ທ່ານ ສຸກສະຫວາດ ສີສຸກ ຜູູ້ຈັດການສະຖານີຂົນສົ່ງໂດຍສານທາງໄກສາຍໃຕ້ ນະຄອນຫຼວງວຽງຈັນ ໃຫ້ສໍາພາດ ຕໍ່ຜູ້ສື່ຂ່າວ ໃນວັນທີ 9 ເມສານີ້ ທີ່ຄິວລົດສາຍໃຕ້ ວ່າ: ປີໃໝ່ລາວ 2025 ນີ້ ຄິວລົດໂດຍສານທາງໄກສາຍໃຕ້ ແມ່ນມີຄວາມພ້ອມ 100% ໃນການໃຫ້ບໍລິການຂົນສົ່ງຜູ້ໂດຍສານ ທີ່ຈະເດີນທາງໄປຍັງພາກໃຕ້. ໄລຍະຜ່ານມາ ແມ່ນໄດ້ມີການປະຊາສໍາພັນໃຫ້ບັນດາຜູ້ປະກອບການ ຂອງແຕ່ລະບໍລິສັດ ໃນການກວດກາລົດ, ກວດກາເຕັກນິກລົດ ຂອງຕົນ ເພື່ອໃຫ້ບໍລິການລູກຄ້າໄດ້ຢ່າງປອດໄພ ໄລຍະກະກຽມຫຼິ້ນບຸນປີໃໝ່, ນັບແຕ່ ວັນທີ 11, 12, 13 ແມ່ນໄດ້ເພີ່ມຖ້ຽວລົດ ຈາກປົກກະຕິ 60 ກວ່າຖ້ຽວ ມາເປັນ 80 ກວ່າຖ້ຽວ ໝາຍຄວາມວ່າ 1 ມື້ ຢ່າງໜ້ອຍສຸດ 20 ຖ້ຽວ/ມື້. ໂອກາດນີ້ ທ່ານ ສຸກສະຫວາດ ສີສຸກ ຍັງໄດ້ແນະນໍາມາຍັງຜູ້ໂດຍສານ ທີ່ຈະເດີນທາງນໍາລົດສາຍໃຕ້ ໃຫ້ບັນດາທ່ານ ເພື່ອເວລາໄວ້ລ່ວງໜ້າ ຈັກ 2 ຊົ່ວໂມງ ບາງຄັ້ງ ການອອກເດີນທາງຕາມເວລາທີ່ໄດ້ລະບຸໄວ້ນັ້ນ ອາດຈະບໍ່ຕົງໂມງ ຍ້ອນວ່າ ຖ້າຫາກວ່າ ລົດຄັນດັ່ງກ່າວ ມີຈໍານວນຜູ້ໂດຍສານຂຶ້ນເຕັມ ກໍແມ່ນອອກລົດເລີຍ. ຕົວຢ່າງ ຜູ້ໂດຍສານເຄີຍເດີນທາງ 9 ໂມງ, ອາດຈະໄປໃຫ້ໄວກວ່ານັ້ນ 19 ໂມງ ຫຼື 19 ໂມງ 30 ຖ້າຜູ້ໂດຍສານມີຄວາມພ້ອມກໍຢາກໃຫ້ເດີນທາງວັນທີ 9-10 ເມສານີ້ ການເດີນທາງຈຶ່ງຈະບໍ່ໄດ້ແອອັດ, ການສັ່ງຈ່ອງປີ້ VIP ສາມາດຈອງໄດ້ລ່ວງໜ້າ, ສ່ວນຜູ້ໂດຍສານທີ່ຈະເດີນທາງດ້ວຍລົດທໍາມະດາ ແມ່ນໄປຊື້ປີ້ ແລ້ວຂຶ້ນລົດເລີຍ, ຈໍານວນຜູ້ໂດຍສານ ທີ່ເຄີຍຂີ່ລົດນໍາບໍລິສັດໃດກໍໃຫ້ສັ່ງຈອງນໍາບໍລິສັດນັ້ນໆກໍໄດ້ ແລະ ທີ່ສໍາຄັນ ແມ່ນໃຫ້ບັນດາທ່ານຄໍານຶງວ່າ ເມື່ອຊື້ປີ້ແລ້ວ ຄວນເບິ່ງເວລາໃຫ້ລະອຽດ ລົດຈະອອກໂມງໃດແທ້ ກົງກັນຂ້າມ ສໍາລັບທ່ານໃດຊື້ປີ້ ແຕ່ບໍ່ໄດ້ລະບຸເວລາໃສ່ໃນປີ້ນັ້ນ ແມ່ນສາມາດຂຶ້ນລົດເລີຍ, ຂໍຝາກນໍາທ່ານຜູ້ໂດຍສານວ່າ ຖ້າທ່ານບໍ່ແນ່ໃຈ ຫຼື ບໍ່ພ້ອມ ຈະເດີນທາງເວລາໃດແທ້ ບໍ່ຄວນເອົາເຄື່ອງຂຶ້ນລົດເທື່ອ ເພາະວ່າເຄື່ອງ ແລະ ຜູ້ໂດຍສານອາດຈະບໍ່ໄດ້ໄປພ້ອມກັບລົດຄັນດັ່ງກ່າວ. ຖ້າຫາກວ່າ ມີກໍລະນີ ຜູ້ໂດຍສານຢາກຂຶ້ນກາງທາງ ກໍຄວນເບີ່ງວ່າ ລົດຄັນດັ່ງກ່າວນັ້ນເຕັມແລ້ວບໍ ຖ້າຫາກວ່າ ເຕັມແລ້ວ ຄວນຈະລໍຖ້າຄັນຕາມຫຼັງມາ ເພາະວ່າ ລົດຈະແລ່ນທຸກໆ 15 ນາທີ ຫຼື ທຸກໆ 20 ນາທີ, ລາຄາປີ້ລົດ ແມ່ນລາຄາຕາມປົກກະຕິຄືເກົ່າ ທີ່ໄດ້ປະຕິບັດມາ ຕັ້ງແຕ່ວັນທີ 13/10/2023, ລົດເມອອກຖ້ຽວທໍາອິດ ແມ່ນເວລາ 4 ໂມງເຊົ້າ ຈົນຮອດ 21 ໂມງ ຫຼື ບາງມື້ ກໍຮອດເວລາ 22 ໂມງ. ວຽງຈັນ-ສະຫວັນ ລົດທໍາມະດາ ລາຄາ 200,000 ກີບ, ລົດດ່ວນ VIP2 230,000 ກີບ, ລົດດ່ວນ VIP1 250,000 ກີບ, ວຽງຈັນ-ປາກເຊ ລົດທໍາມະດາ ລາຄາ 270,000 ກີບ, ລົດດ່ວນ VIP2 300,000 ກີບ, ລົດດ່ວນ VIP1 320,000 ກີບ, ລາຍລະອຽດ ໂທ: 020 77766651, 020 22740521.
ໂອກາດດີປີໃໝ່ລາວ 2025, ທ່ານ ສຸກສະຫວາດ ສີສຸກ ໄດ້ຝາກຄໍາອວຍພອນມາຍັງທ່ານຜູ້ໂດຍສານທຸກໆທ່ານ ຈົ່ງມີສຸຂະພາບແຂງແຮງ ປະສົບຜົນສໍາເລັດໃນໜ້າທີ່ການງານ, ສົມດັ່ງປາຖະໜາທຸກປະການ ປີໃໝ່ ຂໍໃຫ້ສິ່ງທີ່ດີໆເຂົ້າມາໃນຊີວິດຂອງພວກທ່ານດ້ວຍ.
(ຂ່າວ: ແສງຈັນ)
ຄໍາເຫັນ