ແຂວງຫຼວງນໍ້າທາ ສົ່ງເສີມຊາວກະສິກອນປູກພືດລະດູແລ້ງໃຫ້ກາຍເປັນສິນຄ້າ 

ຕາມການໃຫ້ສໍາພາດຂອງທ່ານ ພິມແກ້ວ ທໍາລະສິນ ກໍາມະການພັກແຂວງ ຫົວໜ້າພະແນກກະສິກໍາ ແລະ ປ່າໄມ້ແຂວງຫຼວງນໍ້າທາ ຫວ່າງບໍ່ດົນມານີ້ວ່າ:  ການເກັບກ່ຽວມ້ຽນມັດເຂົ້ານາປີຂອງຊາວກະສິກອນພາຍໃນແຂວງຫຼວງນໍ້າທາປີນີ້ ທົ່ວແຂວງ ມີເນື້ອທີ່ປູກເຂົ້າທັງໝົດ 16.800  ເຮັກຕາ, ໃນນີ້ເຂົ້າທີ່ຊາວກະສິກອນນໍາມາປູກມີເຂົ້າຕາຂຽດ, ເຂົ້າໄກ່ນ້ອຍ, ເຂົ້ານໍ້າທາ 1, ເຂົ້າຫອມມະລິ, ເຂົ້າອານນ້ອຍ ແລະ ເຂົ້າອົບປົບ ສະເລ່ຍສະມັດຖະພາບ 4,5 ໂຕນຕໍ່ເຮັກຕາ, ຖ້າທຽບໃສ່ປີຜ່ານມາແມ່ນຫຼຸດລົງສາເຫດກໍຍ້ອນວ່າ ຊາວກະສິກອນຈໍານວນໜຶ່ງ ໄດ້ຫັນໄປປູກພືດຊະນິດອື່ນໆເຊັ່ນ: ໄມ້ອຸດສາຫະກໍາ ທີ່ມີລາຍຮັບດີກວ່າ, ການຫັນປ່ຽນເນື້ອທີ່ນາເຮັດໜອງປາ ແລະ ການກໍ່ສ້າງອີກຈໍານວນໜຶ່ງ, ເຮັດໃຫ້ເນື້ອທີ່ນາປູກເຂົ້າຫຼຸດລົງ ແລະ ໄດ້ຮັບຜົນກະທົບຈາກການລະບາດຂອງພະຍາດໃບເຂົ້າເຫຼືອງເຮັດໃຫ້ຕົ້ນເຂົ້າຕາຍເປັນຕົ້ນແມ່ນເກີດຂຶ້ນກັບແນວພັນເຂົ້າຕາຂຽດ, ມາເຖິງປັດຈຸບັນການເກັບກ່ຽວເຂົ້ານາປີໃນທົ່ວແຂວງແມ່ນສໍາເລັດແລ້ວ 100% ແລະ ທ່ານຍັງໄດ້ໃຫ້ຮູ້ຕື່ມວ່າ: ນອກຈາກຊາວກະສິກອນໄດ້ເຮັດການຜະລິດປູກເຂົ້ານາປີແລ້ວ ກໍໄດ້ຜະລິດເຂົ້ານາແຊງ ແລະ ປູກພືດລະດູແລ້ງໃນເຂດທີ່ມີເງື່ອນໄຂທີ່ອໍານວຍຄວາມສະດວກຊຶ່ງທາງພະແນກກະສິກໍາ ແລະ ປ່າໄມ້ແຂວງຫຼວງນໍ້າທາ ໄດ້ສົມທົບກັບພາກສ່ວນທີ່ກ່ຽວຂ້ອງເອົາໃຈໃສ່ລົງຊຸກຍູ້ສົ່ງເສີມຊາວກະສິກອນຢູ່ແຂວງຫຼວງນໍ້າທາທີ່ພວມລົງມືເຮັດນາແຊງ ແລະ ປູກພືດລະດູແລ້ງໃຫ້ຫຼາຍກາຍເປັນສິນຄ້າເພື່ອພັດທະນາຊີວິດການເປັນຢູ່ໃຫ້ນັບມື້ດີຂຶ້ນ,  ດ້ວຍການສົ່ງເສີມຊາວກະສິກອນປູກເຂົ້ານາແຊງໃນເນື້ອທີ່ 760 ເຮັກຕາ, ຄາດວ່າຜົນຜະລິດຈະໃຫ້ໄດ້ 3.108 ໂຕນ. ຄຽງຄູ່ກັນນີ້ກໍໄດ້ສົ່ງເສີມຊາວກະສິກອນປູກພືດລະດູແລ້ງເປັນຕົ້ນ:  ປູກກ້ວຍ(ກ້ວຍສະອາດ) ໃນເນື້ອທີ່ 445 ເຮັກຕາ, ຜົນຜະລິດໃຫ້ໄດ້ 14.225 ໂຕນ, ໝາກແຕງໂມເນື້ອທີ່ 1.470 ເຮັກຕາ, ຜົນຜະລິດໃຫ້ໄດ້ 15.250 ໂຕນ, ມັນຕົ້ນ 2.224 ເຮັກຕາ,ຜົນຜະລິດໃຫ້ໄດ້ 9.545ໂຕນ, ໝາກອຶ 582 ເຮັກ
ຕາ, ຜົນຜະລິດໃຫ້ໄດ້ 11.040 ໂຕນ, ໝາກຖົ່ວເບີ 310 ເຮັກຕາ, ຜົນຜະລິດໃຫ້ໄດ້ 1.830 ໂຕນ, ຖົ່ວເຫຼືອງ 492 ເຮັກຕາ, ຜົນຜະລິດໃຫ້ໄດ້ 6.037 ໂຕນ, ອ້ອຍ 9.469 ເຮັກຕາ, ຜົນຜະລິດໃຫ້ໄດ້ 710.040 ໂຕນ, ໝາກກ້ຽງຫວານ 64 ເຮັກຕາ, ຜົນຜະລິດໃຫ້ໄດ້ 3.500ໂຕນ  ແລະ ປູກຢາງພາລາ 36.404 ເຮັກຕາ. ພ້ອມດຽວກັນນີ້ທາງພະແນກກະສິກໍາ ແລະ ປ່າໄມ້ແຂວງຫຼວງນໍ້າທາກໍໄດ້ມີແຜນຮອງຮັບຕໍ່ຜົນຜະລິດຂອງຊາວກະສິກອນເພື່ອຈໍາໜ່າຍຢູ່ພາຍໃນ, ສົ່ງອອກໄປຕ່າງແຂວງ ແລະ ຕ່າງປະເທດຕື່ມອີກ.
(ຂ່າວ-ພາບ: ສົມພອນ  ຂຸນດາວົງ)