 |
ສະຫາຍ ພັອ ພຽນສີ ແສງຄໍາຢອງ ຫົວໜ້າກົມພັກ ໄດ້ຍົກໃຫ້ເຫັນຜົນສຳເລັດຫຼາຍດ້ານທີ່ສຳຄັນໂດຍສະເພາະດ້ານການເມືອງ-ແນວຄິດ. ຍາມໃດຄະນະພັກ, ຄະນະກົມ ກໍໄດ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ພະນັກງານ-ນັກຮົບຢ່າງທົ່ວເຖິງ ເຮັດໃຫ້ທຸກສະຫາຍມີທັດສະນະຫຼັກໝັ້ນອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ການນຳພາຂອງພັກ ແລະ ປະຕິບັດລະບຽບວິໄນຂອງກຳລັງຢ່າງເຂັ້ມງວດ; ສຸມໃສ່ການປັບປຸງກົງຈັກການຈັດ ຕັ້ງພັກໃຫ້ປອດໃສ, ເຂັ້ມແຂງ, ໜັກແໜ້ນ, ສຳເລັດການຄຸ້ມຄອງ ແລະ ປ້ອນຂໍ້ມູນຊີວະປະຫວັດຂອງຄະນະພັກຊຸດໃໝ່ເຂົ້າໃນລະບົບຖານຂໍ້ມູນ; ສ້າງບົດສະຫຼຸບຕີລາຄາການຈັດຕັ້ງປະຕິບັດກອງປະຊຸມໃຫຍ່ 3 ຂັ້ນຂອງພັກ ແລະ ວຽກງານກໍ່ສ້າງພັກ-ພະນັກງານຢ່າງມີປະສິດທິຜົນ.
ນອກນັ້ນ, ວຽກງານບໍລິຫານ-ສັງລວມ ໄດ້ເຮັດໜ້າທີ່ເປັນເສນາທິການໃຫ້ຂັ້ນເທິງ, ຮັບ-ສົ່ງ ແລະ ຄຸ້ມຄອງເອກະສານໄດ້ທັງໝົດ 4,199 ສະບັບ; ເອົາໃຈໃສ່ແກ້ໄຂຊີວິດການເປັນຢູ່ຂອງນາຍ ແລະ ພົນຕຳຫຼວດ,ປະຕິບັດນະໂຍບາຍຍ້ອງຍໍ, ເລື່ອນຊັ້ນ ແລະ ຊ່ວຍເຫຼືອຊຶ່ງກັນ ແລະ ກັນ ໃນຍາມເຈັບເປັນ, ສົ່ງເສີມການຜະລິດເພື່ອສ້າງລາຍຮັບເສີມໃຫ້ຄອບຄົວໃຫ້ໄປຕາມທິດກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ.
ສ່ວນທິດທາງປີ 2026 ກົມພັກ ໄດ້ກຳນົດທິດທາງທີ່ສຳຄັນຄື: ສືບຕໍ່ເພີ່ມທະວີການສຶກສາອົບຮົມການ ເມືອງ-ແນວຄິດໃຫ້ເລິກເຊິ່ງ ແລະ ຕໍ່ເນື່ອງ; ປັບປຸງແບບແຜນວິທີເຮັດວຽກໃຫ້ມີວິທະຍາສາດ, ຫັນເປັນທັນສະ ໄໝໃນການຄຸ້ມຄອງຂໍ້ມູນພະນັກງານ-ສະມາຊິກພັກ; ຍົກສູງຄຸນນະພາບການກໍ່ສ້າງພັກ ແລະ ຂະຫຍາຍພັກ ໂດຍເນັ້ນໃສ່ຄຸນນະພາບຕາມກົດລະບຽບຂອງພັກຢ່າງເຂັ້ມງວດ; ເພີ່ມທະວີການກວດກາ ແລະ ຕ້ານປະກົດການຫຍໍ້ທໍ້ຕ່າງໆ ພາຍໃນກົມກອງ ເພື່ອຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ.
ໂອກາດນີ້, ສະຫາຍ ພົຈວ ຫຸມພັນ ຜິວເຂັມພອນ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຜົນງານທີ່ກົມພັກຍາດມາໄດ້ໃນປີຜ່ານມາ ແລະ ໄດ້ເນັ້ນໃຫ້ຄະນະພັກ-ຄະນະບັນຊາ ກໍຄື ພະນັກງານທົ່ວກົມ ເພີ່ມທະວີຄວາມຮັບຜິດຊອບຕໍ່ໜ້າທີ່ການເມືອງໃຫ້ສູງຂຶ້ນກວ່າເກົ່າ, ຮັກສາຄວາມສາມັກຄີພາຍໃນໃຫ້ເປັນປຶກແຜ່ນ ແລະ ສຸມທຸກສະຕິປັນຍາເຂົ້າໃນການຈັດຕັ້ງປະຕິບັດແຜນການປີ 2026 ໃຫ້ປະກົດຜົນເປັນຈິງ ເພື່ອສ້າງກົມພັກໃຫ້ເປັນໜ່ວຍພັກຮາກຖານ "ປອດໃສ, ເຂັ້ມແຂງ, ໜັກແໜ້ນ" ຢ່າງຕໍ່ເນື່ອງ.
ຂ່າວ: ປກສ
ຄໍາເຫັນ