ຄຸ້ມຄອງປ້ອງກັນ ແລະ ຮັກສາເສັ້ນຊາຍແດນ ໃຫ້ມີຄວາມສະຫງົບ

ສະຫາຍ ພັນຕີ ວິໄລພອນ ອິນທິລາດ ຮອງຫົວໜ້າການທະຫານກອງຮ້ອຍທະຫານຊາຍແດນ 325 ໃຫ້ຮູ້ວ່າ: ໃນໄລຍະຜ່ານມາ ຄະນະພັກ-ຄະນະບັນຊາ ກອງຮ້ອຍຊາຍແດນ ໄດ້ເອົາໃຈໃສ່ການຈັດຕັ້ງປະຕິບັດວຽກງານຮອບດ້ານ ຕາມການຊີ້ນໍາຂອງຂັ້ນເທິງ ໂດຍຕິດພັນກັບ 4 ໜ້າທີ່ໃຫຍ່ 26 ແຜນງານຂອງຄະນະພັກກະຊວງປ້ອງກັນປະເທດວາງອອກ ຊຶ່ງມີຜົນສຳເລັດຫຼາຍດ້ານ ອັນພົ້ນເດັ່ນແມ່ນ ວຽກງານຮັບປະກັນເຮັດໃຫ້ສະພາບມີຄວາມສະຫງົບ ແລະ ເຄື່ອນໄຫວກວດກາລາດຕະເວນ ອັດປ່ອງຂ້າມລອຍຂອງກຸ່ມຄົນບໍ່ດີ, ສິ່ງທີ່ຜິດກົດໝາຍຢູ່ຕາມຊາຍແດນໃນແຕ່ລະວັນ ໂດຍໄດ້ຈັດຕັ້ງກຳລັງປະຈຳການຕະຫຼອດ 24 ຊົ່ວໂມງ ຢູ່ແຕ່ລະຈຸດ, ແຕ່ລະດອນ, ໄດ້ມີກຳລັງປະຈຳການກຽມພ້ອມສູ້ຮົບຢ່າງເຂັ້ມງວດ ແລະ ປະສານສົມທົບກັບກຳລັງປ້ອງກັນຊາດ-ປ້ອງກັນຄວາມສະຫງົບ ຂອງເມືອງໄຊພູທອງ, ບ້ານອ້ອມຂ້າງ ເພື່ອເຮັດໜ້າທີ່ປ້ອງກັນທາງບົກ ແລະ ທາງນໍ້າ ແນ່ໃສ່ຮັບປະກັນເຮັດໃຫ້ສະພາບມີຄວາມສະຫງົບປອດໄພ. ພ້ອມກັນນີ້, ຄະນະພັກ-ຄະນະບັນຊາ ຍັງໄດ້ເອົາໃຈໃສ່ໂຄສະນາສຶກສາອົບຮົມການເມືອງນໍາພາແນວຄິດໃຫ້ພະນັກງານ - ນັກຮົບ, ປະຊາຊົນຢູ່ໃນຂອບເຂດຄວາມຮັບຜິດຊອບໃຫ້ມີທັດສະນະແນວຄິດຫຼັກໝັ້ນການເມືອງຈະແຈ້ງ, ເຊື່ອໝັ້ນຕໍ່ການ ນໍາພາຂອງພັກ, ມີຄວາມຈົງຮັກພັກດີຕໍ່ພັກ - ຕໍ່ລັດ, ຕັ້ງໜ້າປະກອບສ່ວນເຂົ້າໃນວຽກງານ ປກຊ - ປກສ ທົ່ວປວງຊົນ ຮອບດ້ານຢ່າງສະເໝີຕົ້ນສະເໝີປາຍເພື່ອຕ້ານ ແລະ ສະກັດກັ້ນແກ້ໄຂປະກົດການຫຍໍ້ທໍ້ທີ່ເກີດຂຶ້ນໃຫທັນເວລາ, ວຽກງານຮັບປະກັນພະລາທິການ ໄດ້ສຸມໃສ່ການປູກ-ການລ້ຽງ ເປັນສຳຄັນ ໂດຍປະຕິບັດຕາມທິດນຳທີ່ວ່າ: ເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງ ດ້ວຍຕົນເອງ ເປັນສໍາຄັນເພື່ອແກ້ໄຂຊີວິດການເປັນຢູ່ຂອງພະນັກງານ-ນັກຮົບ ໃຫ້ດີຂຶ້ນ, ນອກນີ້ ຍັງໄດ້ປັບປຸງກໍ່ສ້າງສະຖານທີຄ້າຍຄູຂອງກົມກອງ ໃຫ້ມີຄວາມເປັນລະບຽບຮຽບຮ້ອຍຈົບງາມ, ໃນນີ້ ໄດ້ກໍ່ສ້າງສາງຄັງສຳເລັດ 1 ຫຼັງ, ປັບປຸງເດີ່ນຄ້າຍ, ເຮັດຫຼັກທຸງໃໝ່, ແລະ ປັບປຸງປົວແປງສະຖານທີ່ພັກເຊົາ, ເຮືອນນອນແຕ່ລະຈຸດ, ແຕ່ລະດອນ ສຳເລັດ.

ເນື່ອງໃນໂອກາດກະກຽມສະເຫຼີມສະຫຼອງສະຖາປະນາ ສປປ ລາວ ຄົບຮອບ 50 ປີ ແລະ ວັນຄ້າຍເກີດຂອງປະທານ ໄກສອນ ພົມວິຫານ ຄົບຮອບ 105 ປີ ໃຫ້ມີບັນຍາກາດຟົດຟື້ນກວ້າງຂວາງເລິກເຊິ່ງນັ້ນ, ສະຫາຍ ພັນຕີ ວິໄລພອນ ອິນທິລາດ ໄດ້ຕາງໜ້າໃຫ້ຄະນະພັກ-ຄະນະບັຊາກອງຮ້ອຍທະຫານຊາຍແດນ 325 ສະແດງຄວາມຮູ້ສືກພາກພູມໃຈທີ່ໄດ້ເຫັນປະເທດຊາດໄດ້ຮັບການພັດທະນາເປັນກ້າວໆມາ, ຈາກປະເທດທີ່ຕົກເປັນຫົວເມືອງຂື້ນຂອງຈັກກະພັດຕ່າງດ້າວ ມາຮອດປັດຈຸບັນພາຍຫຼັງປົດປ່ອຍປະເທດຊາດ ໄດ້ຢ່າງສົມບູນມາເປັນເວລາ 50 ປີຜ່ານມາ, ໂດຍພາຍໃຕ້ການນຳພາຢ່າງຮອບດ້ານຂອງພັກ ປະເທດຊາດຂອງພວກເຮົາຈິ່ງໄດ້ຮັບການພັດທະນາກ້າວຂື້ນເລື້ອຍໆ, ໃນໂອກາດນີ້, ຂໍສະແດງຄວາມຮູ້ບຸນຄຸນຕໍ່ການນຳພັກ-ລັດ ຈົ່ງມີສຸຂະພາບເຂັ້ມແຂງ ມີພາລະນາໄມສົມບູນ ສືບຕໍ່ຊີ້ນຳ-ນຳພາປວງຊົນລາວທັງຊາດ ໃຫ້ມີຄວາມມັ່ງຄັ່ງສີວິໄລຂື້ນເປັນກ້າວໆ, ອວຍພອນໄຊອັນປະເສີດ ມາຍັງຄະນະນຳກະຊວງປ້ອງກັນປະເທດ, ຄະນະພັກ-ຄະນະບັນຊາກອງບັນຊາການທະຫານແຂວງສະຫວັນນະເຂດເວົ້າສະເພາະກໍ່ແມ່ນຄະນະພັກ-ຄະນະບັນຊາ ຕະຫຼອດຮອດພະນັກງານ-ນັກຮົບ ກອງຮ້ອຍທະຫານຊາຍແດນ ຈົ່ງມີສຸຂະພາບແຂງແຮງ ພ້ອມກັນສືບຕໍ່ເຮັດສຳເລັດໜ້າທີ່-ທີ່ຂັ້ນເທິງມອບໝາຍໃຫ້.