ໂຄງການຜະລິດໄຟຟ້າດ້ວຍພະລັງງານລົມຂອງເອທິໂອປີ ເລີ່ມການຜະລິດໄຟຟ້າ

ຂ່າວຕ່າງປະເທດລາຍງານວ່າ: ສິງກະໂປ ກຳລັງຢູ່ໃນຂັ້ນຕອນການສ້າງຕັ້ງອົງການອະວະກາດຂອງຕົນ ເພື່ອພະຍາຍາມຍາດເອົາສ່ວນແບ່ງຂອງອຸດສາຫະກຳອະວະກາດທົ່ວໂລກ ຊຶ່ງຄາດວ່າຈະບັນລຸ 1.8 ພັນຕື້ໂດລາ ໃນເວລາບໍ່ຮອດ 10 ປີ. ໂດຍກະຊວງການຄ້າ ແລະ ອຸດສາຫະກຳ ສິງກະໂປ ໄດ້ປະກາດໃນວັນທີ 2 ກຸມພາ ຜ່ານມາວ່າ: ອົງການອະວະກາດແຫ່ງຊາດສິງກະໂປ (National Space Agency of Singapore ຫຼື NSAS) ຈະຖືກສ້າງຕັ້ງຂຶ້ນຢ່າງເປັນທາງການໃນວັນທີ 1 ເມສາ ນີ້ ໂດຍມີຈຸດປະສົງເພື່ອດຶງດູດບໍລິສັດອະວະກາດຈາກທົ່ວໂລກ ໃຫ້ມາສ້າງຕັ້ງຖານການດໍາເນີນງານໃນສິງກະໂປ.

ຂ່າວສານຊີອາໄອລາຍງານວ່າ: ກະຊວງອຸດສາຫະກຳ ແລະ ຫັນເປັນຂໍ້ມູນຂ່າວສານຈີນໄດ້ເຜີຍແຜ່ຂໍ້ມູນໃນວັນທີ 1 ກຸມພາ ຜ່ານມາ ສະແດງໃຫ້ເຫັນວ່າ: ໃນປີ 2025, ອັດຕາສ່ວນໃນຕະຫຼາດສາກົນຂອງຈີນໃນຕົວຊີ້ວັດຫຼັກ 3 ຢ່າງຂອງການຕໍ່ກຳປັ່ນໄດ້ຮັກສາຕຳແໜ່ງຜູ້ນຳໜ້າຂອງໂລກ 16 ປີລຽນຕິດ.

ວິທະຍຸກະຈາຍສຽງຫວຽດນາມ ລາຍງານວ່າ: ກອງປະຊຸມສຸດຍອດ ລັດຖະບານ ໂລກ (WGS) ຄາດວ່າຈະດຳເນີນຢູ່ນະຄອນດູໄບ ສະຫະລັດ ອາຣັບ ເອມີເລັດ (UAE) ໃນລະຫວ່າງວັນທີ 3 ກຸມພາ - 5 ກຸມພາ ນີ້, ໂດຍມີການເຂົ້າຮ່ວມຂອງປະມຸກລັດ 40 ທ່ານ ແລະ ຜູ້ນຳລັດຖະບານກໍຄືລັດຖະມົນຕີນັບຮ້ອຍທ່ານທີ່ມາຈາກ 150 ປະເທດໃນທົ່ວໂລກ.

ຂ່າວຕ່າງປະເທດລາຍງານວ່າ: ເນື່ອງໃນໂອກາດສະເຫຼີມສະຫຼອງ 96 ປີແຫ່ງວັນສ້າງຕັ້ງພັກກອມມູນິດ ຫວຽດນາມ (3/2/1930 - 3/2/2026), ໃນວັນທີ 2 ກຸມພາ ຜ່ານມາ ທ່ານ ໂຕເລິມ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ ໄດ້ມີບົດຂຽນທີ່ມີຫົວຂໍ້ວ່າ: “ກ້າວເດີນຢ່າງໝັ້ນແກ່ນພາຍໃຕ້ທຸງພັກ”. ບົດຂຽນໄດ້ຊີ້ແຈ້ງວ່າ ພາຍຫຼັງຜົນສຳເລັດຂອງກອງປະຊຸມໃຫຍ່ທົ່ວປະເທດຄັ້ງທີ XIV, ທົ່ວພັກ, ທົ່ວປວງຊົນ ແລະ ທົ່ວກອງທັບ ຫວຽດນາມ ໄດ້ສະເຫຼີມສະຫຼອງ 96 ປີແຫ່ງວັນສ້າງຕັ້ງພັກກອມມູນິດ ຫວຽດນາມ ດ້ວຍຈິດໃຈເບີກບານມ່ວນຊືນພິເສດ. ຂີດໝາຍ 96 ປີຂອງພັກ ຍິ່ງມີຄວາມໝາຍ, ເມື່ອ ຫວຽດນາມ ກ້າວເຂົ້າສູ່ປີທຳອິດຂອງອາຍຸການໃໝ່ - ປີເລີ່ມຕົ້ນທີ່ມີບົດບາດຕັດສິນໃນການຫັນມະຕິກອງປະຊຸມໃຫຍ່ຄັ້ງທີ XIV ຂອງພັກກອມມູນິດ ຫວຽດນາມ ເປັນລະອຽດ, ນຳບັນດາເປົ້າໝາຍຍຸດທະສາດໃຫ້ປະກົດຜົນເປັນຈິງ.

- ຊື່ ແລະ ນາມສະກຸນ: ໂຕເລິມ - ວັນທີ, ເດືອນ, ປີເກີດ: 10/7/1957 - ທີ່ເກີດ: ຕາແສງເງ້ຍຈຸ ເມືອງວັນຢາງ ແຂວງຮຶງອຽນ. - ລະດັບວິຊາສະເພາະ: ສຈ. ດຣ ດ້ານກົດໝາຍ - ລະດັບທິດສະດີການເມືອງ: ຊັ້ນສູງ - ວັນເດືອນປີເຂົ້າເປັນສະມາຊິກພັກ: 22/8/1981

ຂ່າວສານຊີອາໄອລາຍງານວ່າ: ນັບ​ມາ​ຮອດ​ວັນ​ທີ 29 ມັງ​ກອ​ນ 2026, ການ​ປ່ອນ​ບັດ​ຮອບ​ທີ 3​ ໃນການ​ເລືອ​ກ​ຕັ້ງ​ທົ່ວ​ໄປ​ຂອງ​ມຽນ​ມາ​ປີ 2025 ໄດ້​ສຳ​ເລັດຮຽບ​ຮ້ອຍ​ແລ້ວ. ອີງ​ຕາມໂຕ​ເລກ​ຂໍ້​ມູນທີ່​ຄະ​ນະ​ກຳ​ມະ​ການ​ເລືອກ​ຕັ້ງ​ສະ​ຫະ​ພາບມຽນ​ມາ​ເປີດ​ເຜີຍ​ໃນ​ວັນ​ທີ 28 ມັງ​ກອນ ຜ່ານມາ ​ສະ​ແດງ​ໃຫ້​ເຫັນ​ວ່າ: ພັກສະ​ຫະ​ພາບ​ສາ​ມັກ​ຄີ​ ແລະ​ ການ​ພັດ​ທະ​ນາ ຫຼື USDP ໄດ້​ຮັບ​ບ່ອນ​ນັ່ງ​ຫຼາຍກວ່າ​ເຄິ່ງ​ໜຶ່ງ​ຂອງ​ສະ​ພາ​ຕ່ຳ.

ຂ່າວສານຊີອາໄອລາຍງານວ່າ: ໃນວັນ​ທີ 28 ມັງ​ກອນ ຜ່ານມາ ​ຕາມ​ເວ​ລາ​ທ້ອງ​ຖິ່ນ, ບົດ​ບັນ​ທຶກຫຼ້າ​ສຸດ​ຂອງກອງ​ປະ​ຊຸມ​ນະ​ໂຍ​ບາຍ​ເງິນ​ຕາຂອງ​ຄະ​ນະ​ກຳ​ມະ​ການ​ຕະຫຼາດ​ເປີດກວ້າງ​ຂອງ​ສະ​ຫະ​ລັດ ອາເມຣິກາ ຫຼື FOMC ສະ​ແດງ​ໃຫ້​ເຫັນ​ວ່າ: ທະ​ນາ​ຄານ​ກາງ​ສະຫະລັດ ອາ​ເມ​ຣິ​ກາ ຫຼື FED ໄດ້​ຕົກ​ລົງ​ຮັກ​ສາ​ລະ​ດັບ​ເປົ້າ​ໝາຍ​ຂອງ​ອັດ​ຕາ​ດອກ​ເບ້ຍກອງ​ທຶນ​​ສະ​ຫະ​ລັດ​ອາເມຣິກາ ໄວ້​ຢູ່​ລະ​ຫວ່າ​ງ 3.5% ຫາ 3.75%.

ຂ່າວຕ່າງປະເທດລາຍງານ ຫວ່າງມໍ່ໆມານີ້ວ່າ: ສື່ມວນຊົນອັຟການິສຖານ, ອ້າງອີງຂໍ້ມູນຈາກສະຫະປະຊາຊາດ (UN) ລາຍງານວ່າ: ມີຊາວອົບພະຍົບອັຟການິສຖານຫຼາຍກວ່າ 4.8 ລ້ານຄົນໄດ້ກັບຄືນຈາກອີຣ່ານ ແລະ ປາກິດສະຖານ ນັບຕັ້ງແຕ່ເດືອນກັນຍາ 2023 ຊຶ່ງເຮັດໃຫ້ປະຊາກອນອັຟການິສຖານເພີ່ມຂຶ້ນ 12%.

ຂ່າວສານຊີອາໄອລາຍງານວ່າ: ຫວ່າງມໍ່ໆມານີ້, ຊຸດຝຶກອົບຮົມກ່ຽວກັບການສ້າງຄວາມສາມາດດ້ານປັນຍາປະດິດຈີນ-ອາຊຽນ 2026 ແລະ ກອງປະຊຸມສໍາມະນາຂັ້ນສູງກ່ຽວກັບເຕັກໂນໂລຊີທັນສະໄໝ ແລະ ການຄຸ້ມຄອງປັນຍາປະດິດ ໄດ້ຈັດຂຶ້ນຢູ່ນະຄອນຫຼວງກົວລາລຳເປີ ປະເທດມາເລເຊຍ, ຜູ້ຕາງໜ້າຮ້ອຍກວ່າຄົນຈາກພາກສ່ວນຂອງລັດຖະບານ, ວົງການວິຊາການ ແລະ ອຸດສາຫະກໍາຂອງຈີນ ແລະ ພາກພື້ນອາຊຽນ ໄດ້ເຂົ້າຮ່ວມກອງປະຊຸມເພື່ອປຶກສາຫາລືກ່ຽວກັບຫົວຂໍ້ຕ່າງໆ ເຊັ່ນ: ເຕັກໂນໂລຊີທັນສະໄໝດ້ານປັນຍາປະດິດ ແລະ ສິ່ງທ້າທາຍດ້ານຄວາມໝັ້ນຄົງ ເປັນຕົ້ນ.

ວິທະຍຸກະຈາຍສຽງຫວຽດນາມລາຍງານວ່າ: ຫວຽດນາມ ແລະ ສະຫະພາບເອີຣົບ (EU) ຕົກລົງຍົກລະດັບການພົວພັນຂຶ້ນເປັນຄູ່ຮ່ວມມືຍຸດທະສາດຮອບດ້ານ. ນີ້ແມ່ນຂໍ້ມູນໂດຍທ່ານ ເລືອງເກື່ອງ ປະທານປະເທດຫວຽດນາມ ແລະ ທ່ານ ອັນໂຕນິໂອ ຄອສຕາ ປະທານສະພາເອີຣົບ ແຈ້ງໃຫ້ຮູ້ໃນການພົບປະກັບສື່ມວນຊົນໃນວັນທີ 29 ມັງກອນ ຜ່ານມາ ຢູ່ນະຄອນຫຼວງຮ່າໂນ້ຍ, ພາຍຫຼັງການໂອ້ລົມສົນທະນາຂັ້ນສູງ.