ສຳນັກຂ່າວສານຊິນຮວາລາຍງານໃນວັນທີ 2 ສິງຫາ ຜ່ານມາວ່າ: ອົງການອະນາໄມໂລກ (WHO) ລາຍງານວ່າ, ການລະບາດຂອງພະຍາດອີໂບລາ ໃນສາທາລະນະລັດ ປະຊາທິປະໄຕ ກົງໂກ ຫຼື DR Congo ໃນປັດຈຸບັນກາຍເປັນການລະບາດຄັ້ງໃຫຍ່ທີ່ສຸດໃນປະຫວັດສາດຂອງກົງໂກ, ໂດຍມີຜູ້ຕິດເຊື້ອ Bundibuyo ທີ່ຢືນຢັນແລ້ວ 3,605 ຄົນ, ລວມທັງຜູ້ເສຍຊີວິດ 1,587 ຄົນ ຊຶ່ງຄິດເປັນອັດຕາການຕາຍ 44%. ສູງກວ່າການລະບາດທີ່ໃຫຍ່ທີ່ສຸດກ່ອນໜ້ານີ້ໃນລະຫວ່າງປີ 2018- 2020 ຊຶ່ງມີ 3,317 ຄົນ.
ບົດລາຍງານຊີ້ໃຫ້ເຫັນວ່າ: ການລະບາດຂອງພະຍາດອີໂບລາໃນ DR Congo ປັດຈຸບັນ ຊຶ່ງເບື້ອງຕົ້ນຈຳກັດຢູ່ໃນເຂດສຸຂະພາບ Mongbwalu ຂອງແຂວງອິຕູຣີ, ໄດ້ແຜ່ລາມໄປສູ່ 49 ເຂດສຸຂະພາບໃນ 5 ແຂວງຄື: ອິຕູຣີ, ກີວູເໜືອ, ກີວູໃຕ້, ໂອ-ອູເອເລ ແລະ ໂຊໂປ ພາຍໃນສອງເດືອນ, ລວມທັງສົ່ງຜົນກະທົບຕໍ່ບຸກຄະລາກອນທາງການແພດ, ໂດຍບຸກຄະລາກອນກຸ່ມນີ້ຕິດເຊື້ອແລ້ວ 151 ຄົນ ແລະ ເສຍຊີວິດ 44 ຄົນ ຊຶ່ງເນັ້ນໃຫ້ເຫັນເຖິງຄວາມສ່ຽງໃນການປ້ອງກັນ ແລະ ຄວບຄຸມການຕິດເຊື້ອພາຍໃນສະຖານທີ່ບໍລິການດ້ານສຸຂະພາບ.
ອົງການ WHO ເຕືອນວ່າ: ຄວາມບໍ່ໝັ້ນຄົງ, ການຍ້າຍຖິ່ນຖານ, ການເຄື່ອນຍ້າຍຂອງປະຊາກອນໃນລະດັບສູງ ແລະ ການເດີນທາງຂ້າມຊາຍແດນ ໃນ DR Congo ກຳລັງເປັນອຸປະສັກຕໍ່ການເຝົ້າລະວັງ ແລະ ການຮັບມືກັບການລະບາດ, ໂດຍສະເພາະໃນເຂດທີ່ໄດ້ຮັບຜົນກະທົບຈາກຂໍ້ຂັດແຍ່ງທີ່ມີການເຂົ້າເຖິງການດູແລສຸຂະພາບ, ນ້ຳສະອາດ, ອາຫານ ແລະ ທີ່ພັກອາໄສທີ່ຈຳກັດ.
ອົງການ WHO ເນັ້ນໜັກເຖິງຄວາມຕ້ອງການອັນຮີບດ່ວນໃນການຍົກລະດັບການເຝົ້າລະວັງ, ການກວດ, ການປິ່ນປົວ, ການຄວບຄຸມການຕິດເຊື້ອ, ການມີສ່ວນຮ່ວມຂອງຊຸມຊົນ ແລະ ການຂົນສົ່ງເພື່ອສະກັດກັ້ນການລະບາດຂອງພະຍາດອີໂບລາທີ່ມີຄວາມສ່ຽງສູງ ໃນສາທາລະນະລັດ ປະຊາທິປະໄຕກົງໂກ.
ຄໍາເຫັນ