ໂດຍການເຂົ້າຮ່ວມຂອງທ່ານ ບຸນທະວີ ສໍສຸກັນ ກຳມະການປະຈຳພັກແຂວງ ປະທານກວດກາພັກ-ລັດແຂວງ, ມີທ່ານ ຄຳໄຊ ສູນວີເລີດ ຫົວໜ້າອົງການໄອຍະການປະຊາຊົນແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນພິທີ, ທ່ານ ບຸນທະວີ ສໍສຸກັນ ໄດ້ຂຶ້ນປາຖະກະຖາວ່າ: ອົງການໄອຍະການປະຊາຊົນ ໄດ້ຮັບການສ້າງຕັ້ງຂຶ້ນໃນວັນທີ 9 ມັງກອນ 1990 ໃນກອງປະຊຸມສະໄໝສາມັນຂອງສະພາປະຊາຊົນສູງສຸດຊຸດທີ II ໃນວັນທີ 23 ພະຈິກ ປີ 1989 ໄດ້ຮັບຮອງເອົາກົດໝາຍ ວ່າດ້ວຍອົງການໄອຍະການປະຊາຊົນ ແຫ່ງ ສ ປ ປ ລາວ ສະບັບທຳອິດ ແລະ ປະກາດໃຊ້ໂດຍດຳລັດຂອງປະທານປະເທດເລກທີ 5 ລົງວັນທີ 9 ມັງກອນປີ 1990 ເປັນຂີດໝາຍປະຫວັດສາດສໍາຄັນຂອງອົງການໄອຍະການປະຊາຊົນ ແລະ ໄດ້ກາຍເປັນວັນສ້າງຕັ້ງ ອົງການໄອຍະການປະຊາຊົນລາວ ຊຶ່ງເປັນອົງການອຳນາດລັດ, ມີພາລະບົດບາດກວດກາການປະຕິບັດກົດໝາຍໃຫ້ຖືກຕ້ອງ ແລະ ເປັນເອກະພາບໃນທຸກກະຊວງ, ຄະນະກຳມະການແຫ່ງລັດ, ສຳນັກງານ, ວິສາຫະກິດ, ອົງການຈັດຕັ້ງອື່ນໆ ຂອງລັດ ແລະ ສັງຄົມ.
ໃນໂອກາດນີ້, ໄດ້ມອບໃບຍ້ອງຍໍ ຜົນງານ 5 ປີ (2019-2024) ໃຫ້ແກ່ ກົມກອງ ແລະ ບຸກຄົນ ຂອງອົງການໄອຍະການປະຊາຊົນແຂວງຜົ້ງສາລີ ທີ່ມີຜົນງານ, ຄຸນງາມຄວາມດີປະກອບສ່ວນດ້ານເຫື່ອແຮງ ແລະ ສະຕິປັນຍາ ເຂົ້າໃນການຈັດຕັ້ງປະຕິບັດໜ້າທີ່ວຽກງານວິຊາສະເພາະຕະຫຼອດໄລຍະຜ່ານມາ ແລະ ປະກອບສ່ວນເຂົ້າໃນວຽກງານ ອົງການໄອຍະການປະຊາຊົນ ຄົບຮອບ 35 ປີ, ຊຶ່ງປະເພດກົມກອງລວມໝູ່ມີ 3 ກົມກອງຄື: ອົງການໄອຍະການປະຊາຊົນແຂວງຜົ້ງສາລີ; ອົງການໄອຍະການປະຊາຊົນເຂດ I; ອົງການໄອຍະການປະຊາຊົນ ເຂດ II ແລະ ປະເພດບຸກຄົນ ໄດ້ຮັບໃບ ຍ້ອງຍໍມີ 54 ທ່ານ, ຍິງ 22 ທ່ານ ເປັນກຽດຂຶ້ນມອບໂດຍທ່ານ ບຸນທະວີ ສໍສຸກັນ.
(ພາບ-ຂ່າວ: ແສງຄຳ ສາລີວັນ)
ຄໍາເຫັນ