ພິທີດັ່ງກ່າວ ຈັດຂຶ້ນໃນວັນທີ 18 ສິງຫານີ້ ທີ່ ແຂວງວຽງຈັນ ໂດຍໃຫ້ກຽດປາຖະກະຖາ ແລະ ເຜີຍແຜ່ເນື້ອໃນສຳຄັນຂອງ ທ່ານ ພອນແກ້ວ ຂຸນພົນ ຮອງເລຂາຄະນະບໍລິຫານງານພັກແຂວງ ຜູ້ຊີ້ນຳວຽກງານພັກ-ພະນັກງານ, ວຽກງານການເມືອງ-ແນວຄິດ ແລະ ອົງການຈັດຕັ້ງມະຫາຊົນແຂວງວຽງຈັນ, ມີຄະນະປະຈຳພັກແຂວງ, ກຳມະການພັກແຂວງ, ຫົວໜ້າ-ຮອງຫົວໜ້າພະແນກການ, ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມ.
 |
ທ່ານ ພອນແກ້ວ ຂຸນພົນ ໄດ້ຍົກໃຫ້ເຫັນເຖິງຄວາມໝາຍຄວາມສຳຄັນ, ມູນເຊື້ອການຕໍ່ສູ້ອັນອົງອາດກ້າຫານ ແລະ ໄຊຊະນະປະຫວັດສາດຂອງປະຊາຊົນລາວບັນດາເຜົ່າ ໂດຍຜ່ານ 4 ວັນປະຫວັດສາດສຳຄັນ ຄື: ວັນສ້າງຕັ້ງແນວລາວສ້າງຊາດ ຄົບຮອບ 76 ປີ (13/8/1950 – 13/8/2026) ເຊິ່ງເປັນສັນຍະລັກແຫ່ງຄວາມມະຫາສາມັກຄີເປັນຈິດໜຶ່ງໃຈດຽວກັນຂອງປະຊາຊົນລາວບັນດາເຜົ່າ ໃນການໂຮມກຳລັງສັງກັດເຂົ້າໃນພາລະກິດກູ້ຊາດ ແລະ ພັດທະນາ; ວັນສື່ມວນຊົນ ແລະ ການພິມຈຳໜ່າຍ ຄົບຮອບ 76 ປີ (13/8/1950 – 13/8/2026) ເນັ້ນໃສ່ບົດບາດສຳຄັນຂອງກະບອກສຽງທາງດ້ານການເມືອງ-ແນວຄິດ ທີ່ເປັນເວທີໃຫ້ຂໍ້ມູນຂ່າວສານ, ສຶກສາອົບຮົມ ແລະ ໂຄສະນາແນວທາງນໂຍບາຍຂອງພັກ-ລັດ; ວັນຍຶດອຳນາດ ຄົບຮອບ 81 ປີ (23/8/1945 – 23/8/2026) ແລະ ຄົບຮອບ 51 ປີ (23/8/1975 – 23/8/2026) ເປັນເຫດການປະຫວັດສາດທີ່ສະແດງເຖິງຄວາມອົງອາດກ້າຫານ ແລະ ການຕັດສິນໃຈຢ່າງສະຫຼາດສ່ອງໃສ ໃນການຍຶດອຳນາດປົກຄອງມາສູ່ມືປະຊາຊົນຢ່າງສັນຕິ ແລະ ວັນປະກາດໃຊ້ລັດຖະທຳມະນູນ ແຫ່ງ ສປປ ລາວ ຄົບຮອບ 35 ປີ (15/8/1991 – 15/8/2026) ເປັນໝາກຜົນຂອງການປັບປຸງລະບອບປະຊາທິປະໄຕ ປະຊາຊົນ, ເປັນກົດໝາຍພື້ນຖານ ທີ່ຮັບປະກັນການບໍລິຫານປະເທດຕາມກົດໝາຍ ແລະ ປົກປ້ອງສິດອິດສະຫຼະພາບຂອງປະຊາຊົນ.
 |
ນອກຈາກການຟັງປາຖະກະຖາຢ່າງເລິກເຊິ່ງແລ້ວ, ຜູ້ເຂົ້າຮ່ວມຍັງໄດ້ຮັບຊົມ ສາລະຄະດີປະຫວັດສາດ ກ່ຽວກັບ 4 ວັນດັ່ງກ່າວ, ເຊິ່ງໄດ້ສ່ອງແສງໃຫ້ເຫັນເຖິງພາບປະຫວັດສາດການຕໍ່ສູ້ອັນຍາວນານ, ຄວາມເສຍສະຫຼະອັນຍິ່ງໃຫຍ່ຂອງບັນພະບູລຸດ ແລະ ວິວັດທະນາການຂອງຊາດລາວ.
ຂ່າວ: ແຂວງວຽງຈັນ
ຄໍາເຫັນ