ທ່ານນາງ ໄກມະນີ ອໍລະບູນ ຫົວໜ້າກົມກວດກາ ກະຊວງການຕ່າງປະເທດໄດ້ກ່າວວ່າ: ການຈັດກິດຈະກຳປູກຕົ້ນໄມ້ຮ່ວມກັນຂອງທັງ 4 ພາກສ່ວນຄັ້ງນີ້, ຈັດຂຶ້ນພາຍໃຕ້ຄໍາຂວັນ “ປູກຕົ້ນໄມ້ເພື່ອສ້າງຕົວເມືອງນະຄອນຫຼວງວຽງຈັນໃຫ້ສວຍງາມ” ຈະປະກອບສ່ວນເຂົ້າໃນຂະບວນການສະເຫຼີມສະຫຼອງ 3 ວັນສໍາຄັນທາງປະຫວັດສາດຂອງຊາດຄື: ວັນສ້າງຕັ້ງພັກປະຊາຊົນປະຕິວັດລາວຄົບຮອບ 70 ປີ, ວັນສະຖາປະນາ ສປປ ລາວຄົບຮອບ 50 ປີ ແລະ ວັນເກີດຂອງປະທານ ໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ຄົບຮອບ 105 ປີ ແລະ ຍັງເປັນການສະແດງໃຫ້ເຫັນເຖິງຄວາມສາມັກຄີ ແລະ ເປັນກິດຈະກຳທີ່ຕິດພັນໂດຍກົງກັບການອອກແຮງງານແນໃສ່ການປົກປັກຮັກສາ, ຟື້ນຟູ ປ່າໄມ້, ສິ່ງແວດລ້ອມໃຫ້ໝັ້ນຄົງ ແລະ ມີຄວາມຍືນຍົງ ເພື່ອແນໃສ່ປົກປັກຮັກສາ, ຟື້ນຟູຄືນພື້ນທີ່ປ່າໄມ້ທີ່ເຊື່ອມໂຊມ ແລະ ເພື່ອສ້າງໃຫ້ຕົວເມືອງນະຄອນຫຼວງວຽງຈັນ ກາຍເປັນພື້ນທີ່ສີຂຽວ, ສະອາດ ແລະ ສວຍງາມ ແລະຮັບປະກັນການພັດທະນາມີຄວາມຍືນຍົງຕະຫຼອດໄປ.
ພ້ອມນີ້,ກິດຈະກຳຍັງເປັນການສ້າງຂະບວນການສະເຫຼີມສະຫຼອງວັນກຳມະກອນສາກົນ ຄົບຮອບ 139 ປີ, ວັນປູກຕົ້ນໄມ້ແຫ່ງຊາດ ຄົບຮອບ 45 ປີ ແລະ ວັນເດັກນ້ອຍສາກົນ ໃຫ້ເປັນຂະບວນການ ອັນຟົດຟື້ນແລະ ອັນສໍາຄັນອີກຢ່າງໜຶ່ງ ແມ່ນເປັນການສ້າງຂະບວນການເຕົ້າໂຮມຄວາມສາມັກຄີຂອງບັນດາສະມາຊິກກຳມະບານພາຍໃນທົ່ວກະຊວງການຕ່າງປະເທດ, ພ້ອມດ້ວຍພະນັກງານສະມາຊິກກຳມະບານຂອງທັງສາມພາກສ່ວນ.
ຂ່າວ-ພາບ: ບຸນອູ້ມ
ຄໍາເຫັນ