ຂົງເຂດຍຸຕິທຳແຂວງ ບໍລິຄຳໄຊ ຍົກລະດັບຄວາມຮູ້ ວຽກງານໄກ່ເກ່ຍຂໍ້ຂັດແຍ່ງຂັ້ນບ້ານ

ວິທະຍາກອນຈາກກະຊວງ ຍຸຕະທຳໄດ້ນຳສະເໜີ ຄວາມຮູ້ກ່ຽວກັບໜ່ວຍໄກ່ເກ່ຍ ແລະ ຜູ້ໄກ່ເກ່ຍຂໍ້ຂັດແຍ່ງຂັ້ນບ້ານ,ຫຼັກການພື້ນຖານໃນການໄກ່ເກ່ຍ,ຂໍ້ຂັເແຍ່ງທີ່ນຳມາໄກ່ເກ່ຍ,ບາດກ້າວຂອງການດຳເນີນການໄກ່ເກ່ຍ,ການຖາມ ແລະ ການຈັບໃຈຄວາມ,ການໄຈ້ແຍກຄວາມຈຳເປນ ແລະ ຄວາມຕ້ອງການ ແລະ ຫຼາຍຫົວຂໍ້ທີ່ກ່ຽວພັນ.ວຽກງານໄກ່ເກ່ຍຂໍ້ຂັດແຍ່ງຂັ້ນບ້ານ ແມ່ນຂະບວນການແກ້ໄຂຂໍ້ຂັດແຍ່ງທາງແພ່ງ, ຂໍ້ຂັດແຍ່ງໃນຄອບຄົວ ຫຼື ການກະທຳຜິດທາງອາຍາໃນສະຖານເບົາ ທີ່ເກີດຂຶ້ນພາຍໃນທ້ອງຖິ່ນ ໂດຍມີ ໜ່ວຍງານໄກ່ເກ່ຍຂໍ້ຂັດແຍ່ງຂັ້ນບ້ານເປັນຜູ້ອຳນວຍຄວາມສະດວກ ເພື່ອໃຫ້ຄູ່ກໍລະນີສາມາດຕົກລົງເຫັນດີ ແລະ ປະນີປະນອມຍອມຄວາມກັນ ໂດຍສັນຕິວິທີ, ແນໃສ່ສ້າງຄວາມສາມັກຄີອັນດີງາມ ແລະ ຮັກສາຄວາມສະຫງົບສຸກພາຍໃນບ້ານ ເພື່ອຫຼຸດຜ່ອນຄວາມເຄັ່ງຕຶງ ຊ່ວຍແກ້ໄຂບັນຫາລະຫວ່າງເພື່ອນບ້ານ, ຍາດຕິພີ່ນ້ອງ ຫຼື ຄົນໃນຊຸມຊົນດຽວກັນ ບໍ່ໃຫ້ບານປາຍກາຍເປັນເລື່ອງໃຫຍ່ຫຼຸດຜ່ອນພາລະຂອງສານ ຊ່ວຍໃຫ້ຄູ່ກໍລະນີບໍ່ຕ້ອງເສຍເວລາ ແລະ ຄ່າໃຊ້ຈ່າຍໃນການຂຶ້ນສານ , ເນັ້ນການເຈລະຈາແບບ "ບົວບໍ່ໃຫ້ຊ້ຳ ນ້ຳບໍ່ໃຫ້ຂຸ່ນ" ເພື່ອໃຫ້ທັງສອງຝ່າຍຍັງສາມາດດຳລົງຊີວິດຢູ່ຮ່ວມກັນໄດ້ຢ່າງມີຄວາມສຸກ.ຫ້າມໄກ່ເກ່ຍຄະດີອາຍາຮ້າຍແຮງ ເຊັ່ນ: ການຄາດຕະກຳ, ການປູ້ນຊັບ, ຢາເສບຕິດ ຫຼື ຄະດີທີ່ສົ່ງຜົນກະທົບຕໍ່ຄວາມໝັ້ນຄົງຂອງຊາດ,ຄະດີເຫຼົ່ານີ້ຕ້ອງສົ່ງໃຫ້ເຈົ້າໜ້າທີ່ຕຳຫຼວດ ຫຼື ອົງການໄອຍະການດຳເນີນຄະດີຕາມກົດໝາຍ.ການໄກ່ເກ່ຍຂໍ້ຂັດແຍ່ງ ແມ່ນຂະບວນການແກ້ໄຂບັນຫາໂດຍສັນຕິວິທີ, ເຊິ່ງອາໄສຄົນກາງ (ຜູ້ໄກ່ເກ່ຍ) ເປັນຜູ້ຊ່ວຍເຫຼືອໃຫ້ຄູ່ກໍລະນີສາມາດຕົກລົງເຫັນດີ ແລະ ຊອກຫາທາງອອກຮ່ວມກັນໄດ້.ຜູ້ໄກ່ເກ່ຍຕ້ອງວາງໂຕເປັນກາງຢ່າງເດັດຂາດ. ບໍ່ເຂົ້າຂ້າງຝ່າຍໃດຝ່າຍໜຶ່ງ, ບໍ່ມີຜົນປະໂຫຍດທັບຊ້ອນກັບຄູ່ກໍລະນີ ແລະ ບໍ່ຕັດສິນວ່າໃຜຖືກຫຼືຜິດ,ຜູ້ໄກ່ເກ່ຍມີໜ້າທີ່ພຽງແຕ່ "ອຳນວຍຄວາມສະດວກ" ໃຫ້ທັງສອງຝ່າຍລົມກັນໄດ້ງ່າຍຂຶ້ນເທົ່ານັ້ນ.ນອກຈາກພາກທິດສະດີແລ້ວ ສຳມະນາກອນຍັງໄດ້ແບ່ງກູ່ມ ທົດລອງພາກປະຕິບັດຕົວຈິງໃນຖານສົມມຸດ,ພ້ອມຍົກຫຼາຍບັນຫາປຶກສາຫາລືແລກປ່ຽນຖອດຖອນບົດຮຽນວຽກງານໄກ່ເກ່ຍຢູ່ທ້ອງຖີ່ນຮາກຖານຂອງຕົນ.ໃນຕອນທ້າຍ ທ່ານ ປະທານ ໄດ້ຮຽກຮ້ອງໃຫ້ຜູ້ຮັບຜິດຊອບວຽກງານຂົງເຂດຍຸຕິທຳແຕ່ລະຂັ້ນ ຈົ່ງໄດ້ນຳເອົາບົດຮຽນໃນຄັ້ງນີ້ນຳໄປຈັດຕັ້ງຜັນຂະຫຍາຍຢູ່ທ້ອງຖິ່ນຂອງຕົນໃຫ້ມີຜົນສຳເລັດ.ຂ່າວ_ພາບ: ສາຍສະໝອນ