 |
ໃນພິທີ, ສະຫາຍ ພົຈວ ອຸດົມ ສີສົງຄາມ ໄດ້ກ່າວວ່າ: ວັນຜ່າວົງປິດລ້ອມຂອງກອງພັນທີ 2 ວິລະຊົນທີ່ທົ່ງໄຫຫີນຊຽງຂວາງ ເປັນວັນທີ່ມີຄວາມໝາຍຄວາມສໍາຄັນ, ສະແດງໃຫ້ເຫັນເຖິງການນໍາພາຂອງພັກຖືກຕ້ອງສະຫຼາດສ່ອງໃສ. ສະນັ້ນ, ການຜ່າວົງປິດລ້ອມຂອງກອງພັນທີ 2 ໄດ້ຢັ້ງຢືນໃຫ້ເຫັນຢ່າງຈະແຈ້ງວ່າ: " ສິນ ທໍາຍາມໃດກໍຊະນະອະທຳ " ແລະ ການຜ່າວົງປິດລ້ອມຂອງກອງພັນທີ 2 ແມ່ນໄຊຊະນະອັນໃຫຍ່ຫຼວງຂອງກໍາລັງປະກອບອາວຸດທີ່ຢູ່ໃຕ້ການນໍາພາຂອງພັກ, ເປັນເຫດການປະຫວັດສາດອັນສໍາຄັນຂອງຊາດ, ຂອງພັກ ແລະ ເປັນບົດຮຽນອັນລໍ້າຄ່າທີ່ສຸດໃຫ້ຂະບວນຕໍ່ສູ້ຂອງກອງທັບ ສະແດງໃຫ້ເຫັນເຖິງຄວາມບໍລິສຸດຜຸດຜ່ອງ, ຄວາມຈົງຮັກພັກດີ, ຄວາມສາມັກຄີເປັນຈິດໜຶ່ງໃຈດຽວກັນ. ພ້ອມກັນນີ້, ທ່ານຍັງໄດ້ຍົກໃຫ້ເຫັນມູນເຊື້ອວັນໂຕນຄຸກຢ່າງມະຫັດສະຈັນຂອງບັນດາຜູ້ນໍາພັກ ແລະ ແນວລາວຮັກຊາດ ຄົບຮອບ 66 ປີອີກດ້ວຍ.
ຈາກນັ້ນ; ສະຫາຍ ພົຈວ ພູທອນ ພົນໂພສີລາຫົງ ໄດ້ຍົກໃຫ້ເຫັນເຖິງພາລະບົດບາດທີ່ສໍາຄັນກ່ຽວກັບວັນກໍາມະກອນສາກົນ ເປັນຕົ້ນແມ່ນໃນຂະບວນວິວັດແຫ່ງການຕໍ່ສູ້ຕ້ານກັບສົງຄາມຈັກກະພັດ, ບັນດາອົງການ ຈັດຕັ້ງກຳມະບານໃນຫຼາຍປະເທດໄດ້ຂະຫຍາຍຕົວ ແລະ ເຮັດໃຫ້ຂະບວນການກຳມະກອນໃນທົ່ວໂລກມີການປ່ຽນແປງ, ເມື່ອສົງຄາມສິ້ນສຸດລົງຈໍານວນສະມາຊິກກຳມະບານໄດ້ເພີ່ມຂຶ້ນເຖິງ 21 ລ້ານຄົນ. ຄຽງຄູ່ກັບບັນ ຫາດັ່ງກ່າວສະຕິຕື່ນຕົວທາງດ້ານຊົນຊັ້ນ, ທາງດ້ານການຈັດຕັ້ງກຳມະບານ ແລະ ການຈັດຕັ້ງອື່ນໆ ກໍໄດ້ເພີ່ມຂຶ້ນ, ຄໍາຂວັນທີ່ເປັນຍຸດທະສາດຂອງເລນິນແມ່ນ “ຫັນເອົາສົງຄາມຈັກກະພັດມາເປັນສົງຄາມປະຕິວັດພາຍໃນ” ໄດ້ຊຸກດັນຂະບວນການກຳມະກອນ, ກຳມະບານໃນຫຼາຍປະເທດໃຫ້ຂະຫຍາຍຕົວຢ່າງແຂງແຮງ.
 |
ປະຫວັດສາດຂອງຊົນຊັ້ນກຳມະກອນ ໄດ້ຊີ້ໃຫ້ພວກເຮົາເຫັນຢ່າງຈະແຈ້ງວ່າ ຊົນຊັ້ນກຳມະກອນແມ່ນ ຊົນຊັ້ນນໍາໜ້າຂອງຍຸກສະໄໝ ທັງຕິດພັນກັບພື້ນຖານການຜະລິດ, ມີລະບຽບວິໄນ ໃນການອອກແຮງງານ, ເປັນຜູ້ມີຫົວຄິດປະດິດສ້າງ, ມີຄວາມສາມາດພຽງພໍໃນການສ້າງສັງຄົມໃໝ່ທີ່ກ້າວໜ້າສີວິໄລ, ສ້າງສາ ແລະພັດທະນາປະເທດຊາດໃຫ້ມັ່ງຄັ້ງເຂັ້ມແຂງ, ປະຊາຊົນຮັ່ງມີຜາສຸກ, ສັງຄົມມີຄວາມສາມັກຄີປອງດອງ, ປະຊາ ທິປະໄຕ, ສີວິໄລ ແລະ ຍຸຕິທຳມາເຖິງທຸກວັນນີ້.
ຂ່າວ: ປກສ
ຄໍາເຫັນ