ອົງການອາຫານ ແລະ ການກະເສດ ແຫ່ງ ສະຫະປະຊາຊາດ (FAO) ແລະ ພະແນກກະສິກຳ ແລະ ປ່າໄມ້ ແຂວງອັດຕະປືໄດ້ຮ່ວມກັນຈັດກອງປະຊຸມສະຫຼຸບໂຄງການ “ສ້າງຄວາມທົນທານຕໍ່ດິນຟ້າອາກາດ ແລະ ລະບົບກະສິກໍາທີ່ເປັນມິດກັບສິ່ງແວດລ້ອມ ແລະ ການດຳລົງຊີວິດຂອງປະຊາຊົນຢູ່ແຂວງອັດຕະປື” (Climate REAL)ຊຶ່ງເປັນໜຶ່ງໃນອົງປະກອບຂອງແຜນງານການເສີມສ້າງຄວາມເຂັ້ມແຂງເພື່ອຮັບມືກັບການປ່ຽນແປງດິນຟ້າອາກາດແບບປະສົມປະສານ (IPCREA) ທີ່ໄດ້ຮັບທຶນຈາກອົງການຮ່ວມມືສາກົນ ສເກົາຫຼີ (KOICA).
ກອງປະຊຸມດັ່ງກ່າວຈັດຂຶ້ນເມື່ອບໍ່ດົນມານີ້ທີ່ແຂວງອັດຕະປືໂດຍມີຈຸດປະສົງເພື່ອນຳສະເໜີຜົນສຳເລັດຂອງໂຄງການ ລວມທັງການປະຕິບັດທີ່ດີ ແລະ ວິທີການທີ່ໄດ້ຮັບການພິສູດຜົນທີ່ໂຄງການໄດ້ນຳໃຊ້; ປຶກສາຫາລືບັນດາບົດຮຽນທີ່ຖອດຖອນໄດ້, ສິ່ງທ້າທາຍ ແລະ ວິທີແກ້ໄຂ;ສະເໜີຍຸດທະສາດພາຍຫຼັງສຳເລັດໂຄງການ, ພ້ອມທັງເສີມສ້າງຄວາມເຂັ້ມແຂງຂອງຍຸດທະສາດດັ່ງກ່າວໂດຍການຮັບເອົາຄໍາຄິດເຫັນຈາກພາກສ່ວນກ່ຽວຂ້ອງ.
ທ່ານ ຄໍາບູນ ດວງພະບາງຮອງເຈົ້າແຂວງອັດຕະປືກ່າວວ່າ: ໂຄງການດັ່ງກ່າວໄດ້ຈັດຕັ້ງປະຕິບັດມາແຕ່ເດືອນສິງຫາ 2020 ເປັນຕົ້ນມາ ເພື່ອຍົກລະດັບຄວາມທົນທານຕໍ່ດິນຟ້າອາກາດໃຫ້ແກ່ລັດຖະບານ ສປປ ລາວ ແລະ ປະຊາຊົນແຂວງອັດຕະປື ໂດຍສະເພາະຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມໃນປີ 2018. ທ່ານຍັງໄດ້ຍົກໃຫ້ເຫັນຕື່ມວ່າ:ເປົ້າໝາຍສູງສຸດແມ່ນເພື່ອເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນກວ່າຕອນກ່ອນເກີດໄພພິບັດ, ໂດຍຜ່ານການປັບປຸງຜົນຜະລິດກະສິກໍາ, ການຜະລິດກະສິກໍາທີ່ມີຄວາມທົນທານຕໍ່ດິນຟ້າອາກາດ, ການພັດທະນາສີມືແຮງງານ, ການຄຸ້ມຄອງຄວາມສ່ຽງໄພພິບັດ ທີ່ສອດຄ່ອງກັບບັນດາບຸລິມະສິດການພັດທະນາກະສິກໍາຂອງລັດຖະບານ.ທ່ານຍັງໄດ້ເນັ້ນວ່າຖ້າປາສະຈາກການສະໜັບສະໜູນດ້ານເຕັກນິກຈາກອົງການ FAO ແລະ ການປະກອບສ່ວນດ້ານທຶນຮອນຈາກອົງການ KOICA, ຊີວິດການເປັນຢູ່ຂອງປະຊາຊົນທີ່ດຳລົງຊີວິດຢູ່ໃນຂົງເຂດເປົ້າໝາຍກໍຍາກທີ່ຈະໄດ້ຮັບການຟື້ນຟູໃຫ້ດີຂຶ້ນ.
ທ່ານນາງ ຄະຢອງ ມີ ຄິມຜູ້ຕາງໜ້າອົງການ FAO ປະຈຳ ສປປ ລາວໄດ້ຍົກໃຫ້ເຫັນວ່າ:ໂຄງການ Climate REAL ໄດ້ຖືກອອກແບບມາເພື່ອຊຸກຍູ້ທຸລະກິດກະສິກຳຂະໜາດນ້ອຍ ໂດຍຜ່ານ ຕ່ອງໂສ້ມູນຄ່າລວມ, ພ້ອມທັງ ສະໜັບສະໜູນຊຸມຊົນເພື່ອປັບປຸງ ແລະ ຄຸ້ມຄອງການເຂົ້າເຖິງນໍ້າ, ການນຳໃຊ້ທີ່ດິນ ແລະ ປັບປຸງຄຸນນະພາບຂອງດິນຢ່າງຍືນຍົງ.
ທ່ານຍັງໄດ້ກ່າວອີກວ່າ: ໂຄງການນີ້ຍັງໄດ້ເສີມຂະຫຍາຍຄວາມອາດສາມາດຂອງທ້ອງຖິ່ນ ແລະ ຊຸມຊົນໃນການຄຸ້ມຄອງຄວາມສ່ຽງຈາກໄພພິບັດ ແລະ ການປັບຕົວເຂົ້າກັບການປ່ຽນແປງດິນຟ້າອາກາດໃນຂະແໜງກະສິກຳນໍາໄປສູ່ການຫຼຸດຜ່ອນຄວາມສ່ຽງ ແລະ ເພີ່ມທະວີການກຽມຄວາມພ້ອມຮັບມືກັບໄພພິບັດ.ທ່ານນາງ ຄິມ ໄດ້ສະແດງຄວາມຂອບໃຈມາຍັງບັນດາພາກສ່ວນກ່ຽວຂ້ອງຂອງລັດຖະບານທີ່ໃຫ້ການຊີ້ນໍາ-ນໍາພາ ແລະ ອຸທິດຕົນໃຫ້ແກ່ວຽກງານຂອງອົງການ FAO ໃນແຂວງອັດຕະປື ຕະຫຼອດໄລຍະໂຄງການ ໃຫ້ໄດ້ຮັບຜົນດີ ແລະ ປະສົບຜົນສໍາເລັດ.
ໂຄງການດັ່ງກ່າວໄດ້ຮັບການຜັນຂະຫຍາຍຢ່າງສຳເລັດຜົນຢູ່ໃນ 31 ບ້ານເປົ້າໝາຍ ໃນ 3 ເມືອງຂອງແຂວງອັດຕະປື (ເມືອງສາມັກຄີໄຊ, ເມືອງໄຊເສດຖາ, ເມືອງສະໜາມໄຊ), ໂດຍມີການປະສານສົມທົບກັນຢ່າງແໜ້ນແຟ້ນກັບໜ່ວຍງານລັດຂັ້ນສູນກາງ ແລະ ທ້ອງຖິ່ນ.ເຖິງແມ່ນວ່າຈະຊັກຊ້າໃນການເລີ່ມຕົ້ນການຈັດຕັ້ງປະຕິບັດໂຄງການເນື່ອງຈາກສະພາບການ ໂຄວິດ-19, ຊາວກະສິກອນ 2.641 ຄົວເຮືອນ (ລວມທັງຊາວກະສິກອນຕົວແບບ 307 ຄົນ) ແລະ ພະນັກງານລັດ ແລະ ອໍານາດການປົກຄອງບ້ານ ຈໍານວນ 181 ຄົນ ກໍໄດ້ຮັບຜົນປະໂຫຍດຈາກການຈັດຕັ້ງປະຕິບັດຂອງໂຄງການ.
ນທາງອ້ອມ, ໂຄງການ Climate REAL ໄດ້ສ້າງຜົນປະໂຫຍດໃຫ້ແກ່ 7.873 ຄົວເຮືອນ, ປະມານ 37.091 ຄົນ ໃນ 31 ບ້ານ ໂດຍຜ່ານພື້ນຖານໂຄງລ່າງຂອງຊຸມຊົນ ແລະ ການສ້າງຂີດຄວາມອາດສາມາດ, ລວມທັງ ພະນັກງານຂອງລັດໃນຂັ້ນສູນກາງ ແລະ ທ້ອງຖິ່ນປະມານ 235 ຄົນ ໂດຍຜ່ານການສ້າງຂີດຄວາມອາດສາມາດໃຫ້ແກ່ເຂົາເຈົ້າ.
ຂ່າວ: ຄຳປະສິດ
ຄໍາເຫັນ