ພາຍໃຕ້ຫົວຂໍ້ “ຄົນລາວຮ້ອງເພງຈີນ” ຄັ້ງທີ 3 ແລະ ງານວາງສະແດງຮູບພາບຄົບຮອບ 10 ປີ ຂອງສູນວັດທະນະທໍາຈີນ ປະຈໍາ ສປປ ລາວ ຂຶ້ນໃນວັນທີ 18 ພະຈິກ ຜ່ານມາ ທີ່ຫໍວັດທະນະທໍາແຫ່ງຊາດ ໃຫ້ກຽດເຂົ້າຮ່ວມຂອງ ທ່ານ ວັນສີ ກົວມົວ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ທ່ານນາງ ຟາງຫົງ ເອກອັກຄະລັດຖະທູດ ສປ ຈີນ ປະຈໍາ ສປປ ລາວ, ທ່ານ ນາງ ຫຼີຢີ່ຜິງ ຫົວໜ້າສູນວັດທະນະທໍາຈີນ ປະຈໍາ ສປປ ລາວ, ຄະນະກໍາມະການ ພ້ອມດ້ວຍມວນຊົນຊາວນະຄອນຫຼວງວຽງຈັນ ແລະ ຊາວຈີນ ອາໃສ ຢູ່ລາວ ເຂົ້າຮ່ວມ.
ການແຂ່ງຂັນຄົນລາວຮ້ອງເພງຈີນ ໃນຄັ້ງນີ້, ມີຜູ້ເຂົ້າຮ່ວມແຂ່ງຂັນທັງໝົດ 12 ຄົນ, ຜ່ານການແຂ່ງຂັນ ຮຸ່ນເຍົາວະຊົນ ລາງວັນທີ 1 ໄດ້ແກ່ ທ້າວ ອິນທະວົງ ຫົງພັກດີ ໄດ້ຮັບເງິນລາງວັນ 18,000, 000 ກີບ, ພ້ອມໃບຢັ້ງຢືນ, ພ້ອມທັງ ໄດ້ຮັບ ລາງວັນຂວັນໃຈມວນຊົນ ໄດ້ຮັບ ໂທລະສັບມືຖື ມູນຄ່າ 8,000,000 ກີບ ພ້ອມໃບຢັ້ງຢືນ; ລາງວັນທີ 2 ໄດ້ແກ່ນາງ ຟ້າປະດັບເພັດ ພົງພິລັກ ໄດ້ຮັບເງິນລາງວັນ 10,000, 000 ກີບ ພ້ອມໃບຢັ້ງຢືນ; ລາງວັນທີ 3 ໄດ້ແກ່ ນາງ ອາລຸນນີ ອິນທະວົງ ໄດ້ເງິນລາງວັນ 5,000, 000 ກີບ, ພ້ອມໃບຢັ້ງຢືນ. ສຳລັບ ຮຸ່ນໄວໜຸ່ມ ລາງວັນທີ 1 ໄດ້ແກ່ ທ້າວ ບຸນສຸກ ຄັງໄຊ ໄດ້ຮັບເງິນລາງວັນ 18,000, 000 ກີບ ພ້ອມໃບຢັ້ງຢືນ; ລາງວັນທີ 2 ໄດ້ແກ່ ທ້າວ ກຸນ ຈິດຕະສອນ ໄດ້ເງິນລາງວັນ 10,000, 000 ກີບ, ພ້ອມໃບຢັ້ງຢືນ; ລາງວັນທີ 3 ໄດ້ແກ່ ນາງ ຈິນດາ ພິມພາ ໄດ້ຮັບເງິນລາງວັນ 5,000, 000 ກີບ, ພ້ອມໃບຢັ້ງຢືນ.
ໂອກາດດັ່ງກ່າວ, ທ່ານ ວັນສີ ກົວມົວ ກ່າວວ່າ: ງານແຂ່ງຂັນຮ້ອງເພງໃນຄັ້ງນີ້, ເປັນອີກກິດຈະກຳໜຶ່ງ ທີ່ມີຄວາມໝາຍຄວາມສໍາຄັນຍິ່ງຂອງການແລກປ່ຽນວັດທະນະທໍາ ລາວ-ຈີນ ຜ່ານການຮ້ອງເພງ. ພ້ອມທັງ ສະແດງຄວາມຂອບໃຈຕໍ່ ສູນວັດທະນະທໍາຈີນ ທີ່ໄດ້ສ້າງໂອກາດໃຫ້ເຍົາວະຊົນ ແລະ ໄວໜຸ່ມລາວ ທີ່ມີພອນສະຫວັນ ດ້ານການຮ້ອງເພງ ໄດ້ສະແດງຄວາມສາມາດຢ່າງເຕັມທີ່. ພ້ອມນີ້, ທ່ານຍັງໄດ້ຕີລາຄາສູງຕໍ່ຜົນສໍາເລັດຂອງສູນວັດທະນະທຳ ສປ ຈີນ ປະຈຳ ສປປ ລາວ ຕະຫຼອດໄລຍະ 10 ປີຜ່ານມາ (2014-2024) ໃນການເຮັດໜ້າທີ່ເປັນຂົວຕໍ່ທາງ ດ້ານວັດທະນະທຳ ລະຫວ່າງສອງປະເທດ ລາວ-ຈີນ-ຈີນ-ລາວ.
ທ່ານ ນາງ ຫຼີຢີ່ຜິງ ໄດ້ກ່າວວ່າ: ໃນໄລຍະ 10 ປີຜ່ານມາ ສູນວັດທະນະທໍາຈີນ ປະຈໍາ ສປປ ລາວ ໄດ້ສຸມໃສ່ 7 ໜ້າທີ່ຫຼັກ ຄື: ເຜີຍແຜ່ສະພາບການປະເທດຈີນ, ຈັດກິດຈະກໍາດ້ານວັດທະນະທໍາ, ການສົນທະນາດ້ານວັດທະນະທໍາ ການສົ່ງເສີມການທ່ອງທ່ຽວ, ຊຸກຍູ້ເຜີຍແຜ່ຂະແໜງການດ້ານວັດທະນະທໍາ ແລະ ທ່ອງທ່ຽວ, ການສິດສອນ ແລະ ການຝຶກອົບຮົມ, ການໃຫ້ບໍລິການດ້ານຂໍ້ມູນ, ໄດ້ຈັດກິດຈະກໍາແລກປ່ຽນວັດທະນະທໍາ ແລະ ທ່ອງທ່ຽວ ທັງໝົດ 305 ຄັ້ງ, ມີຜູ້ເຂົ້າຮ່ວມຫຼາຍກວ່າ 200,000 ຄົນ, ໃນໄລຍະ 3 ປີ ສື່ມວນຊົນຫຼັກຂອງລາວ ແລະ ຈີນໄດ້ລາຍງານຂ່າວສານລວມທັງໝົດ 413 ບົດຂ່າວ. ສູນວັດທະນະທໍາຈີນ ໄດ້ກາຍເປັນປ່ອງປະຕູອັນສຳຄັນ ເພື່ອໃຫ້ປະຊາຊົນລາວໄດ້ສຳຜັດກັບວັດທະນະທໍາຈີນ, ເປັນເວທີສໍາຄັນເພື່ອລົງເລິກການຮ່ວມມືດ້ານວັດທະນະທໍາ ແລະ ທ່ອງທ່ຽວ ລາວ-ຈີນ, ເປັນຂົວຕໍ່ທີ່ສຳຄັນໃນການເພີ່ມທະວີ ການແລກປ່ຽນວັດທະນະທໍາ ແລະ ການຮຽນຮູ້ຊຶ່ງກັນ ດ້ານອາລິຍະທໍາ ຂອງສອງປະເທດ ແລະ ເພີ່ມທະວີການໄປມາຫາສູ່ທີ່ດີລະຫວ່າງປະຊາຊົນສອງຊາດ, ປະກອບສ່ວນສໍາຄັນໃນການຊຸກຍູ້ການຮ່ວມມືແລກປ່ຽນວັດທະນະທໍາ ແລະ ທ່ອງທ່ຽວ ລາວ-ຈີນ ແລະ ປະກອບສ່ວນສໍາຄັນໃນການສ້າງຄູ່ຮ່ວມຊາຕາກໍາ ລາວ-ຈີນ.
ຂ່າວ-ພາບ: ຍຸພິນທອງ-ບຸນອູ້ມ
ຄໍາເຫັນ