ນັກພະຍາກອນອາກາດຄາດຄະເນວ່າ: ແອວນີໂຢ ທີ່ຮຸນແຮງຂຶ້ນນີ້ຈະເຮັດໃຫ້ຝົນຕົກໜັກໃນທະວີບອາເມຣິກາ, ໃນຂະນະທີ່ອາຊີຈະປະເຊີນກັບສະພາບອາກາດຮ້ອນ ແລະ ແຫ້ງແລ້ງ ຊຶ່ງປັດຈຸບັນກຳລັງສົ່ງຜົນກະທົບຕໍ່ການປູກພືດຜົນ ແລະ ສ້າງຄວາມກັງວົນກ່ຽວກັບການສະໜອງອາຫານໃນພາກພື້ນດັ່ງກ່າວທີ່ມີປະຊາກອນໜາແໜ້ນທີ່ສຸດໃນໂລກ.
ສຳນັກງານອຸຕຸນິຍົມວິທະຍາອົສຕຣາລີລະບຸໃນຖະແຫຼງການວັນທີ 16 ມິຖຸນາ ຜ່ານມາວ່າ: ອຸນຫະພູມໜ້ານ້ຳທະເລໃນບໍລິເວນດັ່ງກ່າວໄດ້ສູງເກີນຂອບເຂດຂອງແອວນີໂຢແລ້ວ, ໃນຂະນະທີ່ຕົວຊີ້ວັດທາງດ້ານບັນຍາກາດທັງໝົດສອດຄ່ອງກັບການເກີດປະກົດການດັ່ງກ່າວ.
ຜົນການພະຍາກອນຊີ້ໃຫ້ເຫັນວ່າແອວນີໂຢຄັ້ງນີ້ຈະຮຸນແຮງຫາຮຸນແຮງຫຼາຍ, ໂດຍອີງໃສ່ອຸນຫະພູມທີ່ອຸ່ນຂຶ້ນໃນມະຫາສະໝຸດປາຊີຟິກເຂດຮ້ອນພາກກາງ, ຖະແຫຼງການດັ່ງກ່າວຍັງລະບຸວ່າຕື່ມວ່າ: ຮູບແບບຈຳລອງສະພາບອາກາດປະມານເຄິ່ງໜຶ່ງຊີ້ໃຫ້ເຫັນວ່າ ແອວນີໂຢ ຄັ້ງນີ້ອາດຈະຮຸ່ນແຮງຫຼາຍຈົນບັນລຸລະດັບສູງສຸດທີ່ເຄີຍບັນທຶກໄວ້ຕັ້ງແຕ່ປີ 1950.
ນັກວິທະຍາສາດຊີ້ໃຫ້ເຫັນວ່າ: ການປ່ຽນແປງຂອງດິນຟ້າອາກາດຈະເຮັດໃຫ້ຜົນກະທົບຂອງແອວນີໂຢ ໃນປີນີ້ຮຸ່ນແຮງຍິ່ງຂຶ້ນ.
ສຳນັກງານອຸຕຸນິຍົມວິທະຍາໄດ້ອະທິບາຍວ່າ: ແອວນີໂຢ ເປັນປະກົດການທີ່ອຸນຫະພູມໜ້ານ້ຳທະເລໃນມະຫາສະໝຸດປາຊີຟິກພາກກາງ ແລະ ຕາເວັນອອກອຸ່ນຂຶ້ນເປັນໄລຍະໆ, ໂດຍປົກກະຕິແລ້ວຈະເຮັດໃຫ້ມີຝົນຕົກໜ້ອຍລົງໃນລະດູໜາວ ແລະ ລະດູໃບໄມ້ປົ່ງ, ໂດຍສະເພາະຕາມແຄມຝັ່ງທະເລທາງທິດຕາເວັນອອກຂອງອົສຕຣາລີ ແລະ ເຮັດໃຫ້ອຸນຫະພູມໃນຕອນກາງເວັນສູງຂຶ້ນໃນພາກໃຕ້.
ແອວນີໂຢ ໄດ້ສ້າງຄວາມເສຍຫາຍຢ່າງຮ້າຍແຮງຕໍ່ອົສຕຣາລີ, ເພາະສົ່ງຜົນກະທົບຕໍ່ການຜະລິດກະສິກຳຂອງປະເທດ. ໂດຍອົສຕຣາລີແມ່ນໜຶ່ງໃນຜູ້ສົ່ງອອກເຂົ້າສາລີ, ນ້ຳຕານ ແລະ ຊີ້ນງົວທີ່ໃຫຍ່ທີ່ສຸດໃນໂລກ.
ກ່ອນໜ້ານີ້, ແອວນີໂຢ ຄັ້ງຫຼ້າສຸດທີ່ອົສຕຣາລີປະສົບໃນປີ 2023-2024 ເຮັດໃຫ້ເກີດໄລຍະເວລາ 3 ເດືອນທີ່ແຫ້ງແລ້ງທີ່ສຸດເທົ່າທີ່ເຄີຍບັນທຶກໄວ້. ສ່ວນແອວນີໂຢ ທີ່ຮ້າຍແຮງທີ່ສຸດເກີດຂຶ້ນໃນປີ 2015-2016, ເຮັດໃຫ້ເກີດໄພແຫ້ງແລ້ງຢ່າງກວ້າງຂວາງ ແລະ ເຮັດໃຫ້ການຜະລິດທັນຍາພືດ ແລະ ພືດນ້ຳມັນຫຼຸດລົງຢ່າງຫຼວງຫຼາຍ.
ຄໍາເຫັນ