ກອງບັນຊາການທະຫານແຂວງບໍ່ແກ້ວ ເປີດຂໍ້ແຂ່ງຂັນໄລຍະສັ້ນ

ກອງບັນຊາການທະຫານແຂວງບໍ່ແກ້ວ ໄດ້ຈັດພິທີເປີດຂໍ້ແຂ່ງຂັນໄລຍະສັ້ນຂຶ້ນເມື່ອບໍ່ດົນມານີ້ ທີ່ສະໂມສອນກອງບັນຊາການທະຫານແຂວງ ໂດຍການເປັນປະທານຂອງ ທ່ານ  ພົນຈັດຕະວາ ບຸນມີ ພາມີໄຊ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະການແຂວງບໍ່ແກ້ວ ມີ ຄະນະພັກ-ຄະນະບັນຊາ 6 ຫ້ອງ, 5 ກອງບັນຊາການທະຫານເມືອງ ເຂົ້າຮ່ວມ.
ໃນພິທີດັ່ງກ່າວ,ທ່ານ ພັນໂທ ສອນທະວີ ພົມປະດິດ ຮອງຫົວໜ້າຫ້ອງການເມືອງ ກອງບັນຊາການທະຫານແຂວງບໍ່ແກ້ວ ໄດ້ຂຶ້ນຜ່ານຂໍ້ຕົກລົງແຜນການ ແລະ ຄຳສັ່ງແນະນໍາຂອງກອງບັນຊາການທະຫານແຂວງ ກ່ຽວກັບການຈັດຕັ້ງເປີດຂະບວນການແຂ່ງຂັນໄລຍະສັ້ນສ້າງຜົນງານຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ. ຈາກນັ້ນຕາງໜ້າຄະນະພັກ-ຄະນະບັນຊາ ແຕ່ລະກົມກອງໄດ້ຂຶ້ນຈັບມືແຂ່ງຂັນ ໂດຍອີງຕາມ ແຜນການຂອງກະຊວງປ້ອງກັນປະເທດສະບັບເລກທີ 2691/ກປທ, ລົງວັນທີ 8 ພຶດສະພາ 2023 ແລະ ຄໍາສັ່ງແນະນໍາຂອງກົມໃຫຍ່ການເມືອງກອງທັບສະບັບເລກທີ 5307/ກມທ, ລົງວັນທີ 11 ສິງຫາ 2023. ເພື່ອເຮັດໃຫ້ການຈັດຕັ້ງສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີມີຂະບວນການຟົດຟື້ນແຂງແຮງ, ກວ້າງຂວາງແລະເລິກເຊິ່ງ, ທັງເປັນການກະຕຸກຊຸກຍູ້ຂະບວນການປັບປຸງກໍ່ສ້າງກົມກອງ, ກໍ່ສ້າງກອງທັບປະຊາຊົນລາວເປັນກອງທັບປະຕິວັດ, ມີແບບແຜນທັນສະໄໝ, ແນໃສ່ສ້າງຂະບວນການຮອບດ້ານໃນທົ່ວກອງບັນຊາການໃຫ້ມີຜົນງານຕົວຈິງ ເຮັດໃຫ້ມີບັນຍາກາດ, ມີຂະບວນການຟົດຟື້ນແຂງແຮງ ແລະ ຕໍ່ເນື່ອງ, ພ້ອມກັນນັ້ນກໍເພື່ອປົກປັກຮັກສາ ແລະ ເສີມຂະຫຍາຍທາດແທ້ມູນເຊື້ອພິລະອາດຫານຂອງກອງທັບປະຊາຊົນລາວ ໃຫ້ໜັກແໜ້ນເຂັ້ມແຂງຂຶ້ນຢ່າງບໍ່ຢຸດຢັ້ງ, ຖືເອົາບັ້ນແຂ່ງຂັນນີ້ເປັນການຍູ້ຂະບວນການປັບປຸງກໍ່ສ້າງກອງທັບ ແລະ ສ້າງກອງຈຸດສຸ່ມເປັນຕົວແບບຂອງກົມກອງ, ຕິດພັນກັບການກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ຂະບວນການກໍ່ສ້າງກົມກອງປອດໃສ, ປອດໄພ, ປອດຄະດີ, ຂະບວນການກໍ່ສ້າງນັກຮົບ-ກອງວັດທະນະທໍາ, ຂະບວນການ 4 ປູກ 4 ລ້ຽງ, ຂະບວນການ 4 ບຸກຂອງຊາວໜຸ່ມ, ຂະບວນການ 3 ດີຂອງສະຫະພັນແມ່ຍິງ ແລະ ຂະບວນການຈັດຕັ້ງປະຕິບັດ 7 ລະບອບ 18 ວຽກຂອງກອງທັບປະຊາຊົນລາວ, ທັງເປັນການສຶກສາອົບຮົມຈິດໃຈຮັກຊາດ, ສ້າງຄວາມຈົ່ງຮັກພັກດີຕໍ່ອຸດົມການຂອງພັກ, ຍົກສູງສະຕິລະວັງຕົວປະຕິວັດຕໍ່ກົນອຸບາຍທໍາລາຍມ້າງເພຂອງອິດທິກໍາລັງປໍລະປັກ, ມີສະຕິຕໍ່ການຈັດຕັ້ງ, ປະຕິບັດລະບຽບວິໄນເຂັ້ມງວດ ສາມາດເຮັດສໍາເລັດໜ້າທີ່ໃນທຸກກໍລະນີໂດຍເຄື່ອນໄຫວຕາມ 4 ໜ້າທີ່ໃຫຍ່, 26 ແຜນງານຂອງກະຊວງປ້ອງກັນປະເທດວາງອອກຢ່າງເຂັ້ມງວດ. 
ຂ່າວ-ພາບ: ວໍລະສິດ ພິດສະຫາຍ.