ໃນລະຫວ່າງວັນທີ 17-18 ຕຸລາ ນີ້, ຄະນະຕິດຕາມກວດກາຮ່ວມ ລະຫວ່າງ 3 ສະພາແຫ່ງຊາດ ກໍາປູເຈຍ-ລາວ-ຫວຽດນາມ ຫຼື ຊີແອວວີ (CLV) ໄດ້ເຄື່ອນໄຫວເຮັດວຽກ ຢູ່ແຂວງຢາລາຍ ແລະ ຂວາງ ກອນຕູມ ສສ ຫວຽດນາມ ໂດຍມີ ທ່ານ ສຸ ຍາລາ ປະທານຄະນະກຳມາທິການການຕ່າງປະເທດ, ການຮ່ວມມືສາກົນ, ສື່ ແລະ ຂໍ້ມູນຂ່າວສານ ສະພາແຫ່ງຊາດ ແຫ່ງ ຣາຊະອານາຈັກ ກໍາປູເຈຍ, ທ່ານ ລິນຄໍາ ດວງສະຫວັນ ກໍາມະການຄະນະປະຈໍາ ປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດ ລ້ອມ ສະພາແຫ່ງຊາດລາວ ແລະ ທ່ານ ຫວູ ຮາຍ ຮ່າ ກຳມະການຄະນະປະຈຳ ປະທານກຳມາທິການການຕ່າງປະເທດ ສະພາແຫ່ງຊາດ ແຫ່ງ ສສ ຫວຽດນາມ ພ້ອມຄະນະ ລົງຕິດຕາມກວດກາການຈັດຕັ້ງປະຕິບັດບັນດາສົນທິສັນຍາ ແລະ ສັນຍາສາກົນ, ແຜນປະຕິບັດງານ ແລະ ການດຳເນີນໂຄງການຮ່ວມມື ແລະ ລົງທຶນຂອງລັດຖະບານຂອງສາມປະເທດ ກໍຄື ໂຄງການຊ່ວຍເຫຼືອຂອງຕ່າງປະເທດຢູ່ໃນເຂດ 3 ຫຼ່ຽມພັດທະນາ ກໍາປູເຈຍ-ລາວ-ຫວຽດນາມ, ຕິດຕາມກວດກາ, ຢ້ຽມຢາມໂຄງການ ແລະ ການລົງທຶນໃສ່ການພັດທະນາພື້ນຖານໂຄງລ່າງທາງດ້ານເສດຖະກິດ, ວັດທະນະທຳ, ການສຶກສາ ແລະ ທ່ອງທ່ຽວ ຈຳນວນໜຶ່ງຢູ່ບາງແຂວງທີ່ນອນຢູ່ເຂດສາມຫຼ່ຽມພັດທະນາ, ຕິດຕາມກວດກາການຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອຊຸກຍູ້ສົ່ງເສີມຄວາມສາມັກຄີ, ການຮ່ວມມື, ການເປັນຄູ່ຮ່ວມສົ່ງເສີມການເຊື່ອມໂຍງເຊື່ອມຈອດທາງດ້ານເສດຖະກິດຂອງປະເທດ CLV ເພື່ອກ້າວສູ່ການພັດທະນາແບບກວມລວມ ແລະ ຍືນຍົງ, ຮັບປະກັນສັນຕິພາບ ແລະ ສະຖຽນລະພາບໃນຂົງເຂດ 3 ຫຼ່ຽມພັດທະນາ; ການເຄື່ອນໄຫວເຮັດວຽກຄັ້ງນີ້, ຄະນະຜູ້ແທນທັງ 3 ປະເທດ ໄດ້ໄປຢ້ຽມຢາມເບິ່ງຕົວຈິງຈຸດຫຼັກໝາຍຊາຍແດນເຊື່ອມຕໍ່ຂອງ 3 ປະເທດ ກໍາປູເຈຍ-ລາວ-ຫວຽດນາມ; ຢ້ຽມຢາມດ່ານສາກົນ ພູເກືອ-ເບີອີ ລະຫວ່າງ ສປປ ລາວ ແລະ ສສ ຫວຽດນາມ, ຢາມໂຮງງານປຸງແຕ່ງໝາກໄມ້ຂອງ ບໍລິສັດ Quicornac ຢູ່ແຂວງຢາລາຍ ຊຶ່ງເປັນໂຮງງານສະກັດນໍ້າໝາກໄມ ເພື່ອສົ່ງຂາຍພາຍໃນ ແລະ ຕ່າງປະເທດ; ໃນໂອກາດ ທີ່ຄະນະຕິດຕາມກວດກາຮ່ວມລະຫວ່າງ 3 ສະພາແຫ່ງຊາດ ກໍາປູເຈຍ-ລາວ-ຫວຽດນາມ ເຂົ້າຮ່ວມກອງປະຊຸມພົບປະກັບຜູ້ຕາງໜ້າທີ່ມາຈາກກະຊວງແຜນການ ແລະ ການລົງທຶນ, ຄະນະນຳຂອງແຂວງຢາລາຍ, ກອນຕູມ, ດັກນົງ, ດັກລັກ ແລະ ແຂວງບິງເຟືອກ, ທ່ານ ລິນຄຳ ດວງສະຫວັນ ໄດ້ມີຄຳເຫັນ ແລະ ຕີລາຄາສູງຕໍ່ກອງປະຊຸມທີ່ມີຄວາມໝາຍຄວາມສໍາຄັນໃນຄັ້ງນີ້, ສະແດງຄວາມຊົມເຊີຍຕໍ່ ສສ ຫວຽດນາມ, ແຂວງຢາລາຍ ກໍຄືບັນດາແຂວງທີ່ນອນຢູ່ໃນເຂດສາມຫຼ່ຽມພັດທະນາທີ່ໄດ້ມີຜົນສໍາເລັດຫຼາຍດ້ານ ໂດຍສະເພາະໃນຂົງເຂດວຽກງານການຕ່າງປະເທດ, ວຽກງານການຮ່ວມມືດ້ານເສດຖະກິດ ແລະ ວັດທະນະທຳ-ສັງຄົມ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ ເພື່ອນໍາຜົນປະໂຫຍດຕົວຈິງມາສູ່ປະຊາຊົນຫວຽດນາມ ກໍຄື ປະຊາຊົນສາມປະເທດ ກໍາປູເຈຍ-ລາວ-ຫວຽດນາມ ໃນເຂດສາມຫຼ່ຽມພັດທະນາ. ພ້ອມທັງສະແດງຄວາມເຊື່ອໝັ້ນວ່າ ຜົນຂອງກອງປະຊຸມຕິດຕາມກວດກາຮ່ວມຂອງສາມປະເທດໃນຄັ້ງນີ້ ຈະເປັນພື້ນຖານອັນດີໃຫ້ແກ່ສະພາແຫ່ງຊາດ ຂອງສາມປະເທດ ເພື່ອພິຈາລະນາ ແລະ ຊຸກຍູ້ໃຫ້ລັດຖະບານຂອງສາມປະເທດ ສືບຕໍ່ຮ່ວມມືກັນໃນຕໍ່ໜ້າ; ພ້ອມນັ້ນ, ຜູ້ເຂົ້າຮ່ວມກອງປະຊຸມຍັງໄດ້ຮັບຟັງການລາຍງານ ຈາກຜູ້ຕາງໜ້າຂອງ 5 ແຂວງທີ່ຢູ່ໃນເຂດສາມຫຼ່ຽມພັດທະນາ ຂອງ ສສ ຫວຽດນາມ ລວມມີ: ແຂວງຢາລາຍ, ກອນຕູມ, ດັກລັກ, ດັກນົງ ແລະ ແຂວງບິ່ງເຟືອກ ກ່ຽວກັບສະພາບລວມຕໍ່ກັບສະພາບການຈັດຕັ້ງປະຕິບັດວຽກງານດ້ານການພັດທະນາເສດຖະກິດ-ສັງຄົມ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ ໃນເຂດສາມຫຼ່ຽມພັດທະນາ CLV.
ພາຍຫຼັງການເຄື່ອນໄຫວເຮັດວຽກຢູ່ແຂວງທີ່ນອນຢູ່ໃນເຂດສາມຫຼ່ຽມພັດທະນາ ຢູ່ ສສ ຫວຽດນາມ ແລ້ວ, ຄະນະກວດກາຮ່ວມ ກໍໄດ້ສືບຕໍ່ເຄື່ອນໄຫວເຮັດວຽກຢູ່ດ່ານສາກົນ ເລ່ແທງ-ໂຮຢາດາບ ລະຫວ່າງ ສສ ຫວຽດນາມ ແລະ ຣາຊະອານາຈັກກຳປູເຈຍ, ແຂວງຣັດຕະນະຄີຣີ, ຊຽງແຕງ ຕື່ມອີກ.
(ຂ່າວ-ພາບ: ສພຊ)
ພາຍຫຼັງການເຄື່ອນໄຫວເຮັດວຽກຢູ່ແຂວງທີ່ນອນຢູ່ໃນເຂດສາມຫຼ່ຽມພັດທະນາ ຢູ່ ສສ ຫວຽດນາມ ແລ້ວ, ຄະນະກວດກາຮ່ວມ ກໍໄດ້ສືບຕໍ່ເຄື່ອນໄຫວເຮັດວຽກຢູ່ດ່ານສາກົນ ເລ່ແທງ-ໂຮຢາດາບ ລະຫວ່າງ ສສ ຫວຽດນາມ ແລະ ຣາຊະອານາຈັກກຳປູເຈຍ, ແຂວງຣັດຕະນະຄີຣີ, ຊຽງແຕງ ຕື່ມອີກ.
(ຂ່າວ-ພາບ: ສພຊ)
ຄໍາເຫັນ