ເມືອງຂວາ ແຂວງຜົ້ງສາລີ ເລີ່ມແຕ່ປີ 2022 ຊຶ່ງມີຫຼາຍກິດຈະກໍາເປັນຕົ້ນໄດ້ຊຸກຍູ້ສົ່ງເສີມປະຊາຊົນໃຫ້ມີສະບຽງອາຫານດີຂຶ້ນ, ພ້ອມໄດ້ເຂົ້າເຖິງລະບົບການສະໜອງນໍ້າທີ່ສະອາດ ແລະ ສຸຂະອານາໄມທີ່ດີຂຶ້ນ ໂດຍສະເພາະຕະຫຼອດໄລຍະ 2 ປີ ໄດ້ສະໜອງນໍ້າລິນສະອາດ ເຮັດໃຫ້ປະຊາຊົນບ້ານໃໝ່ມີຊີວິດການເປັນຢູ່ດີຂຶ້ນ.
ທ່ານ ວຽງ ວໍລະອຸນຄໍາ ຮອງເລຂາພັກບ້ານໆໃໝ່ ໄດ້ໃຫ້ສໍາພາດຕໍ່ນັກຂ່າວ ພາຍໃຕ້ໂຄງການສ້າງຄວາມເຂັ້ມແຂງໃຫ້ແກ່ສື່ມວນຊົນ ໂດຍການມີສ່ວນຮ່ວມຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມ ເພື່ອພັດທະນາສີຂຽວໃນ ສປປ ລາວ ເມື່ອບໍ່ດົນມານີ້ວ່າ:ບ້ານໃໝ່ ເປັນໜຶ່ງບ້ານເປົ້າໝາຍຂອງໂຄງການKFSPຊຶ່ງປະຊາຊົນພາຍໃນບ້ານເປັນຊົນເຜົ່າກຶມມຸມີທັງໝົດ 38 ຫຼັງຄາເຮືອນ, ມີ 53 ຄອບຄົວ, ມີພົນລະເມືອງ 203 ຄົນ ຍິງ 98 ຄົນ. ອົງການແຄຣນາໆຊາດ ປະຈໍາ ສປປ ລາວ ໄດ້ເຂົ້າມາສະໜັບສະໜູນຊ່ວຍເຫຼືອແຕ່ປີ 2022ມີຫຼາຍກິດຈະກໍາເຊັ່ນ:ໄດ້ຊຸກຍູ້ສົ່ງເສີມໃຫ້ປະຊາຊົນພາຍໃນບ້ານໄດ້ມີການປູກ, ການລ້ຽງ, ປູກຜັກສວນຄົວຕ່າງໆ, ລ້ຽງເປັດ-ລ້ຽງໄກ່, ລ້ຽງງົວຈໍານວນໜຶ່ງ ໂດຍສະເພາະໃນປັດຈຸບັນໄດ້ສະໜອງນໍ້າລິນທີ່ສະອາດ ໃຫ້ປະຊາຊົນພາຍໃນບ້ານຢ່າງທົ່ວເຖິງ ແລະ ສະດວກສະບາຍ. ຈາກເມື່ອກ່ອນແມ່ຍິງ-ຊາຍ ອາໄສໃຊ້ແຮງງານໄປຕັກ, ແບກຫາບນໍ້າໄກໃຊ້ເວລາ 1ຊົ່ວໂມງ ຫາ 2 ຊົ່ວໂມງຈຶ່ງໄດ້ນໍ້າມາໄວ້ໃຊ້, ໄວ້ດື່ມ. ປັດຈຸບັນແມ່ນມີຄວາມສະດວກ, ສະບາຍຫຼາຍຂຶ້ນ, ແຕ່ລະຄົວເຮືອນແມ່ນມີກົງເຕີນໍ້າລິນສະອາດເຂົ້າໃນຄົວເຮືອນ ຊ່ວຍຫຼຸດຜ່ອນແຮງງານຂອງແມ່ຍິງ-ຊາຍ. ໃນນັ້ນ, ສວນຜັກກໍມີນໍ້າຫົດ, ມີຜັກກິນພາຍໃນຄອບຄົວ. ພ້ອມນັ້ນ, ຍັງມີເຄື່ອງນຸ່ງທີ່ສະອາດງາມຕາ ແລະ ອື່ນໆ ດີຂຶ້ນເປັນກ້າວ.
ທ່ານ ວຽງ ວໍລະອຸນຄໍາ ຍັງກ່າວດ້ວຍຄວາມດີໃຈຕື່ມວ່າ: ຂໍຂອບໃຈອົງການແຄຣນາໆຊາດ ປະຈໍາ ສປປ ລາວ ກໍຄືໂຄງການKFSP ທີ່ໃຫ້ການຊຸກຍູ້ຊ່ວຍເຫຼືອຕະຫຼອດໄລຍະ 2 ປີ ຜ່ານມາ, ໃນຕໍ່ໜ້າກໍຢາກສະເໜີ ໃຫ້ທາງອົງການແຄຣນາໆຊາດ ປະຈໍາ ສປປ ລາວ ກໍຄືໂຄງການຕ່າງໆ ເຂົ້າມາຊ່ວຍສະໜັບສະໜູນຕື່ມອີກເປັນຕົ້ນເສັ້ນທາງເຂົ້າຫາບ້ານ, ເສັ້ນທາງເຂົ້າຫາບ່ອນທໍາການຜະລິດ ເພື່ອຫຼຸດຜ່ອນການໃຊ້ແຮງງານ ແລະ ເວລາເດີນທາງໄປ-ມາ.
ປະຊາຊົນບ້ານໃໝ່ ຍັງກ່າວສະແດງຄວາມດີໃຈວ່າ: ນັບແຕ່ມີໂຄງການແຄຣນາໆຊາດ ປະຈໍາ ສປປ ລາວ ກໍຄືໂຄງການKFSPເຂົ້າມາຊ່ວຍເຫຼືອສະໜັບສະໜູນ ເຮັດໃຫ້ການດໍາລົງຊີວິດຂອງຄອບຄົວ ກໍຄືປະຊາຊົນພາຍໃນບ້ານດີຂຶ້ນ. ທີ່ສໍາຄັນດີໃຈຫຼາຍທີ່ມີນໍ້າລິນສະອາດໃຊ້ຮອດເຮືອນ, ໂດຍບໍ່ໄດ້ໃຊ້ແຮງງານໄປແບກຫາບໄກຈາກເຮືອນ. ພ້ອມນັ້ນ, ຍັງມີອາຫານການກິນພຽງພໍ ແລະ ອື່ນໆ.
ຄໍາເຫັນ