ໂດຍການເຂົ້າຮ່ວມຂອງທ່ານ ພູວົງ ບຸນຊູ ຮອງເຈົ້າແຂວງດັ່ງກ່າວ, ມີ ທ່ານ ບຸນເລີດ ສີຫາປັນຍາ ປະທານຄະນະກໍາມະການບຸນຊ່ວງເຮືອປະເພນີ ແຂວງວຽງຈັນ 2024 ຂັ້ນເມືອງ, ມີບັນດາອະນຸກໍາມະການກ່ຽວຂ້ອງຂັ້ນເມືອງ, ຂັ້ນບ້ານ ເຂົ້າຮ່ວມ.
ທ່ານ ບຸນເລີດ ສີຫາປັນຍາ ໄດ້ລາຍງານການຫ້າງຫາກະກຽມຈັດງານບຸນດັ່ງກ່າວ, ຊຶ່ງພາຍຫຼັງໄດ້ຮັບແຈ້ງການຂອງຫ້ອງວ່າການ ກ່ຽວກັບການຕົກລົງຂອງການນໍາແຂວງວຽງຈັນ ໃຫ້ຈັດງານບຸນຊ່ວງເຮືອປະເພນີຂອງແຂວງວຽງຈັນ ປະຈໍາປີ 2024 ຢູ່ເມືອງທຸລະຄົມອີກ, ຄະນະນໍາເມືອງ ໄດ້ຜັນຂະຫຍາຍແຈ້ງການສະບັບດັ່ງກ່າວ ໂດຍໄດ້ອອກຂໍ້ຕົກລົງຂອງທ່ານເຈົ້າເມືອງ ເພື່ອແຕ່ງຕັ້ງຄະນະກໍາມະການຈັດງານບຸນຂັ້ນເມືອງ,
ງານບຸນຊ່ວງເຮືອປະເພນີແຂວງວຽງຈັນ ໄດ້ກໍານົດເອົາວັນທີ 3 ພະຈິກ 2024 ເປັນວັນແຂ່ງຂັນເຮືອຍາວປະເພນີປະເພດ 55 ສີພາຍ, ຕາມການສັງລວມຂໍ້ມູນມີເຮືອເຂົ້າແຂ່ງຂັນ ຈໍານວນ 17 ລໍາ, ເຮືອເມືອງທຸລະຄົມມີ 16 ລໍາ ແລະ ເຮືອບ້ານປາກກະຍຸງ ເມືອງວຽງຄໍາມີ 1 ລໍາ, ກ່ຽວກັບຂອງຂວັນລາງກໍານົດໄວ້ຄື: ລາງວັນເຮືອປະເພນີ 55 ສີພາຍ ລາງວັນທີ 1 ໄດ້ຮັບເງິນສົດ 50,000,000 ກີບ ພ້ອມຂັນກິລາ 1 ໜ່ວຍ ແລະ ຂັນເງິນໝູນວຽນ 1 ໜ່ວຍ, ລາງວັນທີ 2 ເງິນສົດ 40,000,000 ກີບ ພ້ອມຂັນກິລາ 1 ໜ່ວຍ, ລາງວັນທີ 3 ເງິນສົດ 30,000, 000 ກີບ ພ້ອມຂັນກິລາ 1 ໜ່ວຍ, ລາງວັນທີ 4 ເງິນສົດ 20,000,000 ກີບ ພ້ອມດ້ວຍຂັນກິລາ 1 ໜ່ວຍ. ນອກນັ້ນ, ຄະນະຮັັບຜິດຊອບຈັດງານ ໄດ້ຕົກລົງໃຫ້ເອົາເຮືອກິລາປະເພດ 12 ສີພາຍ ມາເຂົ້າຮ່ວມແຂ່ງຂັນ ຊຶ່ງມີເຮືອມາລົງທະບຽນແລ້ວ 50 ລໍາ, ກ່ຽວກັບຂອງຂວັນລາງວັນໄດ້ຕົກລົງຄື: ລາງວັນທີ 1 ໄດ້ຮັບເງິນສົດ 30,000,000 ກີບ ພ້ອມຂັນກິລາ 1 ໜ່ວຍ, ລາງວັນທີ 2 ເງິນສົດ 20,000,000 ກີບ ພ້ອມຂັນກິລາ 1 ໜ່ວຍ, ລາງວັນທີ 3 ເງິນສົດ 15,000,000 ກີບ, ລາງວັນທີ 4 ເງິນສົດ 10,000,000 ກີບ ພ້ອມຂັນກິລາ 1 ໜ່ວຍ.
ໃນໂອກາດ ທ່ານ ພູວົງ ບຸນຊູ ໄດ້ຮຽກຮ້ອງໃຫ້ຄະນະຮັບຜິດຊອບຈັດງານສືບຕໍ່ສຸມໃສ່ວຽກທີ່ຍັງຄົງຄ້າງໃຫ້ສໍາເລັດທ່ວງທັນກັບເວລາ, ເປັນຕົ້ນອະນຸກໍາມະການສະຖານທີ່, ພິທີການ, ປະດັບປະດາ, ອະນຸກໍາມະການເນື້ອໃນ, ເສດຖະກິດ, ລະດົມທຶນ, ຍ້ອງຍໍ, ປ້ອງກັນຊາດ-ປ້ອງກັນຄວາມສະຫງົບ, ອະນຸກໍາມະການດໍາເນີນການແຂ່ງຂັນ, ກອງເລຂາ, ສື່ມວນຊົນ, ອະນຸກໍາມະການຮັກສາສຸຂະພາບ, ຄວາມປອດໄພທາງນໍ້າ, ທາງບົກ, ການຈັດສັນລໍາລຽງລົດ, ອະນຸກໍາມະການກ່ຽວຂ້ອງ ແລະ ຊີ້ນໍາໃຫ້ເອົາໃຈໃສ່ຄວາມພ້ອມຮອບດ້ານ ເພື່ອຮັບປະກັນໃຫ້ງານທີ່ຈະຈັດຂຶ້ນປີນີ້ໃຫ້ຄວາມເບີກບານມ່ວນຊື່ນ, ມີຜົນສໍາເລັດຢ່າງຈົບງາມ ແລະ ເປັນພື້ນຖານໃຫ້ແກ່ປີຕໍ່ໄປ.
(ຂ່າວ: ຄໍາພອນ ຈັນທະວົງສັກ, ພາບ: ຫຼ້າທໍ່ ປາຈ້າທໍ່).
ຄໍາເຫັນ