ກົມໂຄສະນາ ຄະນະໂຄສະນາອົບຮົມສູນກາງພັກ (ຄອສພ) ໄດ້ເປີດຊຸດຝຶກອົບຮົມວຽກງານໂຄສະນາຜ່ານສື່ ແລະ ຜູ້ດຳເນີນລາຍການວິທະຍຸ-ໂທລະພາບ ຂຶ້ນໃນ ວັນທີ 26 ກັນຍາ ນີ້ ທີ່ຫ້ອງປະຊຸມໂຕະມົນ ຊັ້ນ 2 ຂອງ ຄອສພ. ໂດຍການເປັນປະທານ ຂອງ ທ່ານ ນາງ ວິລະວອນ ພັນທະວົງ ຄະນະປະຈຳພັກ ຮອງຫົວໜ້າ ຄອສພ ທັງເປັນປະທານກວດກາ, ມີຄະນະພັກ, ຫົວໜ້າກົມ, ຮອງກົມ, ຫົວໜ້າພະແນກ, ຮອງພະແນກ, ພະນັກງານວິຊາການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ຈຸດປະສົງ: ເພື່ອຝຶກອົບຮົມເຕັກນິກການຖ່າຍທຳວິດີໂອ, ຖ່າຍພາບນິ້ງ, ຕັດຕໍ່, ຜູ້ດຳເນີນລາຍການວິທະຍຸ-ໂທລະພາບ ແລະ ການຂຽນບົດໂຄສະນາຜ່ານສື່ ໃຫ້ພະນັກງານວິຊາການ ພາຍໃນກົມໂຄສະນາ (ຄອສພ) ແລະ ສື່ມວນຊົນອ້ອມຂ້າງ ໃນນະຄອນຫຼວງວຽງຈັນຈຳນວນໜຶ່ງ. ຊຸດຝຶກອົບຮົມໃນຄັ້ງນີ້ຈະໄດ້ດຳເນີນເປັນເວລາ 4 ວັນ, ນັບແຕ່ 26-29 ກັນຍາ 2023 ຊຶ່ງບົດຮຽນທີ່ຈະນຳມາຝຶກອົບຮົມແມ່ນ: 7 ບົດຄື: 1. ບົດຮຽນ, ເຕັກນິກ, ທັກສະການເປັນໂຄສົກລາຍການວິທະຍຸ, 2. ບົດຮຽນການຂຽນຂ່າວ ອອກໜັງສືພິມ ແລະ ເວັບໄຊ ນຳສະເໜີໂດຍ ທ່ານ ວັນໄຊ ຕະວິນຍານ ກຳມະການຄະນະພັກ ຮອງຫົວໜ້າ ຄອສພ ຫົວໜ້າ ບກ ໃຫຍ່ ໜັງສືພິມປະຊາຊໍົນ, 3. ບົດຮຽນ, ເຕັກນິກ ແລະ ທັກສະການເປັນໂຄສົກລາຍການໂທລະພາບ ນຳສະເໜີໂດຍ ທ່ານ ຫຸມແພງ ວິໄລພອນ. 4. ການຕັດຕໍ່ວິດີໂອ ນຳສະເໜີໂດຍ ທ່ານ ສີຫາ ຈັນທະລັງສີ. 5. ການນຳໃຊ້ ແລະ ການຖ່າຍວິດີໂອ ນຳສະເໜີໂດຍ ທ່ານ ພູວິພັດ ເພັງສະຫວັດ. 6. ບົດຮຽນການຂຽນບົດ ອອກວາລະສານ ແລະ ລາຍການວິທະຍຸກະຈາຍສຽງ ນຳສະເໜີໂດຍ ທ່ານ ໂພເມກ ວິໄລສັກ. 7. ເຕັກນິກການນຳໃຊ້ກ້ອງຖ່າຍຮູບ ແລະ ການຖ່າຍຮູບນິ້ງ ນຳສະເໜີໂດຍ ຂ່າວສານປະເທດລາວ.
ທ່ານ ນາງ ວິລະວອນ ພັນທະວົງ ຍັງໄດ້ເນັ້ນຕື່ມອີກວ່າ: ການຈັດຝຶກອົບຮົມເຕັກນິກການຖ່າຍທຳວິດີໂອ, ຖ່າຍພາບນິ້ງ, ຕັດຕໍ່, ຜູ້ດຳເນີນລາຍການວິທະຍຸ-ໂທລະພາບ ແລະ ການຂຽນບົດໂຄສະນາຜ່ານສື່ ໃຫ້ພະນັກງານວິຊາການ ກໍເພື່ອສ້າງການຫັນປ່ຽນຢ່າງແຂງແຮງ ໃນວຽກງານໂຄສະນາອົບຮົມ ໄປສູ່ຄຸນນະພາບໃໝ່; ໃນນີ້, ການປັບປຸງເຄື່ອງມືໃນການໂຄສະນາ ໂດຍສະເພາະແມ່ນ ສື່ມວນຊົນໃຫ້ມີຄຸນນະພາບ ແມ່ນຄວາມຈຳເປັນ ຂອງ ຄອສພ ຂອງພວກເຮົາ ຊຶ່ງປັດຈຸບັນເຄື່ອງມືໃນການໂຄສະນາ ຂອງ ຄອສພ ມີຄວາມອຸດົມສົມບູນສົມຄວນ. ຍ້ອນຜ່ານມາພວກເຮົາຍັງບໍ່ທັນໄດ້ໝູນໃຊ້ເຄື່ອງມືທີ່ເຮົາມີ ໃຫ້ມີປະສິດທິພາບ, ໂດຍສະເພາະແມ່ນວຽກງານໂຄສະນາຜ່ານສື່ ຈຶ່ງເນັ້ນ 7 ບົດດັ່ງທີ່ກ່າວມາຂ້າງເທິງນັ້ນ, ການຝຶກອົບຮົມວຽກງານໂຄສະນາຜ່ານສື່ ໃນຄັ້ງນີ້ ສຸດທີ່ມີຄວາມໝາຍຄວາມສຳຄັນຫຼາຍ ຊຶ່ງຈະເຮັດໃຫ້ວຽກງານຜ່ານສື່ຂອງພວກເຮົາມີການຫັນປ່ຽນໄປສູ່ຄຸນະພາບໃໝ່ ແລະ ເນື່ອງຈາກວ່າເວລາຮຽນມີຈຳກັດຈຶ່ງຮຽກຮ້ອງໃຫ້ບັນດາສະຫາຍນັກຝຶກອົບຮົມ ຈົ່ງພ້ອມກັນຍົກສູງຄວາມຮັບຜິດຊອບ ແລະ ເຂັ້ມງວດໃນການປະຕິບັດໂມງເວລາ ເພື່ອໃຫ້ການຝຶກອົບຮົມໃນຄັ້ງນີ້ປະສົບຜົນສຳເລັດຕາມຈຸດປະສົງ ແລະ ຄາດໝາຍທີ່ວາງໄວ້.
(ຂ່າວ-ພາບ: ພັດ ລໍວັນໄຊ)
ຄໍາເຫັນ