ໃນຊຸມປີມໍ່ໆມານີ້, ຈີນ ແລະ ຣັດເຊຍໄດ້ເພີ່ມທະວີການຮ່ວມມືດ້ານການສຶກສາໃຫ້ຂະຫາຍຕົວເຂົ້າສູ່ລວງເລິກ. ປັດຈຸບັນ, ຈຳນວນນັກສຶກສາຈີນທີ່ໄປຮຽນຢູ່ຣັດເຊຍ ແລະ ນັກສຶກສາຣັດເຊຍທີ່ມາຮຽນຢູ່ຈີນ ລວມກັນແລ້ວມີຫຼາຍກວ່າ 80,000 ຄົນ. ທ່ານ ອີກໍ ມໍກຸລັອບ ເອກອັກຄະລັດຖະທູດຣັດເຊຍປະຈຳຈີນຢືນຢັນວ່າ: “ເປົ້າໝາຍກ່ຽວກັບຈຳນວນນັກສຶກສາ ຈີນ ແລະ ຣັດເຊຍຈະໄປຮຽນຢູ່ປະເທດຂອງກັນແລະກັນໃຫ້ບັນລຸເຖິງ 100,000 ຄົນກ່ອນປີ 2030 ທີ່ກຳນົດໄວ້ໃນແຜນການຮ່ວມມືດ້ານວັດທະນະທຳຣັດເຊຍ-ຈີນກ່ອນປີ 2030ຊຶ່ງອາດຈະບັນລຸກ່ອນເວລາກຳນົດ”.
“ບົດລາຍງານການວິເຄາະການສຳຫຼວດກ່ຽວກັບມິດຕະພາບ ແລະ ການແລກປ່ຽນວັດທະນະທຳລະຫວ່າງຊາວໜຸ່ມຈີນ-ຣັດເຊຍ” ສະແດງໃຫ້ເຫັນວ່າ: ມີຊາວໜຸ່ມຈີນ ແລະ ຣັດເຊຍຫຼາຍກວ່າ 80% ເຫັນວ່າ ສາຍພົວພັນຂອງສອງປະເທດເປັນມິດທີ່ດີ. ຊາວໜຸ່ມສອງປະເທດມີການຕີລາຄາໂດຍລວມທີ່ໃກ້ຄຽງກັນຕໍ່ອະນາຄົດຂອງສອງຝ່າຍ ແລະ ການຮ່ວມມືສອງຝ່າຍ, ມີຄວາມສົນໃຈສູງຕໍ່ວັດທະນະທຳຂອງກັນແລະກັນ ແລະ ມີຄວາມກະຕືລືລົ້ນສູງໃນການເດີນທາງໄປຢ້ຽມຢາມປະເທດຂອງກັນແລະກັນ. ມິດຕະພາບຈີນ-ຣັດເຊຍມີພື້ນຖານຄວາມຄິດເຫັນຂອງຊາວໜຸ່ມທີ່ໝັ້ນຄົງ ແລະ ຕັ້ງໜ້າ.
ດ້ວຍການແລກປ່ຽນບຸກຄະລາກອນ ແລະ ການຮຽນຮູ້ຊຶ່ງກັນແລະກັນທາງດ້ານແນວຄວາມຄິດ, ການສົນທະນາໃນຂົງເຂດການສຶກສາກຳລັງເຊື່ອມໂຍງເຂົ້າກັບຂົງເຂດເສດຖະກິດ-ສັງຄົມທີ່ກວ້າງຂວາງກວ່າເກົ່າ, ຈະສືບຕໍ່ສ້າງຄວາມເຂັ້ມແຂງໃຫ້ແກ່ການພັດທະນາຮ່ວມກັນໃນທຸກດ້ານ ເຊັ່ນ: ການໄປມາຫາສູ່ກັນດ້ານເສດຖະກິດການຄ້າ, ການຄົ້ນຄວ້າວິທະຍາສາດເຕັກໂນໂລຊີ ແລະ ການແລກປ່ຽນວັດທະນະທຳ ເປັນຕົ້ນ. ນີ້ຄືວິໄສທັດທີ່ເລິກເຊິ່ງຂອງ “ປີແຫ່ງການສຶກສາຈີນ-ຣັດເຊຍ” ຄື: ໂດຍຜ່ານການຮ່ວມມືດ້ານການສຶກສາ, ສ້າງອະນາຄົດທີ່ດີງາມຫຼາຍກວ່າເກົ່າ.
ຄໍາເຫັນ