 |
ລຸງ ຄໍາພັນ ວໍລະແສງ ກ່າວເມື່ອບໍ່ດົນມານີ້ ວ່າ: ປັດຈຸບັນ ຄອບຄົວຂອງຂ້າພະເຈົ້າມີສະມາຊິກທັງໝົດ 7 ຄົນ, ຍິງ 3 ຄົນ, ໃນນັ້ນມີແຮງງານຕົ້ນຕໍ 4 ຄົນ, ຍິງ 2 ຄົນ ແລະ ແຮງງານສໍາຮອງ 3 ຄົນ ຍິງ 1 ຄົນ; ເມື່ອກ່ອນຢູ່ຖິ່ນຖານເດີມບ້ານຫ້ວຍແຫ້, ເມືອງຈຳປາສັກແຂວງຈໍາປາສັກ ຕອນນັ້ນຊີວິດການເປັນຢູ່ລໍາບາກສົມຄວນ, ມີເນື້ອທີ່ນາປູກເຂົ້າໜ້ອຍ, ບໍ່ສາມາດຂະຫຍາຍເພີ່ມໄດ້, ໄດ້ຜົນຜະລິດພໍກຸ້ມກິນ. ມາຮອດປີ 2017 ຈຶ່ງຕັດສິນໃຈຍົກຍ້າຍມາຢູ່ເມືອງພູວົງແຂວງອັດຕະປື ເພື່ອຫາຊ່ອງທາງທຳມາຫາກິນໂດຍສະເພາະການປູກຝັງ-ລ້ຽງສັດ, ໂດຍປະຕິບັດຕາມແນວທາງນະໂຍບາຍຂອງພັກ ແລະແຜນພັດທະນາເສດຖະກິດ-ສັງຄົມຂອງເມືອງວາງອອກ. ເບື້ອງຕົ້ນ ໄດ້ເຂົ້າຮ່ວມກິດຈະກໍາປູກມັນຕົ້ນ ເຊິ່ງສະໜັບສະໜູນໂດຍໂຄງການອີຟັດ ໃນເນື້ອທີ 3 ຮຕ ຜົນຜະລິດໄດ້ 6 ໂຕນ/ຮຕ ລາຍຮັບສະເລ່ຍປະມານ35 ລ້ານກີບ ຕໍ່ປີ, ແຕ່ເຫັນວ່າຕະຫຼາດເກັບຊື້ມັນຕົ້ນ ຕອນນັ້ນບໍ່ກວ້າງຂວາງ ແລະລາຄາຕົກ ຈຶ່ງຫັນມາປູກອ້ອຍນໍາບໍລິສັດທີທີຊີ ຕາມກົນໄກ 2+3 (ການລົງທຶນແບບມີສ່ວນຮ່ວມ) ເລີ່ມແຕ່ປີ 2018 ເຖິງປັດຈຸບັນ, ໂດຍໄດ້ຮຽນຮູ້ ແລະນໍາໃຊ້ເຕັກນິກວິທະຍາສາດກະສິກໍາແບບໃໝ່ ເຂົ້າໃນການຜະລິດ ເຮັດໃຫ້ໄດ້ຮັບປະສິດທິຜົນສູງ. ໃນປີ 2019 ເລີ່ມຕົ້ນປູກອ້ອຍໃນເນື້ອທີ່ 22 ຮຕ ໄດ້ຜົນຜະລິດ 65 ໂຕນ/ຮຕລາຍຮັບຈາກການຂາຍອ້ອຍສະເລ່ຍປະມານ371 ລ້ານກວ່າກີບ ທຽບໃສ່ຕົ້ນທຶນແມ່ນຍັງໄດ້ເງິນໜ້ອຍຢູ່ ເພາະປີທໍາອິດໄດ້ລົງທຶນຫຼາຍ, ແຕ່ກໍຍັງບົວລະບັດຕໍອ້ອຍໃໝ່ອີກ ໄດ້ 1-2 ປີ ລວມເນື້ອທີ່ທັງໝົດຕອນນີ້ 42 ຮຕ.
ປັດຈຸບັນ, ຜົນຜະລິດ ແລະລາຍຮັບຈາກການຂາຍອ້ອຍດີຂຶ້ນເລື້ອຍໆ ສະເລ່ຍ 570 ລ້ານກວ່າກີບ/ປີ; ນອກຈາກປູກອ້ອຍແລ້ວ ກໍຍັງມີລາຍຮັບຈາກການບໍລິການບຸກເບີກສວນ, ໄຖສວນ, ຄີບອ້ອຍ, ຂົນອ້ອຍ ສະເລ່ຍໄດ້ 258 ລ້ານກວ່າກີບ/ປີ, ໄດ້ຈາກການຂາຍມັນຕົ້ນ 270 ລ້ານກວ່າກີບ ແລະໄດ້ຈາກການຂາຍສັດລ້ຽງອື່ນໆອີກ 50 ລ້ານກີບ/ປີ ລວມລາຍຮັບທັງໝົດ 1,164 ລ້ານກີບ/ປີ.
 |
ທັງໝົດນັ້ນໄດ້ມາຈາກເຫື່ອແຮງ ຄວາມດຸໝັ່ນອົດທົນຂອງຕົນ ແລະສະມາຊິກໃນຄອບຄົວ ເຮັດໃຫ້ຊີວິດການເປັນຢູ່ ຂອງຄອບຄົວດີຂຶ້ນເທື່ອລະກ້າວ. ປັດຈຸບັນ, ຂ້າພະເຈົ້າມີເຮືອນຢູ່ຖາວອນ 3 ຫຼັງ, ລົດໄຖຄູໂບຕາ 2 ຄັນ, ມີພາຫະນະ, ລົດຄີບອ້ອຍ 1 ຄັນ ແລະມີເຄື່ອງອຸປະກອນຮັບໃຊ້ການຜະລິດຢ່າງພຽງພໍ, ມີລະບົບນໍ້າໂຊລາເຊວ 3 ບໍ່ ນໍາໃຊ້ເຂົ້າໃນການຫົດອ້ອຍໃນຍາມແລ້ງ.
ຜົນສໍາເລັດທັງໝົດນັ້ນ ກໍຍ້ອນແນວທາງນະໂຍບາຍຂອງພັກ-ລັດ ກໍຄືຄວາມເອົາໃຈໃສ່ ຂອງຄະນະພັກ-ອົງການປົກຄອງເມືອງພູວົງ, ບັນດາຂະແໜງການທີ່ກ່ຽວຂ້ອງ ເຊິ່ງຍາມໃດກໍໄດ້ເອົາໃຈໃສ່ຊີ້ທິດເຍືອງທາງ ແລະຊີ້ນໍາ-ນໍາພາ ພ້ອມທັງສ້າງເງື່ອນໄຂອໍານວຍຄວາມສະດວກ ໃຫ້ແກ່ປະຊາຊົນບັນດາເຜົ່າຊາວເມືອງພູວົງ ໃຫ້ໄດ້ຮັບການພັດທະນາ, ແກ້ໄຂຊີວິດການເປັນຢູ່ ຂອງຄອບຄົວໃຫ້ພົ້ນທຸກເທື່ອລະກ້າວ.
(ພາບ-ຂ່າວ: ມີໄຊ)
ຄໍາເຫັນ