊຸມ ໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນ (ຕຸລາ 2022) ສະຫາຍ ສີ ຈິ້ນຜິງ ໄດ້ຮັບເລືອກຕັ້ງໃຫ້ດຳລົງຕຳແໜ່ງເປັນເລຂາທິການໃຫຍ່ຄະນະກຳມະການສູນກາງພັກກອມມູນິດຈີນອີກວາລະໜຶ່ງ, ໂອກາດນີ້, ສະຫາຍ ສີ ຈິ້ນຜິງ ໄດ້ກ່າວວ່າ: ຢູ່ບົນຂະບວນການເດີນທາງອອກຄັ້ງໃໝ່, ພວກເຮົາຕ້ອງຊຸກຍູ້ການປະຕິຮູບຕົນເອງຂອງພັກຢ່າງສະເໝີຕົ້ນສະເໝີປາຍ. ພັກທີ່ໄດ້ຜ່ານຜ່າການທົດສອບທາງປະຫວັດສາດຢ່າງຫຼວງຫຼາຍແຕ່ບໍ່ໄດ້ປ່ຽນແປງອຸດົມການໃນຫົວທີ, ຈຶ່ງສາມາດຮັກ ສາຄວາມມີຊີວິດຊີວາຂອງພາລະ ກິດຢູ່ສະເໝີ; ພັກທີ່ໄດ້ສ້າງຜົນສຳເລັດຢ່າງສະຫງ່າງາມ ແຕ່ຍັງຢຶດໝັ້ນການປະຕິຮູບຕົນເອງຢ່າງກ້າຫານ, ຈຶ່ງສາມາດຜ່ານຜ່າອຸປະສັກໄດ້ທຸກຢ່າງ. ພວກເຮົາຕ້ອງບຸກບືນກ້າວໄປໜ້າຢ່າງກ້າຫານ, ພະຍາຍາມສ້າງອະນາຄົດທີ່ສົດໃສກວ່າເກົ່າ. ຈີນເປີດປະຕູສູ່ພາຍນອກ ນັບມື້ກວ້າງ ຂວາງກວ່າເກົ່າ. ລົງເລິກການປະຕິຮູບ ແລະ ເປີດປະຕູສູ່ພາຍນອກຢ່າງຮອບດ້ານ ແລະ ບໍ່ຫວັ່ນໄຫວຄອນແຄນ, ເດັດດ່ຽວຊຸກຍູ້ການພັດ ທະນາຢ່າງມີຄຸນນະພາບສູງ, ໃຊ້ການພັດທະນາຂອງຕົນ ເພື່ອສ້າງໂອກາດຫຼາຍກວ່າເກົ່າໃຫ້ແກ່ໂລກ.
 |
ນີ້ ສະແດງໃຫ້ເຫັນວ່າ: ການພັດທະນາຂອງຈີນແມ່ນຕິດພັນກັບການພັດທະນາຂອງໂລກ ແລະ ການພັດທະນາຂອງໂລກກໍຕ້ອງການຈີນເຊັ່ນ ດຽວກັນ. ປະເທດຈີນຍາມໃດກໍມີຈຸດປະສົງຮ່ວມກັນກັບປະຊາຊົນຂອງປະເທດຕ່າງໆໃນໂລກ, ສົ່ງເສີມຄ່ານິຍົມຮ່ວມຂອງມວນມະນຸດ ເພື່ອສັນຕິພາບ, ການພັດທະນາ, ຍຸຕິທຳ, ຄວາມເປັນທຳ, ປະຊາທິປະໄຕ ແລະ ເສລີພາບ, ຮັກສາສັນຕິພາບຂອງໂລກ, ຊຸກຍູ້ການພັດທະນາຂອງໂລກ ແລະ ສືບຕໍ່ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດ.
ພິເສດ, ໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກ ກອມມູນິດຈີນ ໄດ້ເຫັນດີບັນທຶກເອົາ ການພັດທະນາໃໝ່ຂອງແນວຄິດສັງຄົມນິຍົມທີ່ມີສີສັນພິເສດຂອງຈີນໃນຍຸກໃໝ່ຂອງສະຫາຍ ສີ ຈິ້ນຜິງ ເຂົ້າໃນ “ກົດລະບຽບພັກກອມມູນິດຈີນ” ແລະ ໄດ້ປັບປຸງການບັນລະຍາຍຕໍ່ເປົ້າໝາຍບຸກບືນສູ້ຊົນໃນກົດລະບຽບພັກ ໂດຍກຳນົດຢ່າງຈະແຈ້ງວ່າ: ເປົ້າໝາຍຍຸດທະສາດຂອງການພັດທະນາເສດຖະກິດ ແລະ ສັງຄົມຂອງຈີນແມ່ນບັນລຸສັງຄົມນິຍົມທີ່ທັນສະໄໝ ໂດຍພື້ນຖານ ເມື່ອຮອດປີ 2035; ສ້າງປະເທດຈີນໃຫ້ເປັນປະເທດສັງຄົມນິຍົມທີ່ເຂັ້ມແຂງ ແລະ ທັນສະໄໝກໍຄືບັນລຸ “ເປົ້າໝາຍສູ້ຊົນຮອບຮ້ອຍປີປະການທີສອງ” ເມື່ອຮອດກາງສະຕະວັດນີ້ ໂດຍລວມການຫັນເປັນທັນສະໄໝແບບຈີນແມ່ນສັງຄົມນິຍົມທັນສະໄໝທີ່ນຳພາໂດຍພັກກອມມູນິດຈີນ, ມີຈຸດພິເສດຮ່ວມຂອງການຫັນເປັນທັນສະໄໝຂອງປະເທດຕ່າງໆ, ຍິ່ງມີສີສັນພິເສດຂອງຈີນທີ່ສອດຄ່ອງກັບສະພາບຕົວຈິງຂອງປະເທດຈີນ, ການຫັນເປັນທັນສະໄໝແບບຈີນແມ່ນການຫັນເປັນທັນສະໄໝທີ່ກວມເອົາປະຊາກອນຈຳນວນຫຼວງຫຼາຍ, ແມ່ນການຫັນເປັນທັນສະໄໝທີ່ປະຊາຊົນຮັ່ງມີຮ່ວມກັນທຸກຖ້ວນໜ້າ, ແມ່ນການຫັນເປັນທັນສະໄໝທີ່ມີອະລິຍະທຳດ້ານວັດຖຸ ແລະ ອະລິຍະທຳດ້ານຈິດໃຈປະສົມປະສານກັນ, ແມ່ນການຫັນເປັນທັນສະໄໝທີ່ມະນຸດ ແລະ ທຳມະຊາດດຳລົງຄົງຕົວຮ່ວມກັນຢ່າງກົມກຽວ ແລະ ແມ່ນການຫັນເປັນທັນສະໄໝທີ່ເດີນຕາມເສັ້ນທາງພັດທະນາ ໂດຍສັນຕິ.
ຕໍ່ນະໂຍບາຍການຕ່າງປະເທດ, ໃນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກກອມມູນິດຈີນພາຍໃຕ້ຫົວຂໍ້ “ການຕ່າງປະເທດຂອງປະເທດໃຫຍ່ທີ່ມີສີສັນພິເສດຂອງຈີນ ພາຍໃຕ້ແນວຄິດຂອງ ສະຫາຍ ສີ ຈິ້ນຜິງ” ທີ່ມີຄວາມໝາຍວ່າ: ໃນໄລຍະຜ່ານມາກໍຄືໃນຕໍ່ໜ້າແມ່ນຈີນສືບຕໍ່ຢຶດໝັ້ນຈຸດປະສົງຂອງນະໂຍບາຍການຕ່າງປະເທດທີ່ຮັກສາສັນຕິພາບຂອງໂລກ ແລະ ຊຸກຍູ້ການພັດທະນາຮ່ວມກັນ, ສຸມໃສ່ຊຸກຍູ້ການສ້າງປະຊາຄົມຮ່ວມຊາ ຕາກຳມວນມະນຸດ, ຈີນຍິນດີຮ່ວມກັບບັນດາປະເທດທົ່ວໂລກພ້ອມກັນສ້າງອະນາຄົດທີ່ດີງາມຂອງມວນມະນຸດ. ບໍ່ວ່າສະຖານະການຈະມີການປ່ຽນແປງແນວໃດ, ຄວາມຕັດສິນໃຈຂອງຈີນໃນການຈັດຕັ້ງປະຕິບັດລັດທິຫຼາຍຝ່າຍທີ່ແທ້ຈິງ ຈະບໍ່ມີການປ່ຽນແປງ, ຄວາມພະຍາ ຍາມໃນການປັບປຸງການບໍລິຫານ ໂລກໃຫ້ດີຂຶ້ນຈະບໍ່ມີການປ່ຽນແປງ,ການເຄື່ອນໄຫວຊຸກຍູ້ການຮ່ວມມືຫຼາຍຝ່າຍຈະບໍ່ມີການປ່ຽນແປງ.ຍາມໃດຈີນກໍຢຶດໝັ້ນການເປີດປະຕູ ແລະ ຄວາມໂອບເອື້ອອາລີ, ບໍ່ປິດ ປະເທດຕົນ ແລະ ບໍ່ປັດປ່າຍປະເທດອື່ນ, ຢຶດໝັ້ນບົນພື້ນຖານກົດໝາຍສາກົນ, ບໍ່ເປັນເຈົ້າອຳນາດ, ຢຶດໝັ້ນການປຶກສາຫາລື ແລະ ການຮ່ວມມືກັນ, ບໍ່ປໍລະປັກກັນ ແລະ ບໍ່ຕໍ່ຕ້ານກັນ, ຢຶດໝັ້ນເດີນຕາມເສັ້ນທາງທີ່ຖືກຕ້ອງຕາມຍຸກສະໄໝ, ບໍ່ພໍໃຈນຳແຕ່ສິ່ງທີ່ມີຢູ່, ສືບຕໍ່ເຂົ້າຮ່ວມການປະຕິຮູບ ແລະ ການສ້າງລະບົບບໍລິຫານໂລກຢ່າງຕັ້ງໜ້າ, ອຸທິດສະຕິປັນຍາ ແລະ ກຳລັງເຂົ້າໃນການແກ້ໄຂການຂາດດຸນດ້ານການບໍລິຫານໂລກ, ການຮັບມືກັບສິ່ງທ້າທາຍທີ່ມີລັກສະນະທົ່ວໂລກ ແລະ ຊຸກຍູ້ການສ້າງປະຊາຄົມຮ່ວມຊາຕາກຳຂອງມວນມະນຸດດ້ວຍການກະທຳຕົວຈິງ”.
ເມື່ອເວົ້າເຖິງການພົວພັນ ລາວ-ຈີນ, ເຖິງວັນເວລາຈະໝູນວຽນປ່ຽນໄປ, ແຕ່ສາຍພົວພັນມິດຕະພາບອັນເປັນມູນເຊື້ອລະຫວ່າງສອງ ພັກ, ສອງລັດ ແລະ ປະຊາຊົນສອງຊາດ ລາວ-ຈີນທີ່ມີມາແຕ່ດົນນານນັ້ນຍິ່ງສືບຕໍ່ນັບມື້ໄດ້ຮັບການຮັດແໜ້ນເສີມຂະຫຍາຍດ້ວຍທ່ວງທ່າທີ່ໜັກ ແໜ້ນ ບົນພື້ນຖານຄວາມໄວ້ເນື້ອ ເຊື່ອໃຈຊຶ່ງກັນ ແລະ ກັນ ໂດຍສະ ເພາະແມ່ນພາຍຫຼັງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິ ຫານງານສູນກາງພັກ ປປ ລາວ ປະທານປະເທດລາວເດີນທາງຢ້ຽມຢາມລັດຖະກິດ ສປ ຈີນ ລະຫວ່າງວັນທີ 2-6 ມິຖຸນາ 2026 ຕາມການເຊີນຂອງສະຫາຍ ສີ ຈິ້ນຜິງ ເລຂາທິ ການໃຫຍ່ຄະນະກຳມະການສູນກາງ ພັກກອມມູນິດຈີນ ປະທານປະເທດ ແຫ່ງ ສປ ຈີນ. ບໍ່ພຽງແຕ່ເປັນການຢ້ຽມຢາມພົບປະແບບປະເພນີຂອງສາຍພົວພັນເທົ່ານັ້ນ, ແຕ່ເປັນການຢັ້ງຢືນຢ່າງໜັກແໜ້ນເຖິງຄວາມສະໜິດແໜ້ນຖານມິດສະຫາຍທີ່ ມີອຸດົມການສັງຄົມນິຍົມຄືກັນ. ພິເສດການຢ້ຽມຢາມຄັ້ງນີ້, ການນຳສອງຝ່າຍໄດ້ມີຄວາມເອກະພາບສູງໃນການຍົກຖານະບົດບາດການ ພົວພັນຈາກການເປັນຄູ່ຮ່ວມຊາຕາກຳດຽວກັນກ້າວຂຶ້ນເປັນການສ້າງຄູ່ຮ່ວມຊາຕາກຳທີ່ເຂັ້ມແຂງໜຽວ ແໜ້ນໃນທຸກສະພາບການຂອງຍຸກໃໝ່. ພ້ອມນັ້ນ, ຜົນຂອງການຢ້ຽມຢາມຍັງໄດ້ລົງນາມເອກະສານການຮ່ວມມືສອງຝ່າຍຈຳນວນ 32 ສະ ບັບ ກວມເອົາຂົງເຂດການຮ່ວມມື ລະຫວ່າງບັນດາອົງການອ້ອມຂ້າງສູນກາງພັກຂອງສອງພັກ ລາວ-ຈີນ, ເສດຖະກິດ, ການຄ້າ, ການເງິນ, ການລົງທຶນ, ພະລັງງານ, ກະສິກຳ, ວັດທະນະທຳ, ການພັດທະນາຊັບພະຍາກອນມະນຸດ ແລະ ໜັງສືມອບ-ຮັບບັນດາໂຄງການຊ່ວຍເຫຼືອຈາກ ສປ ຈີນ ຕື່ມອີກ.
ໂອກາດນີ້, ສະຫາຍ ຄຳມອນ ຈັນທະຈິດ ຮອງຫົວໜ້າຄະນະໂຄສະນາອົບຮົມສູນກາງພັກ ປປ ລາວໄດ້ຕີລາຄາສູງຕໍ່ຜົນງານຕະຫຼອດໄລຍະ 105 ປີ ຂອງພັກກອມມູນິດຈີນວ່າ: ພັກກອມມູນິດຈີນມີຜົນງານໃນການປະຕິບັດໜ້າທີ່ປະຫວັດ ສາດອັນໃຫຍ່ຫຼວງທີ່ສົ່ງຜົນກະທົບໂດຍກົງໃນທາງບວກຕໍ່ພາຍໃນປະເທດ ແລະ ຕໍ່ໂລກ, ສະແດງອອກໃນແຕ່ລະໄລຍະປະຫວັດສາດ, ຜົນງານການຊີ້ນຳ ແລະ ນຳພາຂອງພັກກອມມູນິດຈີນກໍມີອັນແຕກຕ່າງກັນ ໂດຍເລີ່ມຈາກພັກໄດ້ນຳພາການຕໍ່ສູ້ກູ້ຊາດ, ສະຖາປະນາ ສປ ຈີນ ໃນປີ 1949 ທີ່ເປັນຜົນງານເດັ່ນອັນດັບທຳອິດ, ກ້າວຂຶ້ນນຳພາການເປີດປະຕູສູ່ໂລກພາຍນອກ ໃນປີ 1978 ຊຶ່ງເປັນຈຸດປ່ຽນທີ່ເຮັດໃຫ້ຈີນກ້າວຂຶ້ນສູ່ເວທີພາກພື້ນ ແລະ ສາກົນ. ຈາກນັ້ນກໍໄດ້ສືບຕໍ່ພັດທະນາເສດຖະກິດຈາກປະເທດທີ່ຜ່ານຜ່າຄວາມທຸກຍາກລຳບາກຫຼັງສົງຄາມ, ປັດຈຸບັນຈີນໄດ້ກາຍເປັນປະເທດທີ່ມີເສດຖະກິດເຂັ້ມແຂງໃນອັນດັບຕົ້ນໆຂອງໂລກ ຊຶ່ງເອີ້ນໄດ້ວ່າເປັນການພັດທະນາທີ່ “ກ້າວກະໂດດ” ຢ່າງແທ້ຈິງ. ໃນດ້ານວິທະຍາສາດ ແລະ ເຕັກໂນໂລຊີ, ພັກກອມມູນິດຈີນໄດ້ສ້າງສິ່ງມະຫັດສະຈັນທີ່ໂລກຍອມຮັບຜ່ານໂຄງການລະດັບສາ ກົນເຊັ່ນ: ໂຄງການອະວະກາດ, ດາວທຽມ, ລົດໄຟຄວາມໄວສູງ, ການຫັນເປັນດີຈີຕອນ ແລະ ການພັດທະນາປັນຍາປະດິດ (AI) ແລະ ດ້ານການພົວພັນຕ່າງປະເທດ, ບົດບາດຂອງຈີນນັບມື້ສູງເດັ່ນຂຶ້ນຜ່ານຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ”, ການສ້າງ “ຄູ່ຮ່ວມຊາຕາກຳຂອງ ມວນມະນຸດ” ແລະ ການຮ່ວມມືຍຸດທະສາດກັບອາຊຽນ ແລະ ກຸ່ມ BRICS ຊຶ່ງສະແດງໃຫ້ເຫັນເຖິງການເປັນແກນກາງໃນລະບົບການເມືອງ ແລະ ການພັດທະນາໂລກ. ມາຮອດປັດຈຸບັນ, ພັກກອມມູນິດຈີນກາຍເປັນພັກການ ເມືອງທີ່ໃຫຍ່ທີ່ສຸດໃນໂລກ ດ້ວຍສະ ມາຊິກພັກຫຼາຍກວ່າ 99 ລ້ານຄົນ. ການນຳພາທີ່ເຂັ້ມແຂງມາຈາກໂຄງສ້າງການຈັດຕັ້ງທີ່ເປັນລະບົບ, ຢຶດໝັ້ນໃນທິດສະດີມາກ ແລະ ການນຳໃຊ້ “ສັງຄົມນິຍົມທີ່ມີສີສັນພິເສດຂອງຈີນ” ຊຶ່ງແມ່ນການປະສົມປະສານລະຫວ່າງກົນໄກຕະຫຼາດ ແລະ ການວາງແຜນແບບລວມສູນຢ່າງມີປະສິດທິຜົນ. ພາຍໃຕ້ການນຳພາຂອງສະ ຫາຍ ສີ ຈິ້ນຜິງ, ພັກໄດ້ສຸມໃສ່ “ຄວາມໃຝ່ຝັນຂອງຈີນ” ເພື່ອຟື້ນຟູຄວາມຈະເລີນຮຸ່ງເຮືອງຂອງປະຊາຊາດຈີນໃນຍຸກໃໝ່. ສະຫາຍ ຄຳມອນ ຈັນທະຈິດ ໄດ້ສະຫຼຸບມ້ວນທ້າຍວ່າ: “105 ປີ ແຫ່ງການເຕີບໃຫຍ່ຂະຫຍາຍ ຕົວຂອງ ສປ ຈີນ ພາຍໃຕ້ການນຳ ພາຂອງພັກກອມມູນິດຈີນແມ່ນສາ ມາດສ້າງໄດ້ຫຼາຍ ສິ່ງມະຫັດສະຈັນ ຊຶ່ງເຮັດໃຫ້ໂລກຮັບຮູ້ ແລະ ເປັນບົດຮຽນທີ່ມີຄຸນຄ່າໃຫ້ແກ່ປະຊາຊາດອື່ນໆໃນການພັດທະນາປະເທດຊາດ”.
ສັງລວມແລ້ວ, ຕະຫຼອດ 105 ປີຜ່ານມາພັກກອມມູນິດຈີນໄດ້ບາກບັ່ນສູ້ຊົນທີ່ຍິ່ງໃຫຍ່, ນຳພາປະຊາຊົນຈີນສາມັກຄີເຂົ້າກັນ ເພື່ອຂຽນໜ້າປະຫວັດສາດໃໝ່ໃນຂະບວນການໃໝ່ແຫ່ງການສ້າງສາປະເທດສັງຄົມນິຍົມທີ່ທັນສະໄໝຢ່າງຮອບດ້ານ ແລະ ເພີ່ມພະລັງແຮງ ໃໝ່ເຂົ້າໃນການສ້າງອະນາຄົດຂອງມວນ ມະນຸດທີ່ດີງາມກວ່າເກົ່າ ໂດຍຮ່ວມກັບປະຊາຊົນປະເທດຕ່າງໆໃນ ໂລກ. ພັກກອມມູນິດຈີນ ໂດຍມີສະຫາຍ ສີ ຈິ້ນຜິງ ເປັນແກນກາງຍິ່ງ ໄດ້ສືບຕໍ່ຢຶດໝັ້ນປະຕິບັດນະໂຍບາຍພື້ນຖານແຫ່ງຊາດ, ເດັດດ່ຽວປະຕິບັດຍຸດທະສາດ ເປີດປະຕູສູ່ພາຍນອກທີ່ຕ່າງຝ່າຍຕ່າງໄດ້ຮັບຜົນປະໂຫຍດ, ສ້າງໂອກາດໃໝ່ໃຫ້ແກ່ໂລກດ້ວຍການພັດທະນາໃໝ່ຂອງຈີນຢ່າງບໍ່ຢຸດຢັ້ງ, ຊຸກຍູ້ສ້າງເສດຖະກິດແບບເປີດປະຕູສູ່ພາຍນອກໃນລະດັບສູງ, ສ້າງຜົນປະໂຫຍດໃຫ້ແກ່ປະຊາຊົນປະເທດຕ່າງໆໃຫ້ດີກວ່າເກົ່າເລັ່ງລັດສ້າງປະເທດເຂັ້ມແຂງດ້ານການຄ້າ, ຊຸກຍູ້ການສ້າງ “ໜຶ່ງແລວ ໜຶ່ງເສັ້ນທາງ” ຮ່ວມກັນໃຫ້ມີການພັດທະນາໃນຄຸນນະພາບສູງ, ປົກປັກຮັກສາສະຖານະເສດຖະກິດ ແລະ ການພົວພັນເສດຖະກິດ-ການຄ້າສາກົນໃຫ້ມີຫຼາຍເຄົ້າ ແລະ ມີຄວາມໝັ້ນທ່ຽງ.
ທົ່ວພັກ, ລັດ ແລະ ປະຊາຊົນລາວບັນດາເຜົ່າມີຄວາມເຊື່ອໝັ້ນຢ່າງໜັກແໜ້ນວ່າ: “ພາຍໃຕ້ການນໍາພາອັນເຂັ້ມແຂງຂອງສູນກາງພັກກອມມູນິດຈີນທີ່ມີສະຫາຍ ສີ ຈິ້ນຜິງ ເປັນແກນກາງ, ປະຊາຊົນຈີນອ້າຍນ້ອງຈະສາມາດຍາດໄດ້ຜົນສໍາເລັດຮອບດ້ານອັນໃໝ່ ໃຫຍ່ຫຼວງກວ່າເກົ່າ” ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XX ຂອງພັກ ກໍຄືການສ້າງສັງຄົມນິຍົມທີ່ເຂັ້ມແຂງທັນສະໄໝ ຮອບດ້ານ, ບັນລຸເປົ້າໝາຍ 100 ປີເຫດການທີສອງ ແລະ ການຟື້ນຟູຄວາມຮຸ່ງເຮືອງສີວິໄລຂອງຊາດຈີນໃຫ້ປະ ກົດຜົນເປັນຈິງຢ່າງມີໄຊ.
ໂດຍ: ດວງຈິດ ສະຫວັດບຸນມີ
ຂາໍ່ນັບຊົມເຊີຍວັນສ້າງຕັ້ງພັກກອມມູນິດຈີນ ຄົບຮອບ 105 ປີ ຢ່າງສຸດໃຈ!
ອະທິບາຍຮູບ:
- ຕອນຄໍ່າວັນທີ 29/6/2026 ທ່ານ ສີຈິ້ນຜິງ ພ້ອມການນຳຈີນ ແລະ ມວນຊົນປະມານ3ຄົນເຂົ້າຮ່ວມງານດົນຕີສະເຫຼີມສະຫຼອງວັນສ້າງຕັ້ງພັກກອມມູນິດຈີນ ຄົບຮອບ105 ປີ
- ຈີນເນັ້ນການກໍ່ສ້າງລົດໄຟຄວາມໄວສູງທີ່ມີຄຸນນະພາບແລະປະສິດທິພາບສູງ
- ນັກບິນອະວະກາດຈີນໃນຍານ Shenzhou-23
ຄໍາເຫັນ