ກິດຈະກໍາຂີ່ລົດຖີບຂໍານັບຮັບຕ້ອນສະຫຼອງອຸທິຍານແຫ່ງຊາດຫີນໜາມໜໍ່ເປັນມໍລະດົກໂລກທາງທໍາມະຊາດ

ໃນພິທີ, ທ່ານ ໝັ້ນຍືນ ຄິນສະໝອນ ຮອງປະທານຄະນະກໍາມະການປົກຄອງແຂວງໄດ້ກ່າວວ່າ: ກິດຈະກໍາຂີ່ລົດຖີບຄັ້ງນີ້,ໄດ້ເຄື່ອນຂະບວນຂຶ້ນໄປຕາມເສັ້ນທາງຫຼວງແຫ່ງຊາດເລກທີ 13 ນັບແຕ່ຈຸດເລີ້ມຕົ້ນຄື: ອານຸສອນສະຖານປະທານສຸພານຸວົງໄປຫາຈຸດປາຍທາງຄືໂຮງຮຽນສາມັນ ກິນນອນຊົນເຜົ່າ ລວມໄລຍະທາງໄປກັບປະມານ 20 ກວ່າກິໂລແມັດ. ພ້ອມນັ້ນຍັງໄດ້ມີກິດຈະກໍາແຂ່ງຂັນຂີ່ລົດຖີບເພື່ອຊີງລາງວັນຂອງທ່ານ ເລຂາພັກແຂວງ, ຊຶ່ງມີນັກຂີ່ລົດຖີບເຂົ້າຮ່ວມແຂ່ງຂັນ 2 ປະເພດຄື: ປະເພດເສືອພູເຂົາລຸ້ນອາວຸໂສນັບແຕ່ອາຍຸ 60 ປີຂຶ້ນໄປ ແລະ ປະເພດເສືອໝອບ ລຸ້ນຊາວໜຸ່ມ ອາຍຸ 20 ປີຂຶ້ນໄປ , ລວມຜູ້ເຂົ້າຮ່ວມແຂ່ງຂັນທັງໝົດ35 ຄົນ, ມີໄລຍະທາງແຂ່ງຂັນ8 ກິໂລແມັດ,ຈຸດສິ້ນສຸດການແຂ່ງຂັນ ໂຮງຮຽນສາມັນ ກິນນອນຊົນເຜົ່າ. ສ່ວນປະເພດເສືອໝອບ (ລຸ້ນຊາວໜຸ່ມ) ມີຜູ້ເຂົ້າຮ່ວມແຂ່ງຂັນ 24 ຄົນ, ມີໄລຍະທາງແຂ່ງຂັນ20 ກິໂລແມັດ, ຈຸດສິ້ນສຸດການແຂ່ງຂັນ ກອງພັນ 299.

ຜົນການແຂ່ງຂັນມີດັ່ງນີ້, ສໍາລັບປະເພດເສືອພູເຂົາລຸ້ນອາວຸໂສທີ 1 ໄດ້ແກ່ທ່ານ ອຸປະກອນ ສີບຸນເຮືອງ ໄດ້ຮັບເງິນສົດ 3 ລ້ານກີບພ້ອມຂັນລາງວັນ 1 ໜ່ວຍ ເປັນກຽດມອບໂດຍທ່ານ ໄຊຊະນະ ໂຄດພູທອນ; ອັນດັບທີ 2 ໄດ້ແກ່ທ່ານ ກົງສີ ຖາຊານົນ ໄດ້ຮັບເງິນສົດ 2.5 ລ້ານກີບ ເປັນກຽດມອບໂດຍທ່ານ ໝັ້ນຍືນ ຄິນສະໝອນ; ອັນດັບທີ 3 ໄດ້ແກ່ທ່ານ ຄໍາພອງ ວົງພະຈັນ ໄດ້ຮັບເງິນສົດ 2 ລ້ານກີບ ເປັນກຽດມອບໂດຍທ່ານ ແກ້ວອຸດອນ ບຸດສິງຂອນ ຄະນະປະຈໍາພັກແຂວງ.

ສໍາລັປະເພດເສືອໝອບ ລຸ້ນຊາວ ໜຸ່ມທີ 1 ໄດ້ແກ່ທ່ານ ພູຄູນ ຈັນສີດາ ໄດ້ຮັບເງິນສົດ 3 ລ້ານກີບພ້ອມຂັນລາງວັນ 1 ໜ່ວຍ ເປັນກຽດມອບໂດຍທ່ານ ໄຊຊະນະ ໂຄດພູທອນ; ອັນດັບທີ 2 ໄດ້ແກ່ທ່ານ ນິວັດ ເພົ່າພົງສະຫວັດ ໄດ້ຮັບເງິນສົດ 2.5 ລ້ານກີບ ເປັນກຽດມອບໂດຍທ່ານ ໝັ້ນຍືນ ຄິນສະໝອນ; ອັນດັບທີ 3 ໄດ້ແກ່ທ່ານ ສົມບູນ ຈັນສີດາ ໄດ້ຮັບເງິນສົດ 2 ລ້ານກີບ ເປັນກຽດມອບໂດຍທ່ານ ແກ້ວອຸດອນ ບຸດສິງຂອນ.

ໃນໂອກາດນີ້, ຍັງໄດ້ມອບລົດຖີບໃຫ້ແກ່ນັກກິລາແຂ່ງລົດຖີບແຂວງຄໍາມ່ວນເພື່ອໄປແຂ່ງຂັນກິລາແຫ່ງຊາດຢູ່ປະເທດໄທໃນວັນທີ 27 ມີນາ 2026,ເປັນກຽດມອບລົດຖີບໂດຍທ່ານ ວັດທະນາ ມາດມະນີສອນ ຕາງໜ້າກຸ່ມບໍລິສັດ ດີເອັມ ຈໍາກັດ ແລະ ຮັບໂດຍທ່ານ ນາງ ຈັນທະພອນ ໄຊຍະຈັກ ຕາງໜ້ານັກກິລາແຂວງຄໍາມ່ວນ ເຊິ່ງລົດຖີບຄັນດັ່ງກ່າວມີມູນຄ່າ 21 ລ້ານກີບ.

(ຂ່າວ: ແຂວງຄໍາມ່ວນ)