ກອງບັນຊາການປ້ອງກັນເຄື່ອນທີ່ ສະຫຼຸບການນຳພາ-ຊີ້ນຳຮອບດ້ານ

ສະຫາຍ ພົຈວ ພູນສະຫວັນ ພັນທະເສນາ ຫົວໜ້າກອງບັນຊາການປ້ອງກັນເຄື່ອນທີ່ ໄດ້ລາຍງານການນຳພາ-ຊີ້ນຳຮອບດ້ານ ຂອງຄະນະພັກ-ຄະນະບັນຊາໃນການປະຕິບັດມະຕິ, ແຜນດໍາເນີນງານຂອງຄະນະພັກ, ແບບແຜນວິທີເຮັດວຽກ ແລະ ການເຄື່ອນໄຫວວຽກງານວິຊາສະເພາະ ຂອງກອງບັນຊາການປ້ອງກັນເຄື່ອນທີ່ ໃນໄລຍະຜ່ານມາ, ໃນນີ້ໄດ້ແບ່ງງານ-ແບ່ງຄວາມຮັບຜິດຊອບ ການນໍາພາ-ຊີ້ນໍາຂອງຄະນະພັກຊີ້ນຳແຕ່ລະກົມກອງ ໃນວຽກງານສຶກສາອົບຮົບການເມືອງນໍາພາ-ແນວຄິດໃຫ້ສະມາຊິກພັກ; ນາຍ ແລະ ພົນຕຳຫຼວດມີຄຸນທາດການເມືອງໜັກແໜ້ນ. ຄຽງຄູ່ກັນນີ້, ດ້ານວຽກງານວິຊາສະເພາະ ໄດ້ອີງຕາມການປະຕິບັດ 4 ແຜນງານ 29 ໂຄງການ ຂອງກະຊວງ ປກສ ໃນນັ້ນມີ 1 ໂຄງການຂອງກອງບັນຊາການປ້ອງກັນເຄື່ອນທີ່ ຄື: ໂຄງການກຽມພ້ອມສູ້ຮົບ ແລະ ແກ້ໄຂກໍລະນີສຸກເສີນ ປະກອບມີ 6 ກິດຈະກຳ, 15 ໜ້າວຽກທີ່ນອນຢູ່ໃນແຜນງານທີ່ 1 ຂອງກະຊວງ ປກສ ເພື່ອປະຕິບັດຕາມຄໍາສັ່ງແນະນໍາ ວ່າດ້ວຍການແກ້ໄຂປະກົດການຫຍໍ້ທໍ້ຢູ່ໃນສັງຄົມ ສະບັບເລກທີ 27/ນຍ, ລົງວັນທີ 05 ຕຸລາ 2013 ແລະ ຂໍ້ຕົກລົງ ວ່າດ້ວຍລະບອບປະຈຳການກຽມພ້ອມສູ້ຮົບຂອງກໍາລັງ ປກສ ສະບັບເລກທີ 958/ປກສ, ລົງວັນທີ 3 ມິຖຸນາ 2022 ກໍຄື 4 ແຜນງານ 29 ໂຄງການ, ໄດ້ບັນຈຸກຳລັງທັງໝົດເຂົ້າປະຈຳການເປັນ 5 ຈຸ, ໃນແຕ່ລະຈຸປະກອບມີຄະນະກອງບັນຊາການ, ຄະນະຫ້ອງ, ຄະນະກອງພັນ, ສູນ ແລະ ກອງຮ້ອຍສືບຂ່າວ ເປັນຄະນະຮັບຜິດຊອບຊີ້ນໍາໃນແຕ່ລະວັນ; ຕາມແຜນຍຸດທະຍາດສະກັດກັ້ນ ແລະ ຕອບຕ້ານກຸ່ມຄົນບໍ່ດີຢູ່ໃນ ສປປ ລາວ ແລະ ຈຸດຫຼ່ໍແຫຼມທີ່ອາດຈະເກີດຂຶ້ນ ໃນຂອບເຂດທົ່ວປະເທດ. ນອກນີ້, ຕໍ່ກໍາລັງເຄື່ອນທີ່ ປກສ ແຂວງ ໃນໄລຍະຜ່ານມາຄະນະພັກ - ຄະນະບັນຊາ ໄດ້ລົງຊຸກຍູ້, ເຮັດວຽກນໍາກອງບັນຊາການ ແລະ ບັນດາກອງພັນເຄື່ອນທີ່ ປກສ ແຂວງ ໃນຂອບເຂດທົ່ວປະເທດ.