ມີຄວາມຮູ້ສຶກເປັນກຽດ ແລະພາກພູມໃຈເປັນຢ່າງຍິ່ງ ທີ່ວັນຊາດ2 ທັນວາ ໄດ້ໝູນວຽນມາບັນຈົບຄົບຮອບ 49 ປີ.
ດັ່ງທີ່ພວກເຮົາຮູ້ຈັກກັນດີ,ຊາດລາວ ມີປະຫວັດສາດຄວາມເປັນມາແຕ່ດຶກດຳບັນ ຜ່ານປະຫວັດສາດການຕໍ່ສູ້ອັນລະອິດລະອ້ຽວ ແລະຍືດເຍື້ອຍາວນານມາຫຼາຍສະຕະວັດ ນັບຕັ້ງແຕ່ເຈົ້າຟ້າງຸ່ມທ້ອນໂຮມອານາຈັກລາວລ້ານຊ້າງເປັນອັນໜຶ່ງອັນດຽວກັນ ຈົນມາຮອດສະໄໝການປົກຄອງຂອງເຈົ້າສຸລິຍະວົງສາທຳມິກະລາດເຮັດໃຫ້ອານາຈັກລາວລ້ານຊ້າງມີຄວາມຈະເລີນຮຸ່ງເຮືອງ. ຍ້ອນຄວາມແຕກແຍກຄວາມສາມັກຄີພາຍໃນ ເຮັດໃຫ້ຕົກເປັນຫົວເມືອງຂຶ້ນຂອງອານາຈັກສະຫຍາມ ແຕ່ປີ 1779-1893, ຕົກມາຮອດສະໄໝລ່າເມືອງຂຶ້ນລາວເຮົາກໍໄດ້ຕົກເປັນຫົວເມືອງຂຶ້ນຂອງຈັກກະພັດ, ຮອດປີ 1954 ຈັກກະພັດ ຍອມເຊັນສັນຍາເຊີແນວ ແຕ່ເຖິງຢ່າງໃດກໍ່ຕາມພວກຈັກກະພັດໂຕໃໝ່ ໄດ້ເຂົ້າມາປົກຄອງລາວອີກ.ຈາກສະພາບການດັ່ງກ່າວ ປະຊາຊົນລາວເຮົາໄດ້ພ້ອມກັນລຸກຮືຂຶ້ນຕໍ່ສູ້ຢ່າງພິລະອາດຫານ ແຕ່ຍ້ອນເຫຼັກຫຼາຍກວ່າຖ່ານ ເຮັດໃຫ້ຂະບວນການຕໍ່ສູ້ບໍ່ໄດ້ຮັບໄຊຊະນະ ຈົນມາຮອດປີ 1955 ພັກປະຊາຊົນປະຕິວັດລາວໄດ້ຮັບການສ້າງຕັ້ງຂຶ້ນ ຊຶ່ງໄດ້ກາຍເປັນຄັນທຸງເຕົ້າໂຮມຄວາມສາມັກຄີບັນດາເຜົ່າຕໍ່ສູ້ກັບພວກຈັກກະພັດໂຕໃໝ່ ແລະ ລູກມື ເຮັດໃຫ້ການຕໍ່ສູ້ໄດ້ຮັບການນຳພາ, ຂົນຂວາຍປະຊາຊົນຜູ້ຮັກຊາດ ປົກປັກຮັກສາຜືນແຜ່ນດິນອັນຄົບຖ້ວນ ຈຶ່ງໄດ້ຮັບໄຊຊະນະເປັນກ້າວໆມາ ຈົນສາມາດຢຶດອໍານາດຈາກການປົກຄອງຂອງພວກຈັກກະພັດລ່າຫົວເມືອງຂຶ້ນໃນວັນທີ 2 ທັນວາ 1975 ໄດ້ປະກາດສ້າງຕັ້ງ ສາທາລະນະລັດ ປະຊາທິປະໄຕ ປະຊາຊົນລາວ ຢ່າງເປັນທາງການ.
ພາຍຫຼັງໄດ້ຢຶດອຳນາດການປົກຄອງມາໄດ້ໃນທົ່ວປະເທດ ແລະ ສ້າງຕັ້ງລະບອບໃໝ່ຂຶ້ນໃນສະພາບສາກົນ ແລະ ພາກພື້ນ ຜັນແປໄປຢ່າງສັບສົນ; ໃນເວລາດຽວກັນນັ້ນປະເທດເຮົາຊ້ຳພັດດ້ອຍພັດທະນາເກີນໄປ, ພື້ນຖານວັດຖຸ, ເຕັກນິກເກືອບວ່າບໍ່ມີຫຍັງ, ຜົນຮ້າຍຕາມມາຂອງສົງຄາມແມ່ນໜັກໜ່ວງຫຼາຍ, ອັນເຕັມໄປດ້ວຍຄວາມຫຍຸ້ງຍາກສັບສົນທີ່ສຸດໃນເວລາດຽວກັນນັ້ນຊ້ຳພັດປະເຊີນໜ້າກັບກົນອຸບາຍຫຼ່ຽມລາຍໃໝ່ຂອງບັນດາອິດທິກຳລັງປໍລະປັກກໍຄືພວກຄົນບໍ່ດີພາຍໃນປະເທດ.
ພັກເຮົາຈຶ່ງຕັດສິນໃຈປະຕິບັດແນວທາງປ່ຽນແປງໃໝ່ ເພື່ອໃຫ້ສອດຄ່ອງກັບສະພາບຂອງຍຸກສະໄໝນັບຕັ້ງແຕ່ປີ 1986 ເປັນຕົ້ນມາ ມາຮອດປັດຈຸບັນ ສປປລາວ ໄດ້ໝູນວຽນມາບັນຈົບຄົບຮອບ 49 ປີພໍດີ. ສປປລາວ ພາຍໃຕ້ການນຳພາຂອງພັກໄດ້ເຮັດໃຫ້ປະເທດຊາດມີຄວາມສະຫງົບປອດໄພ, ເສດຖະກິດ, ວັດທະນະທຳ-ສັງຄົມໄດ້ຮັບການພັດທະນາຢ່າງກ້າວກະໂດດ, ຊີວິດການເປັນຢູ່ຂອງປະຊາຊົນໄດ້ຮັບການເບິ່ງແຍງ ແລະພັດທະນາຂຶ້ນເປັນກ້າວໆ, ເຮັດໃຫ້ລະບົບການເມືອງ ປະຊາທິປະໄຕປະຊາຊົນ ມີຄວາມໜັກແໜ້ນເຂັ້ມແຂງ, ຊື່ສຽງຂອງປະເທດໄດ້ຍົກສູງບົດບາດໃນເວທີສາກົນ ແລະພາກພື້ນ.
ທັງໝົດນັ້ນ,ແມ່ນຜົນງານອັນຍິ່ງໃຫຍ່ຂອງພວກເຮົາ.ໃນນາມທີ່ເປັນພະນັກງານ-ສະມາຊິກພັກຜູ້ສືບທອດພາລະກິດຂອງຊາດ ຂອງພັກ ຈະສືບຕໍ່ຢຶດໝັ້ນໃນແນວຄິດ, ທິດສະດີມາກ - ເລນິນ,ແນວຄິດ ໄກສອນ ພົມວິຫານ ກໍຄືເດີນຕາມຈຸດໝາຍສັງຄົມນິຍົມຢ່າງໜັກແໜ້ນ, ເປັນເຈົ້າການປະດິດສ້າງໃນການໝູນໃຊ້ທິດສະດີ, ບົດຮຽນດ້ານຕ່າງໆເຂົ້າກັບເງື່ອນໄຂຕົວຈິງ; ເສີມຂະຫຍາຍຄວາມສາມັກຄີເປັນເອກະພາບພາຍໃນ-ພາຍນອກໃຫ້ໜັກແໜ້ນ; ມີຄວາມຈົງຮັກພັກດີຕໍ່ຜົນປະໂຫຍດລວມຂອງຊາດ, ຂອງປະຊາຊົນ; ຖືຄຸນທາດການເມືອງ, ຄຸນສົມບັດສິນທຳປະຕິວັດ ເປັນສິ່ງຕັດສິນໃນການເລືອກເຟັ້ນ ແລະ ນຳໃຊ້ພະນັກງານ; ຢຶດໝັ້ນຈິດໃຈຮັກຊາດ, ເອກະລາດເປັນເຈົ້າຕົນເອງ, ເພິ່ງຕົນເອງ ສ້າງຄວາມເຂັ້ມແຂງດ້ວຍຕົນເອງຕາມແນວທາງສ້າງເສດຖະກິດເອກະລາດ ເປັນເຈົ້າຕົນເອງໃນໄລຍະໃໝ່ໃຫ້ຫຼາຍຂຶ້ນ.
ຄໍາເຫັນ