 |
ທ່ານ ສີວຽງໄຊ ອໍລະບູນ ໄດ້ກ່າວເປີດກອງປະຊຸມບາງຕອນວ່າ: ກອງປະຊຸມຄັ້ງນີ້, ຈະໄດ້ພ້ອມກັນຈັດຕັ້ງປະຕິບັດວຽກງານອະໄພຍະໂທດ ປະຈຳປີ 2026 ໃຫ້ໄດ້ຮັບການຈັດຕັ້ງປະຕິບັດຢ່າງຖືກຕ້ອງ, ຄົບຖ້ວນ, ເປັນເອກະພາບໃນການຈັດຕັ້ງປະຕິບັດ ແລະ ຖືກຕ້ອງສອດຄ່ອງຕາມລະບຽບຫຼັກການທີ່ກົດໝາຍກໍານົດໄວ້. ໃນນີ້, ຄະນະກຳມະການອະໄພຍະໂທດລະດັບແຂວງ ແລະ ກອງເລຂາຊ່ວຍວຽກຄະນະກຳມະການອະໄພຍະໂທດລະຂັ້ນແຂວງ ຈະໄດ້ພ້ອມກັນເຊື່ອມຊຶມບັນດາເອກະສານຕ່າງໆ ທີ່ກ່ຽວຂ້ອງກັບ ວຽກງານອະໄພຍະໂທດໃຫ້ລະອຽດ, ຄົບຖ້ວນ ແລະ ເລິກເຊິ່ງ. ພ້ອມນີ້, ຈະໄດ້ພ້ອມກັນເຊື່ອມຊຶມ ແລະ ຄົ້ນຄວ້າລັດຖະບັນຍັດຂອງປະທານປະເທດສະບັບເລກທີ 001/ປບທ, ລົງວັນທີ 20 ມີນາ 2018 ວ່າດ້ວຍການໃຫ້ອະໄພຍະໂທດ. ເຊື່ອມຊຶມ ແລະ ຄົ້ນຄວ້າຄໍາແນະນໍາ ຂອງຄະນະກຳມະການອະໄພຍະໂທດລະດັບຊາດ ສະບັບເລກທີ 016/ຄອຊ, ລົງວັນທີ 24 ເມສາ 2018 ກ່ຽວກັບການຈັດຕັ້ງປະຕິບັດລັດຖະບັນຍັດຂອງປະທານ ປະເທດວ່າດ້ວຍການໃຫ້ອະໄພຍະໂທດ. ຄົ້ນຄ້ວາຄັດເລືອກບັນດາລາຍຊື່ນັກໂທດຜູ້ທີ່ມີຜົນງານດີເດັ່ນ ແລະ ມີເງື່ອນໄຂອະໄພຍະໂທດ ເພື່ອນໍາສະເໜີໃຫ້ປະທານຄະນະກຳມະການອະໄພຍະໂທດລະດັບຊາດ ໃຫ້ອະໄພຍະໂທດ, ຫຼຸດຜ່ອນໂທດ ແລະ ປ່ອຍຕົວ ນັກໂທດປະຈຳປີ 2026.
ທ່ານ ພັນໂທ ຄຳຕຸ່ນ ຈອມວິສານ ຫົວໜ້າຄ້າຍຄຸມຂັງດັດສ້າງ ປກສ ແຂວງວຽງຈັນ ໄດ້ຜ່ານບັນຊີລາຍຊື່ນັກໂທດທີ່ມີເງື່ອນໄຂສະເໜີໃຫ້ອະໄພຍະໂທດຫຼຸດຜ່ອນໂທດ ແລະ ປ່ອຍຕົວ ເນື່ອງໃນໂອກາດວັນຊາດທີ 2 ທັນວາ 2026 ຄົບຮອບ 51 ປີ ຊຶ່ງມີທັງໝົດ 183 ຄົນ ຍິງ 20 ຄົນ. ໃນນີ້, ນັກໂທດທີ່ມີເງື່ອນໄຂສະເໜີໃຫ້ອະໄພຍະໂທດ, ຫຼຸດຜ່ອນໂທດ 165 ຄົນ ຍິງ 18 ຄົນ; ນັກໂທດທີ່ມີເງື່ອນໄຂສະເໜີໃຫ້ອະໄພຍະໂທດ ປ່ອຍຕົວ 18 ຄົນ ຍິງ 2 ຄົນ. ພ້ອມນີ້ບັນດາຜູ້ເຂົ້າຮ່ວມຍັງໄດ້ປະກອບຄຳເຫັນໃສ່ບາງບັນຫາທີ່ເຫັນວ່າຈະໄດ້ສືບຕໍ່ແກ້ໄຂ ເພື່ອເຮັດໃຫ້ວຽກງານດັ່ງກ່າວມີຜົນສຳເລັດຕາມຄາດໝາຍທີ່ວາງໄວ້.
ທ່ານ ສີວຽງໄຊ ອໍລະບູນ ຍັງໄດ້ເນັ້ນບາງບັນຫາໃຫ້ຄະນະກຳມະການອະໄພຍະໂທດລະດັບແຂວງ ແລະ ກອງເລຂາຊ່ວຍວຽກຄະນະກຳມະການອະໄພຍະໂທດລະດັບແຂວງ ຈົ່ງພ້ອມກັນສືບຕໍ່ເອົາໃຈໃສ່ຄົ້ນຄວ້າ, ເຊື່ອມຊຶມ ບັນດາເອກະສານ ແລະ ນິຕິກຳຕ່າງໆກ່ຽວກັບການໃຫ້ອະໄພຍະໂທດ ໃຫ້ຄົບຖ້ວນ, ຮອບດ້ານ, ພາວະວິໄສ ເລິກເຊິ່ງເຖິງຖອງ, ລະອຽດຈະແຈ້ງ ແລະ ມີຄວາມເປັນເອກະພາບກັນ, ຮັບປະກັນການຈັດຕັ້ງປະຕິບັດໃຫ້ມີຄວາມຖືກຕ້ອງສອດຄ່ອງຕາມລະບຽບຫຼັກການທີ່ກຳນົດໄວ້ ແລະ ພ້ອມກັນເອົາໃຈໃສ່ໃນການຄົ້ນຄວ້າ, ຄັດເລືອກນັກໂທດ ຜູ້ທີ່ມີຜົນງານດີເດັ່ນມີເງື່ອນໄຂອະໄພຍະໂທດໃຫ້ຖືກຕ້ອງ, ມີຄວາມໂປ່ງໃສ ແລະ ຍຸຕິທຳ; ພ້ອມນີ້ ເຈົ້າໜ້າທີ່ຮັບຜິດຊອບຄ້າຍຄຸມຂັງ-ດັດສ້າງ ກໍໃຫ້ສືບຕໍ່ເອົາໃຈໃສ່ສຶກສາອົບຮົມນັກໂທດ ທີ່ຢູ່ໃນຄວາມຮັບຜິດຊອບຂອງຕົນ. ເປັນຕົ້ນແມ່ນແນວທາງນະໂຍບາຍຂອງພັກ, ກົດໝາຍຂອງລັດ ເປັນບ່ອນອີງ ໃນການສຶກສາອົບຮົມຕໍ່ນັກໂທດໃຫ້ເປັນປົກກະຕິຕໍ່ເນື່ອງ.
(ແຫຼ່ງຂ່າວ: ແຂວງວຽງຈັນ)
ຄໍາເຫັນ