ຂະແໜງ ພບ ຈະປັບປຸງການເຮັດວຽກຫຼາຍດ້ານ

ແລະ ມາດຕະການຕ່າງໆທີ່ສອດຄ່ອງ,ຢ່າງມີປະສິດທິຜົນຊຶ່ງໄດ້ເຮັດໃຫ້ຂະແໜງດັ່ງກ່າວສາມາດແກ້ໄຂຄວາມຫຍຸ້ງຍາກໃນດ້ານຕ່າງໆໄດ້ໂດຍພື້ນຖານ ແລະ ສາມາດຂັບເຄື່ອນການເຄື່ອນໄຫວປະຕິບັດແຜນງານຕ່າງໆຍາດໄດ້ຜົນງານຢ່າງຕໍ່ເນື່ອງ.

ທ່ານ ໂພໄຊ ໄຊຍະສອນ ລັດຖະມົນຕີກະຊວງ ພະລັງງານ-ບໍ່ແຮ່ ກ່າວໃນກອງປະຊຸມວຽກງານພະລັງງານ-ບໍ່ແຮ່ ທົ່ວປະເທດປະຈຳປີ 2024ຜ່ານມາວ່າ:ອັນທີ່ເປັນພື້ນຖານຂະແໜງການພວກເຮົາຍັງສາມາດຈັດຕັ້ງປະຕິບັດພາລະບົດບາດ ແລະ ໜ້າທີ່ ເປັນເສນາທິການໃຫ້ແກ່ລັດຖະບານ ແລະ ອົງການ ປົກຄອງແຕ່ລະຂັ້ນ ກ່ຽວກັບການພັດທະນາວຽກງານພະລັງງານ ແລະ ບໍ່ແຮ່ ໄດ້ຢ່າງຖືກຕ້ອງ, ຢຶດຖືຫຼັກກົດໝາຍໂດຍສະເພາະໃນຂະແໜງການກໍມີກົດໝາຍສະເພາະ 3 ສະບັບ ທີ່ເປັນຫຼັກໃນການດໍາເນີນວຽກງານ ແລະ ຄຸ້ມຄອງຂະແໜງການ ຕາມຫຼັກການທາງດ້ານເຕັກນິກສະເພາະຂອງວຽກງານ ຂະແໜງການ ພະລັງງານ ແລະ ບໍ່ແຮ່,ຜົນສໍາເລັດໃນການພັດທະນາ ວຽກງານພະລັງງານ ແລະ ບໍ່ແຮ່,ໃນໄລຍະທີ່ຜ່ານມາ ໄດ້ກາຍເປັນພື້ນຖານທີ່ສໍາຄັນໃຫ້ແກ່ການພັດທະນາເສດຖະກິດ-ສັງຄົມຂອງຊາດທີ່ມີຄຸນນະພາບ, ເປັນຕົ້ນແມ່ນການປະກອບສ່ວນ ເຂົ້າໃນການປະຕິບັດວາລະແຫ່ງຊາດກ່ຽວກັບການແກ້ໄຂສະພາບຄວາມຫຍຸ້ງຍາກທາງດ້ານການເງິນ ງົບປະມານໃນໄລຍະທີ່ຜ່ານມາ ແລະ ທັງເປັນຂະແໜງການທີ່ຊ່ວຍຂັບເຄື່ອນແກ້ໄຂສິ່ງທ້າທາຍທາງດ້ານເສດຖະກິດທີ່ປະເທດເຮົາກຳລັງປະເຊີນຢູ່.

ທ່ານກ່າວຕື່ມວ່າ:ໃນໄລຍະທີ່ຜ່ານມາ,ການພັດທະນາວຽກງານພະລັງງານ ແລະ ບໍ່ແຮ່ກໍຍັງມີຈຸດອ່ອນ ແລະ ດ້ານທີ່ເຮັດບໍ່ທັນໄດ້ດີ, ເປັນຕົ້ນ:ຄຸນນະພາບໃນການເຮັດບົດບາດ ແລະ ໜ້າທີ່ເປັນເສນາທິການໃຫ້ແກ່ລັດຖະບານ ແລະ ອົງການປົກຄອງທ້ອງຖິ່ນ ກ່ຽວກັບການຄຸ້ມຄອງວຽກງານພະລັງງານ ແລະ ບໍ່ແຮ່ ຍັງບໍ່ສູງເທົ່າທີ່ຄວນ, ສະພາບການພັດທະນາຍັງຂາດຄວາມດຸ່ນດ່ຽງ,ຄວາມສັກສິດ ໃນການບັງຄັບໃຊ້ກົດໝາຍ ແລະ ນິຕິກຳຢູ່ໃນບາງບ່ອນຍັງບໍ່ທັນສູງເທົ່າທີ່ຄວນ.ສະນັ້ນ,ຜ່ານມາຈຶ່ງມີຫຼາຍປະກົດການຫຍໍ້ທໍ້ເກີດຂຶ້ນ, ການຄົ້ນຄວ້າ, ສຶກສາຂໍ້ມູນບາງໂຄງການຍັງບໍ່ຊັດເຈນ, ຮັດກຸມ, ເຮັດໃຫ້ການອະນຸມັດໃນບາງໂຄງການຍັງບໍ່ສອດຄ່ອງ ແລະ ອື່ນໆ, ສະພາບການປະຕິບັດສັນຍາ, ພັນທະດ້ານຕ່າງໆຂອງຜູ້ປະກອບການ, ຜູ້ລົງທຶນຈໍານວນໜຶ່ງຍັງບໍ່ທັນຖືກຕ້ອງ, ເຂັ້ມງວດ, ຂາດຄວາມເອົາໃຈໃສ່ ແລະ ທັນເວລາ. ເຫັນໄດ້ໃນປັດຈຸບັນນີ້ ການອະນຸມັດໂຄງການລົງທຶນ ໃນຂະແໜງການ ພບ ນັ້ນກໍມີຫຼາຍ,ຈຶ່ງຮຽກຮ້ອງໃຫ້ຕ້ອງໄດ້ມີການປັບປຸງແບບແຜນວິທີເຮັດວຽກຫຼາຍອັນ ເພື່ອໃຫ້ການປະຕິບັດໜ້າທີ່ຂອງອໍານາດລັດໃນການຄຸ້ມຄອງວຽກງານຕາມຫຼັກວິຊາການ ໄດ້ຖືກຈັດຕັ້ງຢ່າງເອົາໃຈໃສ່ຮັບປະກັນ. ຄວາມຈຳເປັນໃນການເພີ່ມທະວີປະສິດທິພາບໃນການປະສານງານເຮັດວຽກພາຍໃນຂະແໜງການ ລະຫວ່າງສູນກາງ ແລະ ທ້ອງຖິ່ນ.(ຂ່າວ-ພາບ:ສຳນານ)