ຄະນະພົວພັນຕ່າງປະເທດສູນກາງພັກ(ຄຕພ) ໄດ້ຈັດປາຖະກະຖາວັນເກີດປະທານ ໄກສອນ ພົມວິຫານ ຄົບຮອບ 103 ປີຂຶ້ນເມື່ອວັນທີ 18 ທັນວາ 2023.ພາຍໃຕ້ການເປັນປະທານ ຂອງ ສະຫາຍ ວາລະໄຊ ເລັ່ງສະຫວັດ, ກຳມະການຄະນະພັກ, ຮອງຫົວໜ້າຄຕພ, ມີຄະນະບໍລິຫານງານພັກ, ຄະນະນໍາ, ຕະຫຼອດຮອດພະນັກງານ-ລັດຖະກອນເຂົ້າຮ່ວມຢ່າງພ້ອມພຽງ.
ການປາຖະກະຖາຄັ້ງນີ້ ສະຫາຍ ນາງ ພອນລັດສະໝີ ພິມມະສອນ, ຮອງຫົວໜ້າພະແນກກິດຈະກຳ ແລະ ໂຄສະນາ ຫໍພິພິທະພັນ ໄກສອນ ພົມວິຫານໄດ້ຮັບກຽດເຜີຍແຜ່ ຊຶ່ງ ສະຫາຍ ໄດ້ຍົກໃຫ້ເຫັນເຖິງຊີວິດ ແລະ ການເຄື່ອນໄຫວປະຕິວັດ ຂອງ ປະທານ ໄກສອນ ພົມວິຫານ, ຕະຫຼອດຊີວິດຂອງ ປະທານໄກສອນ ພົມວິຫານ ແມ່ນອຸທິດທຸກຢ່າງໃຫ້ກັບພາລະກິດປະຕິວັດ ປະເທດເຮົາໄດ້ມີຫຼາຍວິລະກຳອັນລ້ຳເລີດ ທີ່ສະແດງໃຫ້ເຫັນເຖິງນ້ຳໃຈຮັກຊາດອັນສູງສົ່ງ, ໃຈກຳມະຊີບອັນໜັກແໜ້ນ, ຄວາມເດັດດ່ຽວບໍ່ຍອມຈຳນົນສັດຕູ, ຄວາມສະຫຼຽວສະຫຼາດ ແລະ ຄວາມເສຍສະຫຼະເພື່ອປະເທດຊາດ, ເພື່ອປະຊາຊົນຢ່າງບໍ່ມີຂີດຈຳກັດ ຊຶ່ງສະແດງອອກຢູ່ໃນພຶດຕິກໍາຕົວຈິງ ແລະ ຜ່ານຂະບວນວິວັດແຫ່ງການນຳພາ ຕໍ່ສູ້ປົດປ່ອຍຊາດ ກໍຄືພາລະກິດແຫ່ງການປົກປັກຮັກສາ ແລະ ພັດທະນາປະເທດຊາດ ຈົນສາມາດຍາດໄດ້ໄຊຊະນະຢ່າງສົມບູນ ແລະ ສະຖາປະນາເປັນປະເທດ ສປປ ລາວ, ໄຊຊະນະທີ່ຍາດມາໄດ້ທັງໝົດນັ້ນແມ່ນຍ້ອນຄວາມສະຫຼາດຫຼັກແຫຼມ,ຄວາມມີໄຫວພິບ ຂອງພັກເຮົາ ແລະ ຄວາມສາມັກຄີ ເປັນຈິດໜຶ່ງໃຈດຽວ ຂອງປວງຊົນລາວທັງຊາດ ໂດຍມີປະທານ ໄກສອນ ພົມວິຫານ ເປັນຜູ້ນຳພາ, ສະນັ້ນ ຜົນງານ ອັນຍິ່ງໃຫຍ່ ຂອງປະທານ ໄກສອນ ພົມວິຫານໃນພາລະກິດປະຕິວັດປະເທດເຮົາທີ່ຍັງຄົງໄວ້ຄູ່ກັບຊາດລາວເຮົາຕະຫຼອດໄປຄື: ປະທານ ໄກສອນ ພົມວິຫານເປັນຜູ້ກໍ່ຕັ້ງກອງລາດຊະວົງ ໃນວັນທີ 20ມັງກອນ 1949 ຊຶ່ງໄດ້ປ່ຽນຊື່ມາເປັນກອງທັບປະຊາຊົນລາວ; ໃນປັດຈຸບັນ ແລະ ໄດ້ກຳນົດເອົາວັນດັ່ງກ່າວ ເປັນວັນສ້າງຕັ້ງກອງທັບປະຊາຊົນລາວ; ເປັນຜູ້ນຳພາ ສ້າງຕັ້ງພັກປະຊາຊົນລາວ ໃນວັນທີ 22 ມີນາ 1955 ກາຍເປັນ ພັກປະຊາຊົນປະຕິວັດລາວ ໃນປັດຈຸບັນ ແລະ ໄດ້ກຳນົດເອົາວັນດັ່ງກ່າວ ເປັນວັນສ້າງຕັ້ງພັກປະຊາຊົນ ປະຕິວັດລາວ; ເປັນຜູ້ນຳພາ ຕໍ່ສູ້ລົບລ້າງແອກປົກຄອງ ຂອງພວກຈັກກະພັດລ່າເມືອງຂຶ້ນທັງແບບເກົ່າ ແລະ ແບບໃໝ່; ຍາດເອົາເອກະລາດ, ອິດສະຫຼະພາບມາໃຫ້ປະເທດຊາດ ຢ່າງສົມບູນໃນວັນທີ 2 ທັນວາ 1975 ແລະ ນຳພາສະຖາປະນາປະເທດຊາດເປັນ ສປປ ລາວ ທີ່ເດີນຕາມເສັ້ນທາງສັງຄົມນິຍົມ ແລະ ໄດ້ກຳນົດ ເອົາວັນດັ່ງກ່າວເປັນວັນຊາດ ຂອງ ສປປ ລາວ; ເປັນຜູ້ນຳພາ ປ່ຽນແປງໃໝ່ຢ່າງຮອບດ້ານ ແລະ ມີຫຼັກການ ຢູ່ປະເທດເຮົາ, ເຮັດໃຫ້ບາດກ້າວເດີນ ຂອງປະເທດເຮົາ ສອດຄ່ອງກັບສະພາບຄວາມເປັນຈິງ ແລະ ມີການພັດທະນາເປັນກ້າວໆ ໂດຍພາຍໃຕ້ການນຳພາ ຂອງພັກປະຊາຊົນປະຕິວັດລາວ.
ສະນັ້ນ, ສະມາຊິກພັກ ຕ້ອງກຳແໜ້ນ ແລະ ຮູ້ບຸນຄຸນ, ຜົນງານອັນຍິ່ງໃຫຍ່ ແລະ ແບບຢ່າງອັນລໍ້າເລີດຂອງປະທານ ໄກສອນ ພົມວິຫານ ໃນພາລະກິດປະຕິວັດ, ພ້ອມທັງເປັນບົດຮຽນອັນລ້ຳຄ່າ ເພື່ອນຳໄປພັດທະນາຕົນເອງ ກໍຄືເຂົ້າໃນການປະຕິບັດໜ້າທີ່ວຽກງານຕົວຈິງໃຫ້ມີປະສິດທິຜົນດີຂຶ້ນ.
ຂ່າວ: ຄຕພ, ພາບ: ແສງຈັນ
ຄໍາເຫັນ