 |
ໃນໂອກາດດັ່ງກ່າວ, ທ່ານ ຄຳພັນ ອັ່ນລາວັນ ໄດ້ສະແດງຄວາມຍິນດີ ແລະ ຂອບໃຈ ພ້ອມທັງຕີລາຄາສູງ ຕໍ່ການຮ່ວມມື ແລະ ຊ່ວຍເຫຼືອຈາກມູນນິທິໄຊພັດທະນາ ແລະ ສຳນັກງານ ກປຣ ທີ່ຍາມໃດກໍໃຫ້ການສະໜັບສະໜູນຊ່ວຍເຫຼືອ ສປປ ລາວ ໂດຍມີ ກົມສົມເດັດພະເທບຣັດ ເປັນຜູ້ໃຫ້ດຳຣິ ແກ່ການພົວພັນ ແລະ ຮ່ວມມື ລາວ - ໄທ ໂດຍສະເພາະຕໍ່ການພັດທະນາຊີວິດການເປັນຢູ່ຂອງປະຊາຊົນໃຫ້ດີຂຶ້ນເລື້ອຍໆ. ພ້ອມກັນນີ້, ທ່ານຍັງໄດ້ສະແດງຄວາມຂອບໃຈ ກະຊວງການຕ່າງປະເທດໄທ ໂດຍສະເພາະ ກົມອາຊີຕາເວັນອອກ ແລະ ກົມຮ່ວມມືລະຫວ່າງປະເທດ (TICA) ທີ່ເປັນໃຈກາງຊຸກຍູ້ສົ່ງເສີມການພົວພັນ ແລະ ການຈັດຕັ້ງປະຕິບັດໂຄງການຮ່ວມມື ລາວ - ໄທ ໄດ້ເປັນຢ່າງດີຕະຫຼອດມາ. ທ່ານ ທູດລາວ ໄດ້ຕີລາຄາສູງຕໍ່ການແລກປ່ຽນການຢ້ຽມຢາມຂອງການນຳຂັ້ນສູງຂອງສອງປະເທດຢ່າງເປັນປົກກະຕິ ໂດຍສະເພາະການຢ້ຽມຢາມ ສປປ ລາວ ຂອງ ກົມສົມເດັດພະເທບຣັດ ໃນລະຫວ່າງ 21-24 ເມສາ 2025 ເພື່ອຕິດຕາມໂຄງການໃນພະຣາຊະດຳຣິ ແລະ ໂຄງການຮ່ວມມື ລາວ - ໄທ ກໍຄືການຈັດຕັ້ງປະຕິບັດບັນດາໂຄງການຮ່ວມມື ໃນຂອບການຮ່ວມມືທາງດ້ານວິຊາການ ເປັນຕົ້ນແມ່ນ ດ້ານກະສິກໍາ, ສາທາລະນະສຸກ ແລະ ການສຶກສາ. ພ້ອມກັນນີ້, ທ່ານ ຄຳພັນ ອັ່ນລາວັນ ຍັງໄດ້ຖືໂອກາດນີ້ ສະແດງຄວາມຮູ້ບຸນຄຸນເປັນຢ່າງສູງແດ່ ກຣົມສົມເດັດພຣະເທບຣັດ ທີ່ມີພຣະຣາຊະດຳຣິ ແລະ ຕິດຕາມການຊ່ວຍເຫຼືອ ສປປ ລາວ ຢ່າງຕໍ່ເນື່ອງໃນຫຼາຍໆປີຜ່ານມາ ແລະ ຫວັງວ່າ ການສະໜັບສະໜູນ ແລະ ການຮ່ວມມືຊ່ວຍເຫຼືອທີ່ສຳຄັນນີ້ ຈະໄດ້ຮັບການເສີມຂະຫຍາຍຍິ່ງໆຂຶ້ນ.
ສຳລັບກິດຈະກຳຄັ້ງນີ້, ດຳເນີນໄປດ້ວຍບັນຍາກາດແຫ່ງໄມຕິຈິດມິດຕະພາບ ແລະ ຄວາມສາມັກຄີ, ການແຂ່ງຂັນກິລາດຳເນີນໄປດ້ວຍນໍ້າໃຈກິລາ, ລວມທັງງານລ້ຽງທີ່ມີບັນຍາກາດມ່ວນຊື່ນເພື່ອເປັນການຮັດແໜ້ນຄວາມສາມັກຄີ ລະຫວ່າງ ສະຖານເອກອັກຄະລັດຖະທູດ ແຫ່ງ ສປປ ລາວ, ມູນນິທິໄຊພັດທະນາ, ສຳນັກງານເພື່ອປະສານງານໂຄງການອັນເນື່ອງມາຈາກພະຣາຊະດຳຣິ (ກປຣ), ກະຊວງການຕ່າງປະເທດໄທ ແລະ ສູນພັດທະນາ ແລະ ບໍລິການດ້ານການກະເສດ ຫ້ວຍຊອນ-ຫ້ວຍຊົ້ວ ຊຶ່ງເປັນກິດຈະກໍາໜຶ່ງທີ່ສໍາຄັນໃນໂອກາດສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລາວ - ໄທ ຄົບຮອບ 75 ປີ.
ຂ່າວ: ສະຖານທູດລາວ ປະຈຳ ບາງກອກ
ຄໍາເຫັນ