 |
ທ່ານ ພົນຈັດຕະວາ ໜູຈອນ ກ້ອນທອງດໍາ ຫົວໜ້າກົມໃຫຍ່ພະລາທິການ ກະຊວງ ປກສ ກ່າວວ່າ: ກົມໃຫຍ່ພະລາທິການໃນນາມຄະນະຮັບຜິດຊອບໂຄງການ ຮ່ວມກັບກຸ່ມບໍລິສັດ BKYC ພ້ອມກັນຈັດພິທີວາງສີລາລືກໂຄງການກໍ່ສ້າງໂຮງໝໍທັນສະໄໝຂອງກະຊວງ ປກສ ຊຶ່ງເປັນໂຄງການໜຶ່ງທີ່ມີຄວາມສໍາຄັນໃນການພັດທະນາວຽກງານສາທາລະນະສຸກຂອງ ສປປ ລາວ ເວົ້າສະເພາະມີຄວາມສໍາຄັນທາງດ້ານສາທາລະນະສຸກ ຂອງກໍາລັງ ປກສ ແນໃສ່ເພື່ອຮັບປະກັນທາງດ້ານສຸຂະພາບຂອງກໍາລັງ ປກສ ແລະ ປະຊາຊົນລາວ, ດ້ານພື້ນຖານໂຄງລ່າງໃຫ້ມີຄວາມທັນສະໄໝ ມີຄວາມພ້ອມ ແລະ ອໍານວຍຄວາມສະດວກໃນການບໍລິການປິ່ນປົວພະຍາດ, ມີອຸປະກອນການແພດທີ່ທັນສະໄໝຊ່ວຍໃນການບົ່ງມະຕິ, ພະຍາດຊັດເຈນ, ຮັບປະກັນໄດ້ທາງດ້ານຄຸນນະພາບຂອງການປິ່ນປົວ.
ຄວາມຈໍາເປັນກ່ອນຈະມີໂຄງການນີ້, ຍ້ອນວ່າໂຮງໝໍທີ່ມີໃນປັດຈຸບັນສະຖານທີ່ບໍ່ອໍານວຍຄວາມສະ ດວກ, ພື້ນຖານໂຄງລ່າງເກົ່າ, ແອອັດ, ຫ້ອງເຕັກນິກການແພດບໍ່ພຽງພໍ ຊຶ່ງບໍ່ສາມາດຕອບສະໜອງການບໍລິ ການດ້ານການປິ່ນປົວໄດ້ທຸກຂະແໜງການ, ເຄື່ອງມືອຸປະກອນການແພດບໍ່ຄົບຖ້ວນ, ອັນທີ່ມີໃນປັດຈຸບັນກໍເກົ່າ ແລະ ຫຼ້າສະໄໝ, ແຕ່ມີຄວາມຈຳເປັນເພື່ອຮັບປະກັນທາງດ້ານສຸຂະພາບຂອງກໍາລັງ ປກສ ແລະ ປະຊາຊົນລາວໃຫ້ມີສຸຂະພາບແຂງແຮງເພື່ອຮັບໃຊ້ວຽກງານ ປກສ.
ລັດຖະບານແຫ່ງ ສປປ ລາວ ເຫັນຄວາມຈໍາເປັນດັ່ງກ່າວຈຶ່ງອະນຸມັດໃຫ້ກະຊວງ ປກສ ກໍ່ສ້າງໂຮງໝໍບ່ອນໃໝ່ໃຫ້ມີຄວາມທັນສະໄໝ ແລະ ລັດຖະບານໄດ້ອະນຸມັດແຫຼ່ງທຶນກູ້ຢືມຈາກກອງທຶນຮ່ວມເພື່ອພັດທະນາເສດຖະກິດ ສ ເກົາຫຼີ (EDCF) ໃນມູນຄ່າທັງໝົດ 65,000,000 ໂດລາ, ໂຄງການດັ່ງກ່າວຈະສ້າງໃຫ້ເປັນໂຮງໝໍທີ່ມີລະບົບພື້ນຖານໂຄງລ່າງທີ່ທັນສະໄໝ ສາມາດບັນຈຸຕຽງຄົນເຈັບໄດ້ 300 ຕຽງ ປະກອບຄົບທຸກຂະ ແໜງປິ່ນປົວທາງດ້ານການແພດ, ປະກອບອຸປະກອນການແພດທີ່ທັນສະໄໝຄົບຊຸດ ແລະ ລະບົບຂໍ້ມູນຂ່າວ ສານການແພດທີ່ທັນສະໄໝ.
 |
ໂຄງການດັ່ງກ່າວ, ກົມໃຫຍ່ພະລາທິການໄດ້ສົມທົບກັບຂະແໜງການ, ກະຊວງທີ່ກ່ຽວຂ້ອງ, ກອງທຶນຮ່ວມເພື່ອພັດທະນາເສດຖະກິດ ສ ເກົາຫຼີ (EDCF), ປະຕິບັດຕາມລະບຽບຫຼັກການ ແລະ ປະຕິບັດຕາມຂັ້ນຕອນໂດຍຜ່ານຂະບວນການຕ່າງໆໄດ້ເຊັນສັນຍາທີ່ປຶກສາໂຄງການໃນວັນທີ 30 ພຶດສະພາ 2025 ລະຫວ່າງ ກົມໃຫຍ່ພະລາທິການກະຊວງ ປກສ ກັບມະຫາວິທະຍາໄລສູນການແພດຢອງນາມ ສ ເກົາຫຼີ, ທີ່ປຶກສາໄດ້ເປັນຜູ້ດໍາເນີນການສໍາຫຼວດ-ອອກແບບສຳເລັດ, ໂດຍຜ່ານຂະບວນການປະມູນໂຄງການດັ່ງກ່າວໄດ້ເຊັນສັນຍາຮັບເໝົາກໍ່ສ້າງໂຄງການໃນວັນທີ 6 ພຶດສະພາ 2025 ລະຫວ່າງກົມໃຫຍ່ພະລາທິການ ກັບກຸ່ມບໍລິສັດ BKYC ໂຄງການປະກອບມີ: ອາຄານໂຮງໝໍ 6 ຊັ້ນ, ອາຄານປິ່ນປົວພະຍາດຊຶມເຊື້ອ ແລະ ໂຣກຈິດ, ອາຄານຫ້ອງອາຫານ, ອາຄານສ້ອມແປງອຸປະກອນການແພດ, ອາຄານສາງເຄື່ອງ, ອາຄານຕິດຕັ້ງເຄື່ອງໄຟຟ້າ ແລະ ໄຟຟ້າສໍາຮອງ ເມື່ອໂຄງການກໍ່ສ້າງສໍາເລັດຈະເປັນໂສມໜ້າໃໝ່ໃຫ້ກະຊວງ ປກສ ໂດຍສະເພາະວຽກງານສາທາລະນະສຸກໃນການຮັບປະກັນທາງດ້ານສຸຂະພາບຂອງກໍາລັງ ປກສ ແລະ ປະຊາຊົນລາວໃຫ້ມີສຸຂະພາບແຂງແຮງ ແລະ ໄດ້ຮັບການປິ່ນປົວທີ່ມີຄຸນນະພາບ.
ທີ່ມາ: ຄວາມສະຫງົບ
ຄໍາເຫັນ